Бізнес-навіны

Нацбанк Беларусі і ЦБ РФ абмяркоўваюць лічбавую валюту і барацьбу з кіберзлачыннасцю ў фінансавай сферы

14 мая, Мінск /Кар. БЕЛТА/. Нацыянальны банк Беларусі і Цэнтральны банк Расіі абмяркоўваюць пытанні лічбавай валюты і меры барацьбы з кіберзлачыннасцю ў фінансавым сектары, паведамляе БЕЛТА.

Сустрэча беларускай і расійскай дэлегацый праходзіць у палацава-паркавым комплексе "Вялікі Свяцк Валовічаў". Дэлегацыі ўзначальваюць старшыня праўлення Нацбанка Беларусі Раман Галоўчанка і старшыня Цэнтральнага банка Расіі Эльвіра Набіуліна.

"З улікам тэмпаў развіцця лічбавых тэхналогій я рады, што мы зможам абмяняцца думкамі па лічбавай валюце, лічбавых фінансавых актывах і абмеркаваць актуальны стан і каардынацыю мер па процідзеянні кіберзлачыннасці ў фінансавым сектары. Найбольш вострая праблема - процідзеянне махлярству", - сказаў Раман Галоўчанка ў час 63-га пасяджэння Міжбанкаўскага валютнага савета Нацыянальнага банка Рэспублікі Беларусь і Цэнтральнага банка Расійскай Федэрацыі ў пашыраным складзе.

Старшыня праўлення Нацбанка адзначыў, што на абмеркаванне вынесены актуальныя пытанні ў банкаўскай і фінансавай сферах. Парадак дня даволі насычаны, ахоплівае як традыцыйныя пытанні, так і ключавыя трэнды і выклікі, з якімі сутыкаюцца банкаўскія сістэмы дзвюх краін.

"Пытанняў шмат. Прапаную прадметна разгледзець кожны з іх і прыняць неабходныя рашэнні", - сказаў Раман Галоўчанка.

Эльвіра Набіуліна адзначыла, што адбудзецца абмен думкамі аб бягучым стане эканомік, перспектывах. "Гэта важна, улічваючы, наколькі эканомікі нашых краін узаемазвязаны", - сказала яна.

Старшыня ЦБ Расіі звярнула ўвагу на важнасць такіх пытанняў, як стан устойлівасці банкаўскага, фінансавага сектара, развіццё новых тэхналогій, прымяненне штучнага інтэлекту, узаемадзеянне ў галіне лічбавых фінансавых актываў – усё гэта актуальна для бізнесу, для грамадзян нашых краін.

Адносна абароны грамадзян ад супрацьпраўных дзеянняў, ашуканскіх аперацый, яна звярнула ўвагу на нядаўна прынятыя змяненні ў заканадаўства. "Напрацаваны вопыт прымянення гэтых мер, і мы гатовы падзяліцца. Нам будзе цікава пачуць і ваш вопыт па многіх пытаннях", - сказала Эльвіра Набіуліна.

"Нашы прадпрыемствы развіваюць кааперацыю, гандаль, інвестыцыі растуць, турызм актыўна расце. Наша задача - фінансава падтрымаць гэту інтэграцыю, каб не было праблем з разлікамі, каб усё працавала на сучасным узроўні, бесперабойна. Я думаю, тое, што мы абмяркуем сёння, прымем рашэнні, дасць магчымасць рабіць так, каб бізнес і грамадзяне атрымлівалі ад гэтага карысць", - сказала старшыня ЦБ Расіі.