Бізнес-навіны

Мінск, Брэст і Гродна прызнаны лепшымі па ўмовах вядзення бізнесу ў Беларусі

20 лютага, Мінск /Кар. БЕЛТА/. Рэйтынг беларускіх гарадоў і раёнаў па ўмовах вядзення бізнесу апублікаваны на сайце Мінскага гарадскога аб'яднання прафсаюзаў, паведамляе БЕЛТА.

Рэйтынг на аснове 11 параметраў склалі спецыялісты беларускага офіса "Бітрыкс24" (сэрвісу па кіраванні і падтрымцы бізнесу). Кожны горад і раён ацэньваўся па 150-бальнай шкале. У прыватнасці, параўноўваліся колькасць прадпрыемстваў малога і сярэдняга бізнесу, гандлёвых плошчаў на 10 тыс. насельніцтва, рознічны тавараабарот на душу насельніцтва, аб'ём прамых замежных інвестыцый на 100 тыс. чалавек, доля кампаній з вэб-сайтамі. Ацэньваўся тавараабарот у сферы грамадскага харчавання, рознічны і агульны - на душу насельніцтва, аб'ём інвестыцый у інфармацыйныя тэхналогіі на 100 тыс. насельніцтва, аб'ём экспарту на душу насельніцтва.

Мінск аказаўся лідарам рэйтынгу па 9 параметрах з 11. Толькі па выручцы ад аптовага і рознічнага гандлю на душу насельніцтва сталіцу абышоў Наваполацк, а па аб'ёме гандлёвых плошчаў на 10 тыс. насельніцтва - Брэст, які ў выніку заняў другое месца, трэцяе дасталося Гродна.

У топ-20 беларускіх гарадоў і раёнаў па ўмовах вядзення бізнесу таксама ўвайшлі: Віцебск, Магілёў, Гомель, Дзяржынскі раён, Салігорскі раён, Наваполацк, Баранавічы, Полацкі раён, Жодзіна, Барысаўскі раён, Мазырскі раён, Лідскі раён, Жлобінскі раён, Бабруйск, Пінск, Аршанскі і Рэчыцкі раёны.

версія для друку

зрабіць стартавай

дабавіць у выбранае