Бізнес-навіны

ММЗ прадставіў прадукцыю на выстаўцы будаўнічай тэхнікі bauma СТТ Russia ў Маскве

Фота прэс-службы ММЗ

1 чэрвеня, Мінск /Кар. БЕЛТА/. Прадстаўнікі кіраўніцтва Мінскага маторнага завода прынялі ўдзел у рабоце найбуйнейшай у Расіі міжнароднай выстаўкі будаўнічай тэхнікі bauma СТТ Russia 2021, паведамілі карэспандэнту БЕЛТА ў прэс-службе ММЗ.

Маштабнае мерапрыемства праходзіла ў выставачным цэнтры "Крокус-Экспа". На ім прэзентавалі прадукцыю 340 вытворцаў тэхнікі і дылераў з 16 краін, у тым ліку Беларусі, Расіі, Партугаліі, Германіі, Францыі, Італіі, Бельгіі, Турцыі, Фінляндыі і Сінгапура.

Намеснік генеральнага дырэктара - дырэктар па якасці прадукцыі і тэхнічным сэрвісе ММЗ Іван Бакун і начальнік упраўлення рэалізацыі ў Расійскую Федэрацыю Алеся Санько азнаёміліся з прадстаўленымі на выстаўцы экспазіцыямі.

"Шляхам дзелавых прапаноў і перагавораў былі ўстаноўлены новыя бізнес-кантакты з патэнцыяльнымі спажыўцамі прадукцыі ММЗ. З многімі вытворцамі і дылерамі дасягнуты перспектыўныя дамоўленасці аб магчымасцях супрацоўніцтва. Выстаўка стала добрай магчымасцю абмеркаваць напрамкі далейшай работы і тэхнічныя пытанні з дзеючымі партнёрамі. На працягу года гэта было магчыма толькі ў рамках тэлефонных і відэастасункаў з-за складанасцей перамяшчэння, выкліканых сусветнай пандэміяй", - падкрэслілі ў прэс-службе.

Асаблівую цікавасць удзельнікаў выстаўкі выклікаў малалітражны трохцыліндравы рухавік MMZ-3LD. Кампанія з Уладзімірскай вобласці выказала намер замяніць беларускімі маторамі кітайскія на міні-трактарах сваёй вытворчасці. Цана мінскіх рухавікоў больш выгадная, а якасць і магчымасці тэхнічнага абслугоўвання не ўступаюць сусветным аналагам. Прадстаўнікі Уладзімірскай кампаніі лічаць, што гэтыя крытэрыі дадуць магчымасць істотна патанніць канечную прадукцыю і ахапіць большы сегмент рынку па цэнавым дыяпазоне.

Вытворца міні-пагрузчыкаў з Санкт-Пецярбурга правёў ужо ў мінулым годзе эксплуатацыйныя выпрабаванні рухавіка MMZ-3LD на сваёй тэхніцы і ў гэтым годзе набудзе партыю матораў ММЗ.

Зацікаўленасць у малалітражнай "тройцы" таксама выказала італьянская кампанія, якая выпускае спецтэхніку. Выкарыстанне беларускіх рухавікоў дапаможа лакалізаваць яе прадукцыю ў Расіі.

"Удзел прадстаўнікоў кіраўніцтва ММЗ у прэстыжнай міжнароднай выстаўцы садзейнічаў з'яўленню новых перспектыў істотнага павелічэння продажаў нашай прадукцыі", - адзначылі ў прэс-службе.

Мінскі маторны завод - вытворца сучасных дызельных, газадызельных, газапоршневых рухавікоў. Спецыялізуецца на распрацоўцы, праектаванні і вырабе сучасных трох-, чатырох-, шасці- і васьміцыліндравых рухавікоў. На заводзе выпускаецца больш за 100 мадыфікацый рухавікоў у дыяпазоне магутнасці ад 7 да 330 кВт, прызначаных для ўстаноўкі на сельскагаспадарчую, дарожна-будаўнічую тэхніку, аўтамабілі і аўтобусы, энергаўстаноўкі, кампрэсары і іншыя агрэгаты. Рухавікі ММЗ пастаўляюцца на канвееры 49 прадпрыемстваў Беларусі, краін СНД і далёкага замежжа, прадукцыя прадаецца ў больш як 50 краін Еўропы, Азіі, Афрыкі, Паўночнай і Лацінскай Амерыкі. Пры вытворчасці рухавікоў выкарыстоўваюцца камплектуючыя сусветна вядомых кампаній.

версія для друку

зрабіць стартавай

дабавіць у выбранае