Бізнес-навіны

Лукашэнка заявіў аб паскоранай дэвалютызацыі беларускай эканомікі

9 верасня, Мінск /Кар. БЕЛТА/. У Беларусі паскоранымі тэмпамі ідзе дэвалютызацыя эканомікі. Аб гэтым Прэзідэнт Беларусі Аляксандр Лукашэнка заявіў на нарадзе з апаратам Нацыянальнага банка і кіраўніцтвам банкаў, перадае карэспандэнт БЕЛТА.

"Паскоранымі тэмпамі ідзе дэвалютызацыя эканомікі. Доля рублёвага складніка ў шырокай грашовай масе ўзрасла з 41 працэнта ў снежні 2020 года да 63 працэнтаў у ліпені 2025-га. Калі прасцей - кожны дзень з пачатку года здаюць наяўную валюту ў сярэднім па $30 млн", - сказаў Прэзідэнт.

"Калі людзі дзяржаве давяраюць - яны нясуць свае грошы ў банк. І трэба адзначыць, што апошнім часам дасягнуты нядрэнныя вынікі. З 2021 года тэрміновыя ўклады юрыдычных і фізічных асоб у беларускіх рублях узраслі амаль у тры разы", - заявіў Аляксандр Лукашэнка.

Асаблівую ўвагу, падкрэсліў Прэзідэнт, трэба ўдзяліць фарміраванню доўгатэрміновых рэсурсаў. Прыярытэтам для банкаў павінна стаць прыцягненне сродкаў на тэрмін звыш трох гадоў, дадаў ён.

"Трэба выбудаваць сістэму работы для прыцягнення такіх рэсурсаў на найбольш прывабных для нашых грамадзян умовах. Магчыма, для гэтага спатрэбяцца новыя і смелыя рашэнні. Думаю, тут ёсць куды рухацца", - сказаў Аляксандр Лукашэнка.

Разам з тым, звярнуў увагу кіраўнік дзяржавы, не трэба забываць і пра іншыя крыніцы - прыцягненне замежнага капіталу, а таксама ўласныя рэсурсы, у тым ліку прыбытак. "А прыбытак банкаўская сістэма атрымлівае нядрэнны. Але распараджацца ім трэба адказна. Гэтыя грошы не павінны праядацца або ісці поўнасцю гадавымі бонусамі топ-менеджарам, а павінны вяртацца ў эканоміку", - падкрэсліў кіраўнік дзяржавы.

У сувязі з гэтым Прэзідэнт даручыў накіроўваць іх на фінансаванне эканамічнага развіцця - у першую чаргу на праекты, якія ствараюць дабаўленую вартасць.

"Рэгулятару трэба забяспечыць усе ўмовы, каб банкі маглі бесперашкодна фарміраваць рэсурсную базу ў неабходным аб'ёме. Колькасць грошай у краіне павінна адпавядаць рэальным патрэбнасцям эканомікі і не прыводзіць да росту цэн. У сувязі з гэтым задача Нацыянальнага банка - узмацніць кантроль за грашовай прапановай", - сказаў беларускі лідар.

версія для друку

зрабіць стартавай

дабавіць у выбранае