Бізнес-навіны

Лукашэнка паабяцаў падтрымку шклозаводу "Нёман" і заявіў аб пашырэнні вытворчасці

17 красавіка, Лідскі раён /Уладзімір Мацвееў - БЕЛТА/. Прэзідэнт Беларусі Аляксандр Лукашэнка паабяцаў падтрымку шклозаводу "Нёман" і заявіў аб пашырэнні вытворчасці. Аб гэтым ён сказаў у час сустрэчы з працоўным калектывам шклозавода, перадае карэспандэнт БЕЛТА.

"Вы малайцы, што працуеце. У вас ёсць перспектыва", - падкрэсліў беларускі лідар.

Прэзідэнт, у прыватнасці, адзначыў, што на прадпрыемстве арганізаваны выпуск шклаваты, на якую вялікі попыт на рынку, гэта імпартазамяшчальная прадукцыя. "Таму я прыняў рашэнне аб будаўніцтве яшчэ аднаго цэха тут. Грошы мы знойдзем для гэтага. Але самае галоўнае, што тая прадукцыя, якую вы будзеце вырабляць, яна патрэбна не толькі на ўнутраным, але і на знешнім рынку", - сказаў кіраўнік дзяржавы.

Аляксандр Лукашэнка паабяцаў разгледзець і пытанне адтэрміноўкі плацяжоў па даўгавых абавязацельствах прадпрыемства. "Што датычыцца вашых даўгоў, я разгледжу праект указа (ён у мяне на стале), наколькі вам адтэрмінаваць, каб вы маглі разлічыцца з дзяржавай. Вы ж разумееце, медыкам і ўсім трэба плаціць, і лякарствы трэба купляць - усё гэта за бюджэтныя грошы. А каб вам даўгі адтэрмінаваць, гэта трэба туды, дзе вы ўзялі, пакласці за кошт некага. Мы вас падтрымаем у гэтым плане, але майце на ўвазе, што вам трэба ўпірацца", - сказаў ён.

Прэзідэнту далажылі аб рабоце прадпрыемства, існуючых пытаннях і перспектывах развіцця. Дзякуючы запуску вытворчасці шклаваты ўдалося значна павялічыць аб'ёмы вытворчасці, пашырыць геаграфію экспарту.

"Прадукт пазнаваемы, ён запатрабаваны. На гэты момант ёсць пэўныя праблемы, але мы іх вырашым", - запэўніў кіраўнік прадпрыемства Юрый Кісляк.

Паводле яго слоў, ёсць попыт і на хрусталь, тым больш што "Нёман" застаўся самым буйным вытворцам гэтай прадукцыі ў Еўропе і на постсавецкай прасторы.

Аляксандр Лукашэнка ў сувязі з гэтым падкрэсліў правільнасць прынятага ў папярэднія гады рашэння аб неабходнасці падтрымаць і захаваць прадпрыемства. "Людзі ўнікальныя, умеюць рабіць усё гэта. Хрусталь выдатны", - адзначыў беларускі лідар. Ён прывёў у прыклад, што нават Прэзідэнт Азербайджана Ільхам Аліеў карыстаецца спецыяльнымі хрустальнымі шклянкамі для чаю, якія выраблены на гэтым беларускім прадпрыемстве.

Разам з тым кіраўніцтву прадпрыемства і адказным чыноўнікам дасталася порцыя крытыкі. Аляксандр Лукашэнка звярнуў увагу, што якраз перад яго прыездам тэрыторыю шклозавода пастараліся вызваліць ад бракаванай прадукцыі, якая ляжала там гадамі. Відавочна, каб схаваць з вачэй кіраўніка дзяржавы. "Пачалі хаваць гэты свой брак, які валяўся там тры гады. Я гэта ведаю. Вось да 1 верасня іх задача. Яны мне сказалі, што яны гэта ўсё здробняць, прададуць", - адзначыў Прэзідэнт у час сустрэчы з калектывам прадпрыемства.

Ад'язджаючы з завода, Аляксандр Лукашэнка яшчэ раз даручыў хутчэй пачынаць рэалізацыю праекта па будаўніцтве новага цэха па вытворчасці шклаваты. Гэта не толькі перспектыва для самога прадпрыемства, але работа для мясцовых будаўнікоў.

версія для друку

зрабіць стартавай

дабавіць у выбранае