Бізнес-навіны

Лукашэнка: Беларусь у 2025 годзе разлічвае атрымаць рэкордныя больш як $9 млрд ад экспарту прадуктаў харчавання

Фота з архiва

11 лістапада, Мінск /Кар. БЕЛТА/. Беларусь па выніках 2025 года разлічвае атрымаць рэкордныя больш як $9 млрд ад экспарту прадуктаў харчавання і сельгассыравіны. Аб гэтым Прэзідэнт Беларусі Аляксандр Лукашэнка заявіў 11 лістапада на ўрачыстай цырымоніі ўручэння дзяржузнагарод перадавікам АПК, перадае карэспандэнт БЕЛТА.

Кіраўнік дзяржавы адзначыў, што дзякуючы атрыманаму ў гэтым годзе ўраджаю і наяўнасці вялікіх аб'ёмаў якаснай сыравіны вырасла і перапрацоўка, у краіне сталі вырабляць больш прадуктаў - натуральных, якасных, смачных, любімых у 113 краінах свету.

"Па выніках 2025 года ад экспарту прадуктаў харчавання і сельгассыравіны чакаем рэкордныя больш як $9 млрд (некалі, яшчэ ўчора, марылі аб $7 млрд)", - сказаў Прэзідэнт.

Аднак гэта далёка не мяжа, і Аляксандр Лукашэнка ўпэўнены, што аб'ёмы могуць і павінны быць большыя. "Наша задача ў наступным годзе выйсці на $9,5 млрд, - падкрэсліў кіраўнік дзяржавы. - А па выніках новай пяцігодкі пастараемся выйсці і на $12 млрд".

Выконваць гэту задачу трэба будзе, вядома, у няпростых умовах, у тым ліку санкцыйнага націску, які не слабее і будзе прадаўжацца як адзін з кампанентаў канкурэнтнай барацьбы. "Дзякуй богу, мне ўдалося ўсё ж такі вас адвярнуць ад гэтых санкцый і не плакацца з прычыны і без прычыны, што ў нас санкцыі. Санкцыі, так, (але самае важнае. - Заўвага БЕЛТА) канкурэнцыя. Нікуды не дзенемся. Як бы ні спрабавалі дамовіцца з нашымі суседзямі і буйнымі ігракамі ў свеце, усё роўна нас будуць душыць, - звярнуў увагу Прэзідэнт. - За што? Таму што мы жывём сваім розумам, атрымліваем усё больш і больш. А гэта канкурэнцыя на сусветных рынках".

Свае словы кіраўнік дзяржавы праілюстраваў паказальным прыкладам са спробамі Украіны экспартаваць сваё збожжа праз Польшчу на іншыя рынкі. Польшча, якая публічна так падтрымлівае Украіну, у той сітуацыі катэгарычна запрацівілася. "Калі ўкраінцы пасмелі сваё збожжа ў мінулым і бягучым годзе правезці праз Польшчу ў порт (Гданьск і гэтак далей, польскія парты, каб іх загрузіць, таму што ўсё не вывезеш праз Адэсу і там вайна ідзе), што адбылося? Палякі сцяной сталі на граніцы і не пусцілі ўкраінскае збожжа. Проста правезці ў порт (не дазволілі. - Заўвага БЕЛТА), каб яны маглі ў Афрыку або якія-небудзь краіны, на свой рынак паставіць. Вось і ўсё. Вось вам канкурэнцыя, у што яна выліваецца", - звярнуў увагу Аляксандр Лукашэнка.

"Таму нас душылі і будуць душыць, пакуль мы не ляжам, не распластаемся, як нашы балтыйскія суседзі, пакуль не знішчым сваю эканоміку. Вось тады мы будзем для іх сябрамі, таму што мы для іх будзем звычайным рынкам, які будзе купляць, спажываць сам і (транзітам. - Заўвага БЕЛТА) на ўсю Расію і далей пастаўляць. Яны нам будуць везці ўсё: і камбайны, якія мы сёння вырабляем, і трактары... У іх гэта ўсё ёсць. Ім патрэбны рынак", - сказаў Прэзідэнт.

"Канкурэнцыя - гэта нядрэнная справа, але яна становіцца ўжо са стрэльбай у руках. Гэта дрэнна", - дадаў ён.

Кіраўнік дзяржавы падкрэсліў, што ў такіх умовах беларусам давядзецца напружвацца, выводзіць новыя пароды і культуры, развіваць тэхналогіі, шукаць магчымасці і больш актыўна асвойваць рынкі. "Тым больш што прадукты харчавання, адзенне, цяпер і ўзбраенне ў цане", - сказаў Прэзідэнт.

версія для друку

зрабіць стартавай

дабавіць у выбранае