Бізнес-навіны

Літва аднавіла работу пунктаў пропуску на граніцы з Беларуссю

20 лістапада, Воранаўскі раён /Кар. БЕЛТА/. Літва аднавіла работу пунктаў пропуску на граніцы з Беларуссю, перадае карэспандэнт БЕЛТА.

У пункце пропуску "Беняконі" (сумежны літоўскі "Шальчынінкай") праз граніцу праехалі першыя транспартныя сродкі.

Вадзіцель узбекскай фірмы Юрый, які адным з першых перасек граніцу, вязе ў Літву ўгнаенні. На пытанне, колькі часу ён правёў у чаканні, мужчына іранічна адказаў: "47 дзён. Дробязь".

Пра навіну аб тым, што Літва аднаўляе работу пунктаў пропуску, Юрый даведаўся ад кіраўніцтва фірмы. "Перш за ўсё заправіліся, падрыхтаваліся, патэлефанавалі з накапляльніка - і наперад. Ідзём афармляцца", - сказаў ён.

"Вядома, усе панеслі вялікія страты. 47 дзён машына прастаяла, страхоўкі закончыліся, усё закончылася, - дадаў дальнабойшчык. - А з гэтымі нумарамі Польшча не пускае. Толькі тут ці Латвія. А на Латвію "дазволаў" не мелі. Літва прымае без "дазволаў".

Тадэвуш, іншы вадзіцель, які таксама спяшаецца на афармленне дакументаў, прыехаў на граніцу 10 кастрычніка. Каменціруючы сітуацыю, у якой аказаўся ён, як і многія яго калегі, Тадэвуш сказаў: "Добра, толькі ў двукоссі".

На легкавушцы перасякае граніцу Юрый. "Еду на работу, мне нічога - я дома быў, на мяне гэта сітуацыя не паўплывала. Думаю, асабліва на літоўцах сітуацыя адбілася", - адзначыў мужчына.

Вяртаецца дадому да дзяцей Ірэна. "Я працую ў Літве, а жыву ў Беларусі. Рада, што адкрылі граніцу нарэшце. Усім цяжка, хто жыве ў сапраўдным паграніччы, - і ў Літве, і ў Беларусі. Людзі ў бягучым годзе на могілкі не змаглі прыехаць (у Дзень усіх святых і Дзень памінання памерлых). - Заўвага БЕЛТА)", - сказала яна, дадаўшы, што ўезду ў Беларусь чакаюць каля 20 легкавушак.

Пачаў работу і пункт пропуску "Каменны Лог" (сумежны літоўскі "Мядзінінкай").

версія для друку

зрабіць стартавай

дабавіць у выбранае