Бізнес-навіны

Літоўскі палітык: вялікая верагоднасць адкрыцця пунктаў пропуску на граніцы з Беларуссю да 30 лістапада

Фота з архiва

18 лістапада, Мінск /Кар. БЕЛТА/. Старшыня Літоўскай сацыял-дэмакратычнай партыі (ЛСДП) Міндаўгас Сінкявічус заявіў, што існуе вельмі высокая верагоднасць адкрыцця граніцы з Беларуссю яшчэ да 30 лістапада. Аб гэтым пішуць літоўскія СМІ.

Заява прагучала ў час пасяджэння камісіі па нацыянальнай бяспецы Літвы, прысвечанага сітуацыі з грузавікамі, якія знаходзяцца ў Беларусі.

Днём раней Сінкявічус гаварыў, што "найбольш адэкватнае і аптымальнае рашэнне, якое адпавядае інтарэсам усіх перавозчыкаў, прадпрыемстваў" будзе прынята на пасяджэнні камісіі па нацыянальнай бяспецы 18 лістапада.

Лідар сацыял-дэмакратаў адзначыў: "Сітуацыя дынамічная, і мы спадзяёмся, што яна нармалізуецца. Гэта не толькі тэарэтычныя меркаванні, але і паслядоўныя дзеянні крыміналістаў, пагранічнікаў, мытнікаў, паліцыі, а таксама палітычныя і дыпламатычныя крокі. Спадзяюся, што падобная сітуацыя больш не паўторыцца".

"Мы ацэньваем дзеянні, якія нам трэба будзе ажыццяўляць цяпер, у бягучы момант, з пункту гледжання нашай нацыянальнай палітыкі", - сказаў Сінкявічус пасля таго, як Польшча адкрыла два пагранічныя пераходы з Беларуссю 17 лістапада.

Старшыня літоўскага камітэта Сейма ў замежнай палітыцы Рэмігіюс Матузас заяўляў, што ўрад Літвы 19 лістапада прыме канчатковае рашэнне аб адкрыцці граніцы з Беларуссю. Згодна з існуючай сітуацыяй, як ён адзначыў, Вільнюс больш схіляецца да таго, каб адкрыць граніцу з Беларуссю не 30 лістапада, а раней. Матузас адзначыў, што крызіс на граніцы значна больш маштабны, чым гэта меркавалася: адкрыцця граніцы патрабуюць не толькі літоўскія перавозчыкі, але і Кітай, і краіны Цэнтральнай Азіі, якія незадаволены парушанымі ланцужкамі паставак.

У Нацыянальнай літоўскай асацыяцыі аўтаперавозчыкаў (LINAVA) лічаць, што Беларусь не дапусціла памылак у гэтай сітуацыі, а Літве трэба было лавіць кантрабандыстаў з шарамі на сваёй тэрыторыі, а не закрываць граніцы.

Прадстаўнікі пагранічных службаў Літвы і Беларусі сёння праводзяць перагаворы па пытанні сітуацыі на граніцы.

29 кастрычніка ўрад Літвы прыняў рашэнне на месяц закрыць кантрольна-прапускныя пункты на літоўска-беларускай граніцы. Рух праз пункт пропуску "Шальчынінкай" ("Беняконі") быў цалкам закрыты, а дзейнасць пункта пропуску "Мядзінінкай" ("Каменны Лог") абмежавана выключэннямі.

версія для друку

зрабіць стартавай

дабавіць у выбранае