Бізнес-навіны

"Пазітыўная тэндэнцыя назіраецца з сакавіка 2017 года, калі ў нас быў пік колькасці зарэгістраваных беспрацоўных - 43,4 тыс. Затым пачалося паступальнае зніжэнне. На 1 лістапада было ўжо 25,3 тыс., 1 снежня - 24 146. Калі ж параўноўваць даныя на пачатак гэтага года і 2017-га, то адбылося зніжэнне з 35,3 тыс. да 22 863 чалавек", - прывёў лічбы начальнік упраўлення палітыкі занятасці Мінпрацы Алег Такун.

Таксама павялічылася колькасць вакансій, на 1 студзеня 2018 года ў службах занятасці было 53 864 прапановы. Магчымасцей працаўладкавацца стала больш, што прывяло да пазітыўнага выніку - узровень зарэгістраванага беспрацоўя склаў 0,5 працэнта.

Больш рэзультатыўнай стала работа і службаў занятасці. З іх дапамогай у 2017 годзе знайшлі рабочыя месцы 61 працэнт тых, хто звярнуўся за садзейнічаннем у працаўладкаванні, у той час як у 2016-м такіх было 55 працэнтаў.

Зніжэнне беспрацоўя характэрна не для ўсіх раёнаў, аб чым сведчаць лічбы лістапада. Аднак гадавых вынікаў у разрэзе рэгіёнаў пакуль няма.-0-