Бізнес-навіны

Каранік пра ролю вучоных у развіцці БНБК: паспець заняць дэфіцытныя нішы, прапанаваўшы гатовы рыначны прадукт

7 красавіка, Мінск /Кар. БЕЛТА/. Роля навуковага суправаджэння ў дзейнасці БНБК у тым, каб дапамагчы са стварэннем гатовага рыначнага прадукту, з якім можна выйсці на дэфіцытныя нішы і паспець іх заняць. Аб гэтым заявіў журналістам старшыня Прэзідыума Нацыянальнай акадэміі навук Уладзімір Каранік па выніках нарады ў Прэзідэнта Беларусі Аляксандра Лукашэнкі аб развіцці Беларускай нацыянальнай біятэхналагічнай карпарацыі, перадае карэспандэнт БЕЛТА.

Кіраўнік НАН падкрэсліў, што БНБК - гэта сапраўды знакавы праект, пры рэалізацыі якога пабудаваны новыя вытворчыя плошчы і асвоены новыя тэхналогіі. Вобразна кажучы, цяпер Беларусь валодае тэхналогіямі на ўзроўні карыстальніка, растлумачыў ён. "Гэта значыць, нам перадалі вытворчую тэхналогію для таго, каб запусціць усе тэхналагічныя працэсы і атрымаць канечную прадукцыю", - сказаў Уладзімір Каранік.

Цяпер жа размова ідзе аб тым, каб перайсці на наступны ўзровень - пры садзейнічанні НАН асвоіць тэхналогіі на ўзроўні распрацоўшчыка. "Тут ужо неабходна навукова-метадычнае суправаджэнне, накіраванае на павышэнне ўстойлівасці карынебактэрыі (яна выкарыстоўваецца для вытворчасці лізіну, які ў сваю чаргу выкарыстоўваецца ў якасці кармавой дабаўкі ў жывёлагадоўлі і харчовай прамысловасці. - Заўвага БЕЛТА), яе прадукцыйнасці, на стварэнне безадходных цыклаў, калі пабочны прадукт аднаго з тэхналагічных працэсаў, які мае мінімальную астаткавую каштоўнасць, становіцца сыравінай для наступнага тэхналагічнага працэсу, ператвараючыся ў тавар, які лёгка рэалізаваць з добрай маржынальнасцю", - сказаў кіраўнік НАН.

Паводле яго слоў, спецыялісты на БНБК ужо значна рушылі наперад, павялічыўшы прадуктыўнасць карынебактэрыі. Цяпер важна забяспечыць устойлівасць гэтага працэсу, палічыўшы эканамічную эфектыўнасць. "Каб кожны раз тыя кампаненты, якія трэба дабаўляць у пажыўны раствор, па сваім кошце не нівеліравалі ўвесь выйгрыш у прыросце (аб'ёмаў вырабленага бактэрыямі лізіну. - Заўвага БЕЛТА). Гэта значыць, задача зрабіць так, каб гэты працэс быў стабільным, менш затратным, але высокапрадукцыйным. А гэта ўжо не проста тэхналагічная, а навуковая задача. Я спадзяюся (мы абмяркоўвалі гэта з Мікалаем Генадзьевічам Снапковым), што ўзаемадзеянне з кітайскімі партнёрамі і наш вопыт дадуць магчымасць гэту задачу вырашаць больш эфектыўна, чым да гэтага часу", - сказаў ён.

Уладзімір Каранік па рашэнні Прэзідэнта ўключаны ў склад рабочай групы, якой давядзецца ацэньваць эфектыўнасць перспектыў развіцця біятэхналогій у краіне. Гаворачы аб тым, якія задачы стаяць перад гэтай групай і сваёй ролі ў ёй, кіраўнік НАН падкрэсліў: "Выбраць найбольш перспектыўныя напрамкі, дзе мы будзем аднымі з нямногіх, хто прапануе гатовы прадукт, які мае высокія рыначныя перспектывы, высокую маржынальнасць. Не спрабаваць рабіць тое, што ўжо робяць іншыя і дзе рынак перагрэты. Трэба знайсці менавіта дэфіцытныя нішы і паспець іх заняць".

Што датычыцца кампетэнцый беларускіх вучоных у абазначанай сферы, кіраўнік Акадэміі навук перакананы: іх дастаткова. Для рэдагавання генома ў свеце выкарыстоўваецца тэхналогія CRISPR/Cas9. У Беларусі ёю авалодалі, напрыклад, спецыялісты Інстытута мікрабіялогіі, Інстытута генетыкі НАН. "Узровень лабараторных эксперыментаў паказвае, што нашы вучоныя валодаюць тэхналогіяй работы і з мікраарганізмамі, з клеткамі раслін, жывёл. Я лічу, што ў кааперацыі з кітайскімі партнёрамі, з апорай на канкрэтную вытворчасць БНБК, нашых кампетэнцый хопіць, каб забяспечыць навукова-метадычнае суправаджэнне тэхналагічнага працэсу і прапанаваць якія-небудзь новыя напрамкі і новыя прадукты, укараненне якіх у тэхналогію БНБК дасць магчымасць палепшыць эканамічныя складнікі", - адзначыў Уладзімір Каранік.

версія для друку

зрабіць стартавай

дабавіць у выбранае