Бізнес-навіны
Кабякоў абмеркаваў з Банкам ВТБ магчымы ўдзел у размяшчэнні беларускіх еўрааблігацый
5 лістапада, Мінск /Таццяна Іванюк - БЕЛТА/. Прэм'ер-міністр Беларусі Андрэй Кабякоў на форуме "Мінскія дзелавыя сустрэчы" абмеркаваў з прэзідэнтам - старшынёй праўлення Банка ВТБ (ПАТ) Андрэем Косціным удзел расійскага банка ў размяшчэнні беларускіх еўрааблігацый. Аб гэтым сёння журналістам на форуме паведаміў Андрэй Косцін, перадае карэспандэнт БЕЛТА.
"Мы сустрэліся з прэм'ер-міністрам, абмяркоўвалі пытанне двухбаковага супрацоўніцтва, у прыватнасці ўдзел Банка ВТБ у размяшчэнні еўрааблігацый, што ўрад плануе. Таксама мы разгледзелі шэраг іншых пытанняў. У іх ліку - развіццё разлікаў у нацыянальных валютах", - сказаў кіраўнік Банка ВТБ.
Адказваючы на пытанне, калі Беларусь, на яго думку, можа размясціць еўрааблігацыі, Андрэй Косцін адзначыў: "Цяпер сказаць гэта немагчыма - усё будзе залежаць ад параметраў выпуску".
У цэлым у час сустрэчы з Андрэем Кабяковым былі ўзняты бягучыя пытанні па ўзаемадзеянні бакоў. "У нас, напрыклад, ёсць пажаданні па дзейнасці нашага банка ў Беларусі, па яго капіталізацыі, а таксама па выкарыстанні расійскіх рублёў у дакапіталізацыі, а не толькі долараў", - удакладніў Андрэй Косцін.
Група ВТБ (Расія) - гэта Банк ВТБ, яго даччыныя (доля ВТБ - больш як 50 працэнтаў галасуючых акцый) крэдытныя і фінансавыя арганізацыі. Міжнародная сетка Групы ВТБ налічвае больш за 30 банкаў і фінансавых кампаній больш як у 20 краінах свету. ВТБ прадастаўляе сваім кліентам комплекснае абслугоўванне ў краінах СНД, Еўропы, Азіі і Афрыкі. На расійскім банкаўскім рынку Група ВТБ займае другое месца па ўсіх асноўных паказчыках. Асноўным акцыянерам Банка з'яўляецца дзяржава (амаль 61 працэнт галасуючых акцый, або прыкладна 85 працэнтаў статутнага капіталу банка).
версія для друку
зрабіць стартавай
дабавіць у выбранае