Бізнес-навіны

Як рэгулююць рынак крыптавалют у Беларусі? Міністр сувязі і інфарматызацыі даў падрабязны адказ

5 верасня, Мінск /Кар. БЕЛТА/. Рэгуляторыка ў сферы крыптавалют развіваецца зыходзячы з правапрымяняльнай практыкі. Аб гэтым журналістам заявіў міністр сувязі і інфарматызацыі Кірыл Залескі па выніках нарады ў кіраўніка дзяржавы па пытаннях развіцця сферы лічбавых знакаў, перадае карэспандэнт БЕЛТА.

"Сфера лічбавых знакаў, або токенаў, якія ўключаюць у сябе крыптавалюты, сапраўды складаная, новая, а самае галоўнае - рызыкоўная. Сёння кожны чалавек, кожны грамадзянін Рэспублікі Беларусь павінен разумець, што сфера крыптавалют для тых, хто ў гэтым разбіраецца, разумее і ведае, што рабіць, - сказаў Кірыл Залескі. - На самай справе нават тыя негатыўныя гісторыі, якія трапляюцца (невыкананне эмітэнтамі токенаў сваіх абавязацельстваў), - гэта тая рызыка, на якую свядома ідзе інвестар, які купляе токен, і якую ён павінен падлічваць самастойна".

Такім чынам, падкрэсліў міністр, выпадковым людзям, якія хочуць выпадкова зарабіць, у гэтай сферы не месца. "Неабходна дакладна ўзважваць свае дзеянні, неабходна валодаць прафесійнымі ведамі ў гэтай сферы, каб свядома ўкладваць уласныя зберажэнні ў гэту сферу, якая за кошт высокай рызыкі прадугледжвае больш высокі ў параўнанні з іншымі фінансавымі інструментамі даход", - сказаў Кірыл Залескі.

Паводле яго слоў, рэгуляторыка ў гэтай сферы развіваецца зыходзячы з правапрымяняльнай практыкі. Акты наглядальнага савета Парка высокіх тэхналогій з'яўляюцца рэгулярна па меры неабходнасці рэгулявання таго ці іншага аспекту. "Гэта пастаянная работа ў кансэнсусе ўсіх уключаных дзяржаўных органаў. Не толькі ўрада, але значна больш шырокага пераліку: Нацыянальны банк, Адміністрацыя Прэзідэнта, Камітэт дзяржкантролю, Аператыўна-аналітычны цэнтр пры Прэзідэнце і гэтак далей", - дадаў Кірыл Залескі.

Міністр канстатаваў, што рэгуляванне ў гэтай сферы не спыняецца. Гэтыя правілы будуць дапісвацца і дашліфоўвацца: "Безумоўна, пры любых спробах злоўжыванняў дзяржава будзе ставіць надзейны бар'ер. Мы гэта бачылі ў гісторыі развіцця крыптасферы, пачынаючы з 2018 года. Сёння мы ўжо, абапіраючыся на свой вопыт, паставілі заслон шэрагу махлярскіх схем і магчымасці выкарыстання токенаў у розных проціпраўных дзеяннях. Сёння мы вызначыліся з аперацыямі фізічных асоб, каб навесці тут парадак, мінімізаваць магчымыя страты для добрапрыстойных людзей", - рэзюмаваў Кірыл Залескі.

версія для друку

зрабіць стартавай

дабавіць у выбранае