Бізнес-навіны
Як Беларусь і Кітай развіваюць біржавы гандаль, расказалі ў БУТБ
Фота з архiва
12 студзеня, Мінск /Кар. БЕЛТА/. Асноўныя напрамкі развіцця стратэгічнага супрацоўніцтва Беларусі і Кітая ў гандлёвай і прамысловай сферах сталі галоўнымі пытаннямі на парадку дня дзелавога форуму, які прайшоў у Шанхаі. Аб гэтым паведамілі БЕЛТА ў прэс-службе Беларускай універсальнай таварнай біржы.
Арганізатарамі мерапрыемства, якое сабрала звыш 30 прадстаўнікоў кітайскага бізнесу, выступілі Беларуская ўніверсальная таварная біржа і буйны кітайскі вытворца ўпаковачных матэрыялаў і абсталявання, акрэдытаваны на БУТБ у снежні 2025 года. У дзелавым форуме таксама прыняў удзел генеральны консул Беларусі ў Шанхаі Аляксандр Шаўчэнка.
Улічваючы, што 2026-2027 гады аб'яўлены Гадамі прамысловай кааперацыі Беларусі і Кітая, асноўная ўвага ў ходзе мерапрыемства была сканцэнтравана на пошуку шляхоў актывізацыі ўзаемадзеяння дзвюх краін у галіне прамысловай вытворчасці і гандлю таварамі прамысловага прызначэння, у тым ліку з прымяненнем біржавога механізма. Як адзначыў кіраўнік прадстаўніцтва БУТБ у Шанхаі Аляксей Дыкуша, у 2025 годзе кітайскія вытворцы рэгулярна выкарыстоўвалі біржавую платформу для паставак у Беларусь шырокага спектра прамысловых і спажывецкіх тавараў, і ёсць усе падставы меркаваць, што ў бягучым годзе аб'ёмы здзелак у гэтым сегменце біржавога рынку будуць расці.
"У мінулым годзе кітайскія кампаніі істотна павялічылі продажы прамысловых і спажывецкіх тавараў на біржавых таргах - з $930 тыс. у 2024 годзе да больш як $12 млн у 2025-м. Пры гэтым праз біржу рэалізоўваліся не толькі запасныя часткі і камплектуючыя, але і прамысловы інструмент, спецыяльная тэхніка, тэхналагічнае абсталяванне, транспартныя сродкі. У выніку ўдзельная вага здзелак з таварамі гэтай катэгорыі ў агульным аб'ёме біржавога імпарту з Кітая склала 67 працэнтаў. З іх 24 працэнты ў вартасным выражэнні прыпалі на імпартазамяшчальную прадукцыю. Усё гэта сведчыць аб павышэнні цікавасці пастаўшчыкоў з КНР да рынку Беларусі і да біржавога канала збыту. Лічу, што гэта адкрывае дадатковыя магчымасці для нарошчвання ўзаемнага тавараабароту і ўмацавання гандлёва-эканамічных адносін паміж нашымі краінамі", - расказаў Аляксей Дыкуша.
У 2025 годзе для ўдзелу ў біржавых таргах рознымі групамі сыравінных і несыравінных тавараў на БУТБ акрэдытаваліся 100 рэзідэнтаў КНР. Цяпер агульная колькасць кітайскіх карыстальнікаў беларускай пляцоўкі налічвае 348 кампаній, тры з якіх маюць статус біржавых брокераў.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
версія для друку
зрабіць стартавай
дабавіць у выбранае