Бізнес-навіны

29 сакавіка, Мінск /Юлія Огнева - БЕЛТА/. Гандлёва-аптовая пляцоўка "Беларусь прапануе" адкрыецца ў Маскве ў бліжэйшы час, паведаміў сёння старшыня Вышэйшага каардынацыйнага савета Рэспубліканскай канфедэрацыі прадпрымальніцтва Уладзімір Карагін на адкрыцці 38-й міжнароднай выстаўкі-кірмашу па аптовым продажы тавараў лёгкай і тэкстыльнай прамысловасці "Белтэкслегпрам. Вясна", перадае карэспандэнт БЕЛТА.

"У бліжэйшы час у Маскве з'явіцца гандлёва-аптовая тэрыторыя плошчай 60 тыс. кв.м з назвай "Беларусь прапануе", дзе мы будзем аказваць дапамогу ў прасоўванні прадукцыі членаў нашай Палаты экспарцёраў. Акрамя таго, мы адкрылі прадстаўніцтвы ў Дубаі, Берліне, Калінінградзе, Новасібірску і Смаленску. Забяспечылі таксама выхады ў парты Балтыйскага мора", - адзначыў Уладзімір Карагін.

Паводле яго слоў, гэта дзейнасць канфедэрацыі ўзгадняецца з Нацыянальнай праграмай падтрымкі і развіцця экспарту на 2016-2020 гады. "У бліжэйшы час падпішам дагавор з Міністэрствам замежных спраў. Па сутнасці, канфедэрацыя бярэцца за аказанне дапамогі прадпрыемствам як дзяржаўнага, так і прыватнага сектара эканомікі ў прасоўванні іх прадукцыі на ўнутраным і знешніх рынках", - растлумачыў Уладзімір Карагін.