Бізнес-навіны

Экспарт у перыяд вялікіх магчымасцей. Лукашэнка абазначыў галоўную задачу для новага віцэ-прэм'ера

21 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка пры назначэнні Леаніда Зайца на пасаду віцэ-прэм'ера абазначыў ключавыя задачы для яго на новай пасадзе, перадае карэспандэнт БЕЛТА.

"Шчыра кажучы, практычна ўсе назначэнні, з майго пункту гледжання, зыходзячы з майго стылю работы з кадрамі, нестандартныя", - заявіў кіраўнік дзяржавы ў пачатку кадравага дня.

"У вас адна задача - экспарт. Вы гэта добра ведаеце, - звярнуўся Прэзідэнт да новага намесніка прэм'ер-міністра. - Магчымасці вялікія адкрываюцца на нашых асноўных рынках, як у Расіі, так і ў Кітаі, ды і ў іншых краінах. Думаю, што з гэтым вы справіцеся".

"Другая ваша задача, я гэта адкрыта кажу, вы гэта ведаеце, - падрыхтаваць сабе надзейную замену, - прадоўжыў Аляксандр Лукашэнка. - Разам з кіраўніком Адміністрацыі (Прэзідэнта. - Заўвага БЕЛТА) прапанаваць кандыдатуру і на працягу таго часу, які вы палічыце патрэбным, працаваць на пасадзе віцэ-прэм'ера".

Пры гэтым кіраўнік дзяржавы не называў дакладных тэрмінаў для Леаніда Зайца: "Я не супраць, каб вы працавалі вельмі доўга, колькі дазволіць Гасподзь. Але вы разумееце, што мы не вечныя, і сілы нашы не вечныя, таму трэба мець замену. Калі Прэзідэнта вызначае народ, то віцэ-прэм'ера назначае Прэзідэнт. Я хацеў бы, каб вы такога чалавека падрыхтавалі сабе на змену".

Кіраўнік дзяржавы падзякаваў Леаніду Зайцу за згоду заняць адказную пасаду віцэ-прэм'ера, дзе работа будзе напружанай: "Вось такое нестандартнае рашэнне. Яшчэ раз дзякую вам, што згадзіліся дапамагчы ў гэты няпросты час і час вялікіх магчымасцей, перш за ўсё ў тым сектары эканомікі, які вы будзеце ўзначальваць".

версія для друку

зрабіць стартавай

дабавіць у выбранае