Бізнес-навіны

Егіпет зацікаўлены ў стварэнні сумесных вытворчасцей з выкарыстаннем беларускага вопыту і тэхналогій

Фота з архiва

13 красавіка, Мінск /Кар. БЕЛТА/. Егіпет зацікаўлены ў стварэнні сумесных вытворчасцей з выкарыстаннем беларускага вопыту і тэхналогій. Аб гэтым ішла размова ў час сустрэчы намесніка міністра антыманапольнага рэгулявання і гандлю Беларусі Алега Дзікуна з Надзвычайным і Паўнамоцным Паслом Егіпта ў Расіі і Беларусі па сумяшчальніцтве Хамдзі Шаабанам, паведамілі БЕЛТА ў прэс-службе МАРГ.

На сустрэчы абмяркоўваліся актуальныя пытанні двухбаковага супрацоўніцтва, асабліва ў сельскай гаспадарцы і прамысловасці. Пасол выказаў зацікаўленасць у стварэнні сумесных вытворчасцей на тэрыторыі Егіпта з выкарыстаннем беларускага вопыту і тэхналогій, адзначыўшы, што бакам неабходна больш актыўна выкарыстоўваць існуючы патэнцыял.

Алег Дзікун правёў таксама шэраг іншых сустрэч з прадстаўнікамі краін і рэгіёнаў. У фармаце відэа-канферэнц-сувязі абмяркоўваліся пастаўкі беларускіх харчовых і нехарчовых тавараў у рознічныя сеткі Камчацкага края - у развіццё дамоўленасцей, дасягнутых у верасні 2025 года ў час візіту дэлегацыі Беларусі на чале з міністрам антыманапольнага рэгулявання і гандлю Артурам Карповічам. Таксама бакі намецілі правядзенне чацвёртага пасяджэння рабочай групы па супрацоўніцтве Беларусі і Камчацкага края ў Мінску ў рамках выстаўкі "ІНАПРАМ. Беларусь".

На сустрэчы з Надзвычайным і Паўнамоцным Паслом Ганы ў Расіі і Беларусі па сумяшчальніцтве Комам Стымам Джэху-Ап'яхам Алег Дзікун падкрэсліў высокую значнасць гэтай краіны для развіцця гандлёва-эканамічнага супрацоўніцтва з Афрыкай. Абмяркоўваліся пастаўкі фруктаў і какава-зярнят з Ганы, а таксама сельскагаспадарчай тэхнікі і ўгнаенняў з Беларусі. Прадстаўнік БУТБ Яраслаў Кавальчук прэзентаваў магчымасці біржавога механізма ў гандлі паміж Беларуссю і афрыканскімі краінамі.

У перагаворах з Надзвычайным і Паўнамоцным Паслом Алжыра ў Расіі і Беларусі па сумяшчальніцтве Туфікам Джуамам бакі абмеркавалі рэалізацыю дамоўленасцей, дасягнутых у снежні 2025 года ў час візіту Прэзідэнта Беларусі ў Алжыр. Асаблівая ўвага - сумесным эканамічным праектам, нарошчванню тавараабароту, умацаванню сувязей паміж дзелавымі коламі, а таксама ўзаемадзеянню ў сферах аховы здароўя і адукацыі.

версія для друку

зрабіць стартавай

дабавіць у выбранае