Бізнес-навіны

14 мая, Мінск /Таццяна Іванюк - БЕЛТА/. Дзень беларускай эканомікі будзе арганізаваны 22 кастрычніка ў Берліне. Аб гэтым сёння ў ходзе круглага стала на Беларускім прамысловым форуме паведаміў кіраўнік прадстаўніцтва нямецкай эканомікі ў Беларусі Уладзімір Аўгусцінскі, перадае карэспандэнт БЕЛТА.

Сярод арганізатараў мерапрыемства - Беларуская гандлёва-прамысловая палата і федэрацыя гандлёва-прамысловых палат Германіі. Уладзімір Аўгусцінскі таксама расказаў, што прадстаўніцтва нямецкай эканомікі сумесна з дэпартаментам па энергаэфектыўнасці Дзяржстандарту Беларусі плануе паездку прадстаўнікоў беларускіх органаў улады і прадпрыемстваў у Германію з 14 па 17 снежня. У час гэтага візіту беларускі бок азнаёміцца і атрымае дадатковую інфармацыю аб аднаўляльных крыніцах энергіі (АКЭ), у тым ліку біягазе і сонечнай энергіі. "Гэта інструменты ўрада па падтрымцы супрацоўніцтва ў галіне АКЭ, энергаэфектыўнасці і тэхналогій бяспекі", - растлумачыў ён. Акрамя таго, паводле даных кіраўніка прадстаўніцтва, у будучым годзе плануецца арганізаваць візіт дэлегацыі нямецкіх фірм у Беларусь у рамках прамысловага форуму. "Магчыма правядзенне работы ў фармаце В2В з біржай кантрактаў для таго, каб наладзіць больш глыбокае ўзаемадзеянне і пашырыць супрацоўніцтва", - адзначыў Уладзімір Аўгусцінскі.

Ён звярнуў увагу, што круглы стол "Стан і перспектывы нямецка-беларускай прамысловай кааперацыі ў кантэксце Еўразійскага эканамічнага саюза" ўключаны ў праграму Беларускага прамысловага форуму ўпершыню. Сёння ў ходзе мерапрыемства эксперты, у прыватнасці, абмяркоўваюць прыярытэтныя напрамкі прамысловай палітыкі Беларусі ў кантэксце ЕАЭС і ключавыя элементы прамысловай палітыкі Германіі. Адбудуцца дыскусіі, у тым ліку па разглядзе вопыту нямецка-беларускага супрацоўніцтва ў рамках інтэрнацыяналізацыі знешняй эканамічнай дзейнасці. У рабоце круглага стала прымаюць удзел прадстаўнікі МЗС Беларусі, Беларускай гандлёва-прамысловай палаты, місіі пасольства ФРГ у Беларусі.

Беларускі прамысловы форум праходзіць у Мінску з 12 па 15 мая.