Бізнес-навіны

26 мая, Мінск /Кар. БЕЛТА/. Дні беларускай эканомікі пройдуць на IV Міжнароднай выстаўцы ЭКСПА "Кітай-Еўразія". Такая дамоўленасць дасягнута ў час сустрэчы міністра эканомікі Беларусі Мікалая Снапкова з дэлегацыяй Сіньцзян-Уйгурскага аўтаномнага раёна Кітая на чале з дырэктарам упраўлення па справах міжнародных выставак Лі Цзінюанем, паведамілі БЕЛТА ў прэс-службе Мінэканомікі.

Бакі агаварылі фармат удзелу Беларусі і беларускай дэлегацыі ў гэтым выставачным форуме, а таксама дамовіліся арганізаваць у рамках ЭКСПА Дні беларускай эканомікі.

Акрамя таго, удзельнікі сустрэчы абмеркавалі перспектыўныя напрамкі супрацоўніцтва Беларусі і Сіньцзян-Уйгурскага аўтаномнага раёна Кітая. Сярод іх праект Кітайска-беларускага індустрыяльнага парку, удзел Беларусі ў адраджэнні эканамічнага напрамку Вялікага шаўковага шляху і арганізацыя на тэрыторыі гэтай аўтаномнай акругі сумеснай вытворчасці сельскагаспадарчых камбайнаў і іншай такой тэхнікі.

Таксама бакі лічаць, што неабходна актывізаваць узаемадзеянне ўрада Сіньцзян-Уйгурскага аўтаномнага раёна Кітая і гандлёва-эканамічных ведамстваў Беларусі ў рамках Беларуска-кітайскай камісіі па гандлёва-эканамічным супрацоўніцтве для садзейнічання двухбаковаму гандлю і інвестыцыям.

Выставачны форум ЭКСПА "Кітай-Еўразія" пройдзе ў горадзе Урумчы ў Кітаі з 1 па 6 верасня. Арганізатары разлічваюць, што экспазіцыя стане добрай платформай для развіцця гандлёва-эканамічных адносін паміж Усходам і Захадам.