Бізнес-навіны

"Давайце будзем цяпер будаваць гэтыя самалёты". Лукашэнка выказаўся аб перспектывах авіябудавання

Фота з архiва

19 снежня, Мінск /Кар. БЕЛТА/. Прэзідэнт Беларусі, Старшыня Усебеларускага народнага сходу Аляксандр Лукашэнка на другім пасяджэнні VII УНС выказаўся аб перспектывах авіябудавання ў Беларусі, перадае карэспандэнт БЕЛТА.

"Я настойваю на тым, што і новыя вытворчасці патрэбны. Калі нацыя хоча развівацца, трэба не проста паглыбляць вытворчасці там, дзе мы нешта ўмеем, але і ствараць новыя", - заявіў Аляксандр Лукашэнка.

Прэзідэнт спыніўся на такой сферы, як авіябудаванне: "Нешта мы ўмеем рабіць, таму што ажыццяўлялі рамонт самалётаў - і грамадзянскіх, і ваенных".

Ён адзначыў, што ў свой час было прынята рашэнне па пераносе з Мінска завода грамадзянскай авіяцыі на тэрыторыі Нацыянальнага аэрапорта Мінск. "Вынеслі авіярамонтнае гэта прадпрыемства. Гэта першая чарга. Сёння мы гатовы яго пашыраць і мы спатрэбіліся. Калі спецыялісты з Расіі прыехалі, дзе авіябудаванне на высокім узроўні, яны ахнулі. Паглядзелі: "У вас (у Беларусі. - Заўвага БЕЛТА) спецыялісты ёсць, у вас класныя вытворчасці - вам крыху трэба для таго, каб вырабляць самалёты", - дадаў кіраўнік дзяржавы.

Аляксандр Лукашэнка звярнуў увагу і на авіяцыйны рамонтны завод у Баранавічах, дзе рамантавалі і выраблялі "такія-сякія часткі" для ваенных самалётаў. "Давайце возьмем, гавару, гэтыя два заводы і будзем будаваць свае самалёты разам з расіянамі. Ні адна краіна - нават Кітай, напэўна, і ЗША - не будуе самалёты ў адзіночку", - заўважыў беларускі лідар.

Кіраўнік дзяржавы дадаў, што ў Расіі не хапае сярэднемагістральных і малых самалётаў, якія запатрабаваны сотнямі і тысячамі. "Мы рамантавалі ваенныя, грамадзянскія самалёты. Давайце будзем цяпер будаваць гэтыя самалёты", - падкрэсліў ён.

версія для друку

зрабіць стартавай

дабавіць у выбранае