19 верасня, Мінск /Андрэй Асфура - БЕЛТА/. Бельгійская кампанія Chrisal плануе арганізаваць у Беларусі вытворчасць мыйных і ачышчальных сродкаў. Аб гэтым паведамілі карэспандэнту БЕЛТА ў Дзяржаўным камітэце па навуцы і тэхналогіях.
У бліжэйшы час плануецца падрыхтаваць бізнес-план па стварэнню ў Беларусі вытворчасці па выпуску мыйных і ачышчальных сродкаў і разгледзець яго з зацікаўленымі ведамствамі.
Магчымасць стварэння ў Беларусі гэтай вытворчасці абмяркоўвалі ў час сустрэчы дырэктар кампаніі Юрый Брускін і старшыня ДКНТ Ігар Войтаў. Арганізацыя вытворчасці - толькі адзін з этапаў супрацоўніцтва з Беларуссю. У далейшым кампанія прадугледжвае з дапамогай выпушчаных у Беларусі тавараў асвоіць рынкі Расіі і Казахстана.
Прадукцыя, якая вырабляецца бельгійскай кампаніяй, даволі папулярная ў свеце і выкарыстоўваецца ў 58 краінах. Яе сферы прымянення: прамысловасць, сельская гаспадарка, энергетыка, ахова здароўя і інш. Дарэчы, канцэрны BMW і Audi перад фарбаваннем аўтамабіляў абястлушчваюць іх сродкамі Chrisal.
Бельгійская кампанія ўдзяляе вялікую ўвагу інавацыйным распрацоўкам. Так, сумесная распрацоўка з вядучымі вучонымі Генцкага ўніверсітэта - мікрабіялагічныя ачышчальнікі, у якіх удалося аб'яднаць мыйныя кампаненты і жывыя культуры. "Гэта высокатэхналагічны інавацыйны прадукт, у якім аб'яднаны мыйныя ўласцівасці і карысныя бактэрыі, якія сумесна забяспечваюць максімальна чыстую паверхню", - расказаў Юрый Брускін.
Старшыня ДКНТ Ігар Войтаў адзначыў патрэбнасць рэспублікі ў экалагічна бяспечных мыйных і ачышчальных сродках, якія былі б запатрабаваны для рэальнага сектара эканомікі.
Кампанія Chrisal створана ў 1989 годзе. У 1994 годзе пасля завяршэння працэсу стварэння і ўкаранення інавацыйных рашэнняў у галіне ачысткі фірма пачала выпускаць нестандартныя ачышчальнікі для прамысловага і бытавога прымянення.
Пн | Аўт | Сер | Чцв | Пт | Сб | Нядз |
---|