Бізнес-навіны
Беларускую прадукцыю вельмі любяць падробліваць. У БелГПП расказалі аб абароне брэндаў на знешніх рынках
Фота з архiва
5 сакавіка, Мінск /Кар. БЕЛТА/. Чаму трэба абараняць нацыянальныя брэнды на знешніх рынках, расказаў журналістам намеснік старшыні БелГПП Віталь Вабішчэвіч перад пачаткам Міжнароднай канферэнцыі па абароне нацыянальных брэндаў: ад рэгістрацыі таварных знакаў, процідзеяння нядобрасумленнасці да кібербяспекі, перадае карэспандэнт БЕЛТА.
"Усе цудоўна разумеем, якую ролю ў краіне адыгрывае задача па экспарце нашай прадукцыі. Я думаю, што ўсе ведаюць, наколькі індустрыяльна наша эканоміка і наколькі шмат у нас вытворчых прадпрыемстваў практычна ва ўсіх галінах прамысловасці. БелГПП законам упаўнаважана на абарону інтарэсаў прадпрыемстваў на знешніх рынках. Ёсць асобны артыкул у законе "Аб гандлёва-прамысловай палаце", прысвечаны аб'ектам інтэлектуальнай уласнасці. Пры палаце ёсць спецыяльная арганізацыя, якая займаецца і дапамагае прадпрыемствам у абароне іх таварных знакаў, патэнтаў на знешніх рынках. Таму ў нас такая непасрэдная, прамая задача, і гэты форум - гэта адзін з інструментаў яе вырашэння і рэалізацыі. Сёння, зыходзячы з міжнароднай практыкі і статыстыкі, камерцыялізацыя аб'ектаў інтэлектуальнай уласнасці, рэгістрацыя патэнтаў вельмі ўпэўнена імчыцца ўверх, статыстыка расце. І, вядома ж, мы разумеем, што гэта звязана з тым, што з'яўляюцца новыя прадукты, тэхналогіі. І без абароны брэндаў можна вельмі сур'ёзна падпасці пад штрафныя санкцыі, страты на знешнім рынку. Інакш кажучы, абарона нацбрэндаў - гэта не толькі павышэнне кошту нашых прадуктаў, але гэта яшчэ і абарона ад нядобрасумленнай канкурэнцыі", - аргументаваў Віталь Вабішчэвіч.
Акрамя таго, ён расказаў, якія тэмы будуць закрануты на мерапрыемстве. "Яно складаецца з трох раздзелаў, кожны з якіх фактычна адлюстроўвае тыя выклікі, якія ёсць. Мы паглядзім месца беларускіх прадпрыемстваў у міжнароднай сістэме, як у гэтай частцы развіваюцца нашы бліжэйшыя партнёры і контрагенты, як Кітай рухаецца наперад. І мы, у прынцыпе, пагаворым адкрыта, шчыра, даведаемся, што сёння стрымлівае развіццё гэтага пытання: пачынаючы ад банальных арганізацыйна-тэхнічных пытанняў, заканчваючы наяўнасцю кадравага патэнцыялу, фінансавання на гэта.
Гэта першая частка. Другая - гэта інтэрнэт-гандаль, электронныя гандлёвыя пляцоўкі, і гэта новы выклік. Ёсць вельмі шмат і кантрафактнай прадукцыі, а беларускую прадукцыю, я вам скажу, вельмі любяць падробліваць. Таму пытанняў вельмі шмат. І як у гэтым выпадку дзейнічаць прадпрыемствам, асабліва на знешніх рынках. Ну і трэці тэзіс - гэта тое, што звязана з абаронай аб'ектаў інтэлектуальнай уласнасці. Гэта і нядобрасумленная канкурэнцыя. У нас асобны блок - гэта кіберабарона. Гэта абарона нашай інфармацыі. Прыкладаў, калі зламыснікі выкрадаюць камерцыйную інфармацыю нашых прадпрыемстваў і далей яе выкарыстоўваюць па рабоце са знешнімі контрагентамі, на жаль, шмат, і на іх трэба адказваць", - звярнуў увагу намеснік старшыні БелГПП.
Генеральны дырэктар Нацыянальнага цэнтра інтэлектуальнай уласнасці Аляксей Курман адзначыў, што ў Беларусі экспартна арыентаваная эканоміка. "Галоўны выклік - гэта асваенне новых рынкаў для нашых прадпрыемстваў-экспарцёраў. А гэта непасрэдна звязана з неабходнасцю забеспячэння аховай, абаронай і сваіх аб'ектаў інтэлектуальнай уласнасці, і, зразумела, прадукцыі, якая будзе пастаўляцца. Таму галоўная задача, якая стаіць перад Нацыянальным цэнтрам інтэлектуальнай уласнасці, перад Дзяржаўным камітэтам па навуцы і тэхналогіях, - забяспечыць тую інфраструктуру, якая будзе садзейнічаць нашым прадпрыемствам у ахове і абароне сваёй прадукцыі на існуючых рынках і на новых рынках, асабліва краін Афрыкі і Паўднёва-Усходняй Азіі. Для гэтага ў нас у краіне фарміруецца трохступенчатая сісітэма аховы аб'ектаў інтэлектуальнай уласнасці - на нацыянальным, рэгіянальным узроўнях і, вядома ж, міжнародным, які ўключае сістэму рэгістрацыі аховы і абароны інтэлектуальнай уласнасці", - рэзюмаваў ён.
"Усе мы ведаем, што ў свеце ідзе жорсткая канкурэнцыя, барацьба за кожнага пакупніка, і менавіта інтэлектуальная ўласнасць становіцца ключавым інструментам у ахове і абароне нашых брэндаў і прадукцыі. Бо "Зроблена ў Беларусі" - ужо брэнд, і важна яго пацвярджаць і абараняць. І мы ўсе ведаем, што нашы вытворцы сутыкаюцца з вытворчасцю кантрафактнай, фальсіфікаванай прадукцыі. Менавіта інтэлектуальная ўласнасць дапамагае ім ачысціць рынак ад неарыгінальных тавараў", - падкрэсліў Аляксей Курман.
версія для друку
зрабіць стартавай
дабавіць у выбранае