Бізнес-навіны

Беларусь з 1 чэрвеня павышае экспартныя пошліны на нафту і нафтапрадукты

30 мая, Мінск /Кар. БЕЛТА/. Беларусь з 1 чэрвеня павышае стаўкі экспартных пошлін на нафту і нафтапрадукты, вывозімыя з тэрыторыі рэспублікі за межы мытнай тэрыторыі Мытнага саюза. Такое рашэнне прынята пастановай Савета Міністраў ад 27 мая 2011 года нумар 672, якое ўступае ў сілу з 1 чэрвеня, паведамілі БЕЛТА ў прэс-службе беларускага ўрада.

Стаўка вывазной мытнай пошліны на 1 т сырой нафты, уключаючы сырую нафту, што здабываецца ў Верхнячонскім і Талаканскім нафтагазакандэнсатных радовішчах, з 1 чэрвеня павысіцца з $453,7 да $462,1. На нафту з серай у саставе, за выключэннем сырой нафты, што здабываецца ў Верхнячонскім і Талаканскім нафтагазакандэнсатных радовішчах, экспартная пошліна складзе з 1 чэрвеня $217,5. На светлыя нафтапрадукты (лёгкія дыстыляты, сярэднія дыстыляты, газойлі) устаноўлена пошліна $309,6 за 1 т, на бензін таварны і прамагонны - $415,8.

Пошліна на цёмныя нафтапрадукты (вадкае паліва, масла, адпрацаваныя нафтапрадукты) з 1 чэрвеня складзе $215,8, на прапан, бутаны, этылен, прапілен, бутылен і бутадыен, іншыя звадкаваныя газы - $189,8, нафтавы вазелін, мінеральныя воскі і аналагічныя прадукты - $215,8. Акрамя таго, стаўка вывазной мытнай пошліны за 1 т нафтавага коксу і бітуму, іншых астаткаў ад перапрацоўкі нафты або нафтапрадуктаў, атрыманых з бітумінозных парод, будзе складаць $215,8, бензолу, талуолу, ксілолаў - $309,6.

Пастановай унесены змяненні ў пастанову Савета Міністраў ад 31 снежня 2010 года нумар 1932 "Аб устанаўленні ставак вывазных мытных пошлін адносна нафты сырой і асобных катэгорый тавараў, выпрацаваных з нафты, і прызнанні страціўшымі сілу некаторых пастаноў Савета Міністраў Рэспублікі Беларусь".

Як паведамлялася, Беларусь з 1 студзеня 2011 года мае права атрымліваць расійскую нафту і нафтапрадукты без пошлін і без абмежавання аб'ёмаў. Гэта прадугледжана Пагадненнем аб парадку выплаты і залічэння вывазных мытных пошлін (іншых пошлін, падаткаў і збораў, якія маюць эквівалентнае дзеянне) пры вывазе з тэрыторыі Беларусі за межы мытнай тэрыторыі Мытнага саюза сырой нафты і асобных катэгорый тавараў, выпрацаваных з нафты. Дакумент падпісаны кіраўнікамі дзяржаў Мытнага саюза 9 снежня 2010 года, ратыфікаваны Палатай прадстаўнікоў Нацыянальнага сходу Беларусі 21 снежня і адобраны Саветам Рэспублікі 22 снежня 2010 года.

Пагадненнем устаноўлены новыя ўмовы пастаўкі нафты і нафтапрадуктаў у Беларусь. Урэгуляваны пытанні спагнання і пералічэння ў бюджэт Расіі вывазных мытных пошлін пры вывазе з тэрыторыі Беларусі за межы Мытнага саюза нафты сырой і асобных тавараў з вуглевадароднай сыравіны. Такім чынам, уведзены новы механізм выплаты і залічэння экспартных пошлін. Ён прадугледжвае, што пошліна ад экспарту беларускай сырой нафты паступае ў бюджэт Рэспублікі Беларусь, а пошліна ад экспарту нафтапрадуктаў - у бюджэт Расійскай Федэрацыі.

версія для друку

зрабіць стартавай

дабавіць у выбранае