Бізнес-навіны

Беларусь прапанавала стварыць адзіны турыстычны рынак ШАС

Фота з архіва ШАС

30 красавіка, Мінск /Кар. БЕЛТА/. У Бішкеку Кыргызскай Рэспублікі адбылася знакавая падзея для турыстычнай галіны Еўразійскага рэгіёна - сустрэча кіраўнікоў турыстычных адміністрацый дзяржаў - членаў Шанхайскай арганізацыі супрацоўніцтва (ШАС). Рэспубліку Беларусь на палях форуму прадставіў дырэктар Нацыянальнага агенцтва па турызме Кірыл Машарскі, які выступіў з ініцыятывай стварэння агульнага турыстычнага рынку ШАС, паведамілі БЕЛТА ў агенцтве.

Адной з цэнтральных тэм беларускага парадку дня стала ўмацаванне транспартных артэрый. Беларусь выказала гатоўнасць нарошчваць лагістычную звязанасць паміж Мінскам і ключавымі гарадамі краін ШАС.

"Фундамент любога турпатоку - гэта даступнасць і камфорт перамяшчэння", - падкрэсліў Кірыл Машарскі. У планах не толькі пашырэнне геаграфіі палётаў, але і далейшая лібералізацыя візавага рэжыму. Стварэнне безбар'ернага асяроддзя разглядаецца як каталізатар, здольны кратна павялічыць узаемны абмен турыстамі.

Беларусь гатова прапанаваць замежным партнёрам унікальныя ўмовы для развіцця турыстычнай інфраструктуры: стварэнне сумесных турыстычных кластараў, будаўніцтва гасцініц, паркаў адпачынку, этнакомплексаў, развіццё інфраструктуры для сямейнага і маладзёжнага турызму. Краіна прапануе празрыстыя ўмовы, падатковыя стымулы і гарантыі для інвестараў.

У ходзе сустрэчы былі прэзентаваны прыярытэтныя напрамкі, якія складаюць залаты фонд беларускага турызму. Асаблівы інатрэс у калег па ШАС выклікалі аздараўленчы турызм, культурна-гістарычны і патрыятычны, а таксама аграсядзібы, якія ўжо сталі візітнай карткай краіны.

Беларускі бок выступіў з ініцыятывай стварэння агульных турыстычных маршрутаў. Размова ідзе аб фарміраванні адзінага турыстычнага рынку ШАС, дзе краіны не канкурыруюць, а дапаўняюць адна адну, ствараючы трансгранічныя прадукты, прывабныя для турыстаў з усяго свету.

Кірыл Машарскі выказаў упэўненасць у доўгатэрміновым поспеху выбранага курсу. "Мы ўпэўнены, што сумесныя праекты, узаемныя турыстычныя патокі і культурны абмен стануць важным укладам ва ўмацаванне даверу і эканамічнага росту, а таксама ў дасягненне мэт устойлівага развіцця для ўсяго нашага аб'яднання", - падкрэсліў ён.

Вынікі сустрэчы ў Бішкеку пацвердзілі: Рэспубліка Беларусь з'яўляецца актыўным і стратэгічна важным іграком на турыстычнай карце ШАС. Наперадзе - этап рэалізацыі дасягнутых дамоўленасцей, які абяцае стаць новай главой у гісторыі беларускай гасціннасці.

версія для друку

зрабіць стартавай

дабавіць у выбранае