Бізнес-навіны

Беларусь плануе знізіць энергаёмістасць ВУП на 4 працэнты да 2030 года

Фота з архiва

9 студзеня, Мінск /Кар. БЕЛТА/. Беларусь плануе знізіць энергаёмістасць ВУП на 4 працэнты да 2030 года. Аб гэтым расказаў карэспандэнту БЕЛТА намеснік старшыні Дзяржстандарту - дырэктар Дэпартамента па энергаэфектыўнасці Віталь Крэцкі.

"Дзяржаўная праграма "Устойлівая энергетыка і энергаэфектыўнасць" на 2026-2030 гады накіравана на эфектыўнае вырашэнне задач у рамках вызначанага Праграмай сацыяльна-эканамічнага развіцця Беларусі на 2026-2030 гады прыярытэту росту канкурэнтаздольнасці, паскарэння тэхналагічнага развіцця і лічбавай трансфармацыі для развіцця высокатэхналагічнай і самадастатковай эканомікі, павышэння якасці прадукцыі, тавараў, работ, паслуг", - адзначыў Віталь Крэцкі.

Мэтамі дзяржпраграмы з'яўляюцца павышэнне энергетычнай эфектыўнасці нацыянальнай эканомікі, умацаванне энергетычнай самастойнасці краіны за кошт уключэння ў паліўна-энергетычны баланс краіны мясцовых паліўна-энергетычных рэсурсаў (ПЭР), уключаючы аднаўляльныя крыніцы энергіі (АКЭ), надзейнае і эфектыўнае задавальненне патрэбнасці рэальнага сектара эканомікі і насельніцтва ў даступных энергетычных рэсурсах. "Іх дасягненне дасць магчымасць забяспечыць устаноўленыя праграмай сацэканамразвіцця Беларусі на 2026-2030 гады індыкатары па ўзроўні энергетычнай самастойнасці не менш як 33 працэнты ў 2030 годзе і ўзроўні зносу электрычных сетак не больш як 45 працэнтаў да 2030 года", - звярнуў увагу кіраўнік дэпартамента.

Для дасягнення пастаўленых мэт распрацаваны тры падпраграмы. Так, падпраграма "Павышэнне эфектыўнасці выкарыстання паліўна-энергетычных рэсурсаў" будзе вырашаць задачу па стрымліванні росту валавога спажывання ПЭР пры эканамічным развіцці краіны. Гэта будзе забяспечвацца за кошт мадэрнізацыі і тэхнічнага перааснашчэння вытворчасцей з укараненнем сучасных навукаёмістых, рэсурса- і энергазберагальных тэхналогій, абсталявання і матэрыялаў, у тым ліку павышэння эфектыўнасці тэхналагічных працэсаў з паглыбленнем аўтаматызацыі і электрыфікацыі прамысловай вытворчасці, актывізацыі работы з насельніцтвам па папулярызацыі энергазберажэння і рацыянальнага выкарыстання ПЭР у жылым сектары. "З мэтай павышэння эфектыўнасці спальвання мясцовых ПЭР у рамках дзяржпраграмы прадугледжваецца перавод каля 150 кацельняў, якія працуюць пераважна на дровах, на выкарыстанне пелет. Эфектыўнасць іх эксплуатацыі дасягаецца за кошт замены старых незагружаных дрывяных катлоў на новыя пелетныя катлы, якія ўстанаўліваюцца пад фактычную цеплавую нагрузку. Работа кацельні пераводзіцца ў аўтаматычны рэжым, зніжаецца ўдзел чалавека і забяспечваецца працяглая работа катла. Рэалізацыя гэтых мерапрыемстваў дасць магчымасць знізіць энергаёмістасць ВУП на 4 працэнты ў 2030 годзе ў адносінах да 2025 года пры тэмпах росту ВУП 115,8 працэнта", - падзяліўся планамі Віталь Крэцкі.

Падпраграма "Павышэнне энергетычнай самастойнасці" прадугледжвае ўключэнне ў паліўна-энергетычны баланс краіны ўласных энергетычных рэсурсаў, што дасць магчымасць умацаваць энергетычную самастойнасць за кошт узвядзення, рэканструкцыі і мадэрнізацыі энергакрыніц з замяшчэннем імпартуемых відаў паліва мясцовымі ПЭР, у тым ліку АКЭ, і выпрацоўкі электрычнай энергіі на Беларускай АЭС. У 2026-2030 гадах прадугледжваецца стварэнне 48 энергакрыніц, якія выкарыстоўваюць мясцовыя ПЭР, падкрэсліў Віталь Крэцкі.

"Падпраграма "Збалансаванае развіццё і мадэрнізацыя энергетычнай галіны" прадугледжвае збалансаванае развіццё і мадэрнізацыю генерыруючых крыніц і вывад з эксплуатацыі фізічна і маральна ўстарэлага энергетычнага абсталявання, павышэнне даступнасці, надзейнасці і эфектыўнасці цепла- і газазабеспячэння спажыўцоў, лічбавізацыя энергетычнай сферы, электра- і газазабеспячэнне насельніцтва рэгіёнаў Беларусі, якія пацярпелі ад катастрофы на Чарнобыльскай АЭС", - растлумачыў намеснік старшыні.

"Спажыванне электраэнергіі ў краіне забяспечваецца за кошт вытворчасці на ўласных электрастанцыях. Заяўленая ў дзяржпраграме неабходнасць рэканструкцыі ліній электраперадачы ўсіх класаў напружання  з'яўляецца мерай, накіраванай на стварэнне ўмоў для далейшага павелічэння электраспажывання ў краіне ў сувязі з уводам у эксплуатацыю Беларускай АЭС, а таксама прынятым рашэннем аб будаўніцтве трэцяга энергаблока на дзеючай станцыі. Названыя праекты патрабуюць папераджальнага развіцця сеткавай інфраструктуры для надзейнага электразабеспячэння", - падагульніў Віталь Крэцкі.

версія для друку

зрабіць стартавай

дабавіць у выбранае