У Беларусь без візы на 30 дзён
Афіцыйны сайт Рэспублікі Беларусь
Бізнес
Каляндар падзей у Беларусі
Выдатныя мясціны Беларусі
Сусветная спадчына ЮНЕСКА ў Беларусі
Беларускія санаторыі і курорты
Сувеніры з Беларусі
| Галоўная | Бізнес | Бізнес-навіны

Бізнес-навіны

20 Ліп 2015

Беларусь гатова пастаўляць у Зімбабвэ ўвесь спектр прадукцыі машынабудавання

20 ліпеня, Мінск /Таццяна Лісатовіч - БЕЛТА/. Беларусь гатова пастаўляць у Зімбабвэ ўвесь спектр прадукцыі машынабудавання. Аб гэтым заявіў сёння прэм'ер-міністр Андрэй Кабякоў на сустрэчы з віцэ-прэзідэнтам Зімбабвэ Эмерсанам Мнангагва, перадае карэспандэнт БЕЛТА.

Кіраўнік урада адзначыў, што ў гэтай сферы Беларусь уваходзіць у лік вядучых сусветных дзяржаў - вытворцаў тэхнікі, якая канкурэнтная і па цане, і па якасці. "Беларусь мае агульнапрызнаны вопыт і ўнікальныя тэхналогіі. Асабліва - у галіне сельгасмашынабудавання, - звярнуў увагу прэм'ер. - Мы гатовы пастаўляць у Зімбабвэ ўвесь спектр прадукцыі машынабудавання: кар'ерную, сельскагаспадарчую і дарожна-будаўнічую тэхніку". Таксама беларускі бок зацікаўлены ў пастаўках высакаякаснай грузавой тэхнікі Мінскага аўтамабільнага завода.

Нараўне з таварнымі пастаўкамі Беларусь прапануе сучасныя фінансавыя механізмы і прывабныя ўмовы продажу айчыннай тэхнікі. Гэта, у прыватнасці, экспартнае крэдытаванне і пастаўкі тэхнікі на ўмовах міжнароднага лізінгу.

У ліку іншых магчымых напрамкаў двухбаковага супрацоўніцтва Беларусі і Зімбабвэ Андрэй Кабякоў вылучыў таксама адукацыю, пастаўкі калійных угнаенняў. "Мы гатовы поўнасцю задаволіць патрэбнасці Зімбабвэ, у тым ліку і ў рамках доўгатэрміновых узаемавыгадных кантрактаў", - адзначыў ён.

На думку кіраўніка беларускага ўрада, перспектывы развіцця двухбаковых узаемаадносін ёсць і ў галіне навукова-тэхнічнага супрацоўніцтва. У якасці стартавых праектаў ён прапанаваў узаемадзеянне ў сферы тэхналогіі апрацоўкі даных дыстанцыйнага зандзіравання Зямлі, выкарыстанне мікрабіялагічных угнаенняў, ачысткі вады, а таксама выкарыстанне шматфункцыянальных беспілотных авіяцыйных комплексаў, распрацаваных НАН Беларусі.

"Безумоўна, важным напрамкам нашай работы з'яўляецца стварэнне дагаворна-прававой базы, - прадоўжыў прэм'ер. - Таксама неабходна паскорыць фарміраванне сумеснай камісіі па гандлёва-эканамічным супрацоўніцтве, каб пачаць прадметную прапрацоўку канкрэтных напрамкаў".

У цэлым Андрэй Кабякоў адзначыў, што Беларусь разглядае Зімбабвэ як перспектыўнага партнёра ў Афрыканскім рэгіёне і цэніць дружалюбныя адносіны з гэтай краінай. Нягледзячы на тое, што сёння лічбы ўзаемнага гандлёва-эканамічнага супрацоўніцтва паміж краінамі вельмі сціплыя, бакі, упэўнены прэм'ер, маюць усе магчымасці адрадзіць узаемавыгаднае супрацоўніцтва на больш высокім узроўні.

Віцэ-прэзідэнт Зімбабвэ падзякаваў беларускаму боку за цёплы прыём. Ён шчыра прызнаўся, што быў здзіўлены, наколькі Беларусь развітая краіна, наколькі чыстыя яе гарады і ветлівыя людзі.

На заканчэнне сустрэчы бакі падпісалі мемарандум аб узаемаразуменні паміж урадамі Беларусі і Зімбабвэ аб пастаўках беларускай тэхнікі ў Зімбабвэ і прадастаўленні крэдытных рэсурсаў.

Архіў
Пн Аўт Сер Чцв Пт Сб Нядз
Помнікі Вялікай Айчыннай вайны ў Беларусі
Партызанскі летапіс