Бізнес-навіны
Беларусь больш як у тры разы павялічыла біржавы экспарт мяса і мясапрадуктаў у 2025 годзе
Фота з архiва
8 студзеня, Мінск /Кар. БЕЛТА/. Беларусь больш як у тры разы павялічыла біржавы экспарт мяса і мясапрадуктаў у 2025 годзе, паведамілі БЕЛТА ў прэс-службе Беларускай універсальнай таварнай біржы.
Паводле даных БУТБ, у 2025 годзе мясаперапрацоўчыя прадпрыемствы Беларусі рэалізавалі на экспартных біржавых таргах 53 тыс. т мяса і мясапрадуктаў, што ў 3,2 раза больш, чым у 2024 годзе. У якасці пакупнікоў беларускай мясной прадукцыі на біржавой пляцоўцы выступалі прадстаўнікі шасці краін: Азербайджана, Казахстана, Кітая, Кыргызстана, Расіі і Узбекістана.
"У мінулым годзе пул імпарцёраў айчыннай мясной прадукцыі, якія выкарыстоўваюць біржавы механізм, істотна пашырыўся. Калі ў 2024 годзе біржавыя здзелкі заключалі 80 кампаній з трох краін, то ў 2025-м - 123 кампаніі з шасці краін. Колькасць беларускіх прадаўцоў таксама прыкметна вырасла - з 33 у 2024 годзе да 46 у 2025-м. Найбольшыя аб'ёмы продажаў прыпалі на Расію, Узбекістан і Кітай. Пры гэтым асаблівым попытам у пакупнікоў-нерэзідэнтаў карысталася замарожаная і ахалоджаная ялавічына, а менавіта водрубы, блокі з мяса і абваленае мяса", - паведамілі ў прэс-службе БУТБ.
Акрамя таго, адзначаецца, што высокі ўзровень канкурэнцыі на біржавых таргах садзейнічаў росту экспартных цэн на беларускія мясапрадукты ў сярэднім на 5-7 працэнтаў, а па самых запатрабаваных пазіцыях - да 30 працэнтаў.
"За асобныя лоты ў ходзе гандлёвых сесій змагаліся да сямі замежных пакупнікоў, што прыводзіла да значнага павышэння кошту мясной прадукцыі і дазваляла беларускім экспарцёрам атрымліваць дадатковую выручку. У цэлым на працягу ўсяго мінулага года на біржавой платформе назіраўся ўстойлівы узыходзячы цэнавы трэнд на мяса, эндакрынна-ферментную сыравіну і мясныя паўфабрыкаты, што цалкам адпавядае агульнасусветным тэндэнцыям", - пракаменціравалі ў прэс-службе біржы.
Гандлёвыя сесіі па продажы мясной прадукцыі на знешні рынак праводзяцца на БУТБ тры разы на тыдзень. На таргах рэалізуюцца блокі з мяса, абваленае (бескасцёвае) мяса, водрубы, субпрадукты, топленыя жывёльныя тлушчы, мясныя паўфабрыкаты і эндакрынна-ферментная сыравіна.
ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.
версія для друку
зрабіць стартавай
дабавіць у выбранае