Бізнес-навіны

Беларусь і Татарстан дамовіліся аб павелічэнні ўзаемных паставак сельгаспрадукцыі праз БУТБ

Фота з архiва

20 студзеня, Мінск /Кар. БЕЛТА/. Беларусь і Татарстан маюць намер больш актыўна выкарыстоўваць механізм біржавых таргоў для ажыццяўлення ўзаемных паставак прадукцыі сельскай гаспадаркі. Гэта пытанне абмяркоўвалася ў час візіту ў цэнтральны офіс Беларускай універсальнай таварнай біржы (БУТБ) намесніка прэм'ер-міністра Татарстана - міністра сельскай гаспадаркі і харчавання Марата Зябарава, паведамілі БЕЛТА ў прэс-службе БУТБ.

Гэта створыць дадатковыя магчымасці для рэалізацыі экспартнага патэнцыялу і пасадзейнічае ўмацаванню дзелавых сувязей паміж беларускімі і татарстанскімі прадпрыемствамі аграпрамысловага комплексу. На думку намесніка кіраўніка ўрада Татарстана, біржавая пляцоўка можа стаць эфектыўным інструментам узаемадзеяння вытворцаў і спажыўцоў сельгаспрадукцыі ў Беларусі і Татарстане, ствараючы спрыяльныя ўмовы для росту тавараабароту і дапамагаючы фарміраваць доўгатэрміновыя гандлёвыя адносіны.

"Мы зацікаўлены ў паглыбленні супрацоўніцтва з Беларуссю ў біржавой сферы і гатовы аказваць садзейнічанне ў інфармаванні татарстанскага бізнесу аб магчымасцях беларускай біржавой платформы. Мяркуючы па аб'ёмах здзелак, заключаных у мінулым годзе, біржавыя таргі з'яўляюцца запатрабаваным інструментам у сельгаспрадпрыемстваў Татарстана, а значыць, гэты напрамак узаемадзеяння неабходна развіваць і маштабаваць", - лічыць Марат Зябараў.

Паводле даных БУТБ, у 2025 годзе кампаніі з Татарстана набылі на біржавых таргах прадукцыю сельскай гаспадаркі на агульную суму $44 млн. З іх 84 працэнты прыпала на сухое абястлушчанае і натуральнае малако. Згодна з дамоўленасцямі, дасягнутымі з кіраўніком татарстанскай дэлегацыі, далейшы рост біржавога тавараабароту плануецца забяспечваць не толькі за кошт паставак беларускіх тавараў у Татарстан, але і шляхам імпарту ў Беларусь шроту алейных культур, сланечнікавага алею і збожжавых.

"Біржавы механізм здольны аднолькава эфектыўна вырашаць як закупачныя, так і збытавыя задачы прадпрыемстваў АПК. Таму для татарстанскіх экспарцёраў біржа паслужыць зручным пунктам уваходу на рынак Беларусі, даючы магчымасць без пасрэднікаў працаваць з буйнейшымі пакупнікамі алейна-тлушчавай прадукцыі", - падкрэсліла намеснік старшыні праўлення БУТБ Наталля Кішкель, расказваючы аб варыянтах прымянення біржавых таргоў.

У 2025 годзе карыстацца паслугамі БУТБ пачалі 19 новых суб'ектаў гаспадарання Татарстана, і цяпер на біржы акрэдытаваны 60 прадстаўнікоў гэтага рэгіёна Расіі. З Беларусі ў Татарстан пастаўлялася сухое малако і сыроватка, сметанковае масла, сычужныя сыры і тварог, а таксама мяса і мясныя паўфабрыкаты. У сваю чаргу беларускія кампаніі куплялі ў Татарстане поліэтыленавую плёнку і камплектуючыя для прамысловага абсталявання.

ААТ "Беларуская ўніверсальная таварная біржа" створана ў 2004 годзе. Першыя таргі адбыліся ў чэрвені 2005 года. БУТБ - адна з буйнейшых таварных біржаў ва Усходняй Еўропе. Яе галоўная функцыя - садзейнічанне беларускім прадпрыемствам у экспарце прадукцыі і дапамога замежным кампаніям у выхадзе на беларускі рынак. На біржы прадаецца метала-, леса-, сельгаспрадукцыя, прамысловыя і спажывецкія тавары шырокай наменклатуры.

версія для друку

зрабіць стартавай

дабавіць у выбранае