Бізнес-навіны

Беларусь і Танзанія маюць намер пашырыць супрацоўніцтва ў АПК

Фота Мінсельгасхарча

9 красавіка, Мінск /Кар. БЕЛТА/. Беларусь і Танзанія маюць намер пашыраць супрацоўніцтва ў аграпрамысловай сферы, паведамілі БЕЛТА ў прэс-службе Мінсельгасхарча па выніках сустрэчы намесніка міністра сельскай гаспадаркі і харчавання Беларусі Аляксандра Якоўчыца з Надзвычайным і Паўнамоцным Паслом Аб'яднанай Рэспублікі Танзанія ў Расіі і Беларусі па сумяшчальніцтве Фрэдрыкам Ібрахімам Кібутай.

Бакі абмеркавалі перспектывы развіцця двухбаковага ўзаемадзеяння ў сферы сельскай гаспадаркі і харчовай бяспекі.

У 2025 годзе тавараабарот харчовай прадукцыі і сельскагаспадарчай сыравіны паміж краінамі вырас у 3,6 раза. Экспарт беларускай прадукцыі ўключаў пастаўкі алею і мяса-касцявой мукі, імпарт - алейнага насення, пладоў, кавы і кветак.

"Аналізуючы лічбы нашага ўзаемнага тавараабароту, які прадэманстраваў амаль чатырохразовы рост у мінулым годзе, мы разумеем, што наш патэнцыял не вычарпаны і мы зацікаўлены ў развіцці ўзаемаадносін з Танзаніяй як з рэгіёнам, які з'яўляецца прыярытэтным", - адзначыў Аляксандр Якоўчыц.

Беларусь гатова прапанаваць партнёрам шырокі спектр прадукцыі з высокай дабаўленай вартасцю: малочныя прадукты, уключаючы сухое малако (неразбаўленае і абястлушчанае), дзіцячае харчаванне, сметанковае масла і сыры, а таксама мяса птушкі як дадатковую кропку росту. У размове бакі прагаварылі кампетэнцыі беларускай навукі і адукацыі: чатыры профільныя ВНУ, падведамныя Мінсельгасхарчу, гатовы ажыццяўляць падрыхтоўку высокакваліфікаваных кадраў для аграрнага сектара.

Фрэдрык Ібрахім Кібута акцэнтаваў увагу на поспехах Танзаніі ў забеспячэнні харчовай бяспекі і выказаў зацікаўленасць у абмене вопытам з беларускім бокам.

"За апошнія пяць гадоў урад Танзаніі дасягнуў значных поспехаў у сферы забеспячэння харчовай бяспекі, асабліва ў вырошчванні збожжавых, - падкрэсліў пасол. - Мы імкнёмся да павелічэння аб'ёмаў і думаем, што Беларусь здольна нас шмат чаму навучыць. Краіна адчувае вялікую патрэбу ў якасных угнаеннях, і адна з нашых кампаній падрыхтавала ўжо канкрэтны запыт і спецыфікацыю для беларускіх вытворцаў".

Бакі дамовіліся аб стварэнні сумеснай рабочай групы для дэталёвай прапрацоўкі прапаноў і фарміравання плана сумесных дзеянняў. Гэта дасць магчымаць сістэмна рэалізаваць палажэнні міжведамаснага мемарандума аб узаемаразуменні, падпісанага ў мінулым годзе.

Перспектыўнымі напрамкамі супрацоўніцтва вызначаны: пастаўкі беларускіх угнаенняў і тэхнікі, абмен агранамічнымі тэхналогіямі, развіццё адукацыйных праграм і наладжванне прамых кантактаў паміж экспарцёрамі і імпарцёрамі дзвюх краін.

Бакі выказалі ўпэўненасць, што сумесныя намаганні забяспечаць дынамічнае развіццё ўзаемавыгаднага партнёрства ў АПК.

версія для друку

зрабіць стартавай

дабавіць у выбранае