Бізнес-навіны

Міністр падкрэсліў, што, калі прадукцыя перапрацоўваецца на тэрыторыі Беларусі, а потым пастаўляецца ў Расію, - гэта не рээкспарт. "Рыба перапрацоўваецца ў Беларусі і экспартуецца не толькі ў Расію, але і ў Еўропу. Я бачыў і ў ААЭ гэту прадукцыю, таму гэта нармальная з'ява. Мы дамовіліся аб гэтым з нашымі расійскімі партнёрамі, што гэта не будзе з'яўляцца парушэннем тых санкцыйных мер у адказ, якія Расія ўвяла адносна Еўропы. Больш таго, цяпер мы вядзём размову аб тым, каб стварыць такое паняцце, як "тавар Саюзнай дзяржавы". У такім выпадку нам было б прасцей, можа, пазбягаць нейкіх санкцыйных мер з боку трэціх бакоў", - сказаў Уладзімір Макей.

Ён таксама адзначыў, што ўзаемныя санцыі паміж РФ і ЕС ударылі і па эканоміцы Беларусі. "Магчыма, імпарт некаторых тавараў у Беларусі вырас. Але мы дамовіліся з нашымі расійскімі партнёрамі, што калі гэтыя тавары будуць перапрацоўвацца на тэрыторыі Беларусі і ў іх будзе прыўносіцца дабаўленая вартасць, то яны могуць паступаць і на рынак Расіі. Я не выключаю, што, магчыма, нейкія асобныя нядобрасумленныя суб'екты гаспадарання злоўжываюць гэтым і займаюцца рээкспартам. Але ўлады Беларусі, як і ўлады Расіі, рашуча змагаюцца з гэтым злом", - падкрэсліў кіраўнік МЗС.

Акрамя таго, міністр адзначыў: "У нас наладжаны актыўны і аператыўны абмен інфармацыяй па лініі мытных органаў. Дзеючых мытных пастоў на знешнім перыметры нашай граніцы хапае. І мы ведаем, што калі ў нашых расійскіх партнёраў узнікалі нейкія апасенні, то яны дзесьці на нейкіх асноўных трасах выстаўлялі адпаведныя пасты і канфіскоўвалі адпаведную прадукцыю, якая, з пункту гледжання нашых расійскіх сяброў, была ўвезена на тэрыторыю Расіі з парушэннем адпаведных правіл".

"Разам з тым мы павінны хутчэй сумесна падумаць над тым, як нам павялічыць тавараабарот паміж нашымі краінамі, таму што гэта было б на карысць і расійскай, і беларускай эканомікам, і, галоўнае, на карысць людзям", - лічыць Уладзімір Макей.

Таксама ён адказаў і на пытанне аб магчымых рызыках для эканомікі Беларусі ў сувязі з далучэннем Казахстана да СГА. "Вядома, мы бачым рызыкі, таму што па 3 тыс. пазіцый узровень мытнай абароны ў адпаведнасці з абавязацельствамі, якія прыняў на сябе Казахстан, значна ніжэйшыя, чым гэта было прынята ў рамках ЕАЭС. Так, у Казахстан можа імпартавацца тэхніка, якая раней паступала ў краіны ЕАЭС з Беларусі, а цяпер гэта тэхніка можа паступаць і ў Расію і замяшчаць тыя тавары, якія раней накіроўвала Беларусь. Зразумела, мы бачым для сябе гэтыя рызыкі і будзем прымаць адэкватныя меры рэагавання, выбудоўваючы адпаведныя ўзроўні мытнай абароны з нашага боку ад тых тавараў, якія могуць паступіць на рынак ЕАЭС праз Казахстан. Дарэчы, тут мы дзейнічаем разам з нашымі партнёрамі з Расіі, Арменіі і Кыргызстана", - сказаў міністр.