Падзеі, факты, анонсы

Каляндар падзей у Беларусі: ЛIПЕНЬ 2023

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

Летні музычна-турыстычны сезон у Мінску

У гістарычным цэнтры Мінска – Верхнім горадзе, на тэрыторыі Траецкага і Ракаўскага прадмесцяў – 13 мая стартуе летні музычна-турыстычны сезон, які прадоўжыцца да верасня. Важнай асаблівасцю гэтага года стане правядзенне Дзён культуры гарадоў-пабрацімаў беларускай сталіцы, у ліку якіх Санкт-Пецярбург, Калуга, Ніжні Ноўгарад, Новасібірск і іншыя. Сумесна з пасольствам КНР і артыстамі з Паднябеснай 27 мая на пляцоўцы "Верхні горад" пройдзе маштабнае культурнае мерапрыемства "Свет чаю". Арганізатары абяцаюць, што ў сезоне-2023 прадоўжаць работу любімыя мінчанамі і гасцямі праекты. На адкрытай тэрыторыі атэля "Манастырскі" з 20.00 да 22.00 па суботах у рамках праекта "Тэатральны дворык" будуць праходзіць паказы студэнцкіх аматарскіх калектываў, а таксама выступленні прафесійных акцёраў тэатраў сталіцы. "Бібліятэка пад адкрытым небам" па суботах з 13.00 да 17.00 запрашае на інтэрактыўныя сустрэчы з пісьменнікамі для дзіцячай і дарослай аўдыторыі. З мая запрашае на канцэрт вулічных музыкантаў праект "Пешаходка".

Калі: 13 мая – верасень
Дзе: гістарычны цэнтр Мінска

Спартыўна-культурны фестываль "Вытокі. Крок да Алімпу"-2023

Любімы многімі беларусамі і гасцямі краіны спартыўна-культурны фестываль "Вытокі. Крок да Алімпу" адкрывае свой трэці сезон. Месцам старту выбраны "Горад металургаў" Жлобін. У пятніцу 19 мая адбудуцца вулічны мастацкі інтэрактыў "Гуляйце з намі – малюйце самі" ад сталічнай галерэі "АртХаос", а таксама вячэрнія паказы – мюзікла-прытчы Маладзёжнага тэатра эстрады "Як ноч стала дзяўчынай" і спартыўнай стужкі ў кінатэатры пад адкрытым небам. Асноўныя падзеі разгорнуцца ў суботу 20 мая. Гасцей чакаюць цырымонія адкрыцця, алімпійскі квест, займальныя пляцоўкі больш як па 25 відах спорту, фінал абласнога этапу новага інтэлектуальна-адукацыйнага праекта "Вытокі. Quiz", прэзентацыя калекцый адзення "Роднае-моднае" беларускіх прадпрыемстваў і дызайнераў. Акрамя таго, у трэцім сезоне культурная праграма прадстаўляе новы конкурс песеннага тэксту "Вершы пра галоўнае". Таксама ў рамках фестывалю журы вызначыць лепшых маладых выканаўцаў у вакальным конкурсе. Завершыць праграму вячэрні гала-канцэрт з удзелам папулярных артыстаў беларускай эстрады.

Калі, дзе:
19-20 мая – Жлобін
2-3 чэрвеня – Баранавічы
16-17 чэрвеня – Слонім
23-24 чэрвеня – Глыбокае
18-19 жніўня – Касцюковічы
25-26 жніўня – Барысаў

"Неверагодны атракцыён" у Белдзяржцырку

На летні перыяд Белдзяржцырк ператворыцца ў "Неверагодны атракцыён", дзе адбываюцца дзіўныя з'явы: "Кола агляду" становіцца захапляючым "Колам смеласці", а прывычны "Цір" – экстрэмальным "Кіданнем нажоў"! Толькі тут магчыма "немагчымае": кошкі выконваюць трукі ў паветры, а матацыкламі кіруюць мядзведзі, чалавек мацнейшы за аўтамабіль... У праграму новага шоу ўвайшлі такія нумары, як эквілібр на канаце, паветраная гімнастка на корд-дэ-парэлі, акрабатычная дарожка, гімнасты ў коле і на трапецыі, сілавы атлет. Таксама на манежы з'явяцца любімыя дзецьмі дрэсіраваныя мядзведзі, кошкі і поні.

Калі: 26 мая – 19 жніўня
Дзе: Беларускі дзяржаўны цырк, пр. Незалежнасці, 32, Мінск

Выстава "Аляксей Глебаў. Праслаўляючы чалавека" ў НММ

Выстава скульптара і педагога Аляксея Глебава ў НММ прымеркавана да юбілейнай даты – 115-годдзя з дня нараджэння народнага мастака БССР. Яго творчы шлях супаў па часе з фарміраваннем і станаўленнем беларускай скульптурнай школы. Творчая спадчына майстра – гэта манументальная пластыка, сюжэтна-тэматычныя кампазіцыі, камерныя станковыя творы і, вядома, выгадаваныя ім за дзясятак гадоў выкладання вучні-скульптары. Экспазіцыя ахоплівае мастацкія творы, створаныя ў 1940-я – 1960-я гады. Дапоўнілі яе жывапісны, скульптурны і графічныя партрэты Аляксея Глебава, аўтарамі якіх сталі калегі па творчым цэху, а таксама відэафільм і радыёперадача пра скульптара.

Калі: 16 чэрвеня – 13 жніўня
Дзе: Нацыянальны мастацкі музей Беларусі, вул. К. Маркса, 24, Мінск

Будслаўскі фэст-2023

Будслаўскі фестываль, гісторыя якога налічвае ўжо больш за чатыры стагоддзі, у 2018-м унесены ў спіс нематэрыяльнай культурнай спадчыны чалавецтва. У гонар 25-годдзя каранацыі цудадзейнага абраза Маці Божай Будслаўскай урачыстасці пройдуць пад дэвізам "Марыя – каралева Беларусі". Таксама чакаецца, што каталіцкі фэст наведае спецпасланнік Папы Рымскага архібіскуп Клаўдзіа Гуджэроці, які прыме ўдзел ва ўзнагароджанні ўдзельнікаў конкурсу "Марыя ў маім сэрцы" і ўзначаліць еўхарыстычную працэсію на другі дзень. Па традыцыі самым відовішчным стане вячэрні хрэсны ход са свечкамі і спісам Будслаўскага абраза Божай Маці.

Калі: 30 чэрвеня – 1 ліпеня
Дзе: касцёл Ушэсця Прасвятой Дзевы Марыі, Будслаў, Мядзельскі раён, Мінская вобласць

Фестываль экстрэмальных відаў спорту "ЭкстрымПрарыў-2023"

Трэці фестываль экстрэмальных відаў спорту "ЭкстрымПрарыў-2023" адкрыецца на галоўнай плошчы пасёлка Ушачы паказальнымі выступленнямі - дрыфтам на аўтамабілях, а потым перамесціцца ва Ушацкі раён, дзе адбудзецца ралі 3-й катэгорыі. Далей у праграме – першынство Беларусі па картынг-слаламе, выстаўка автамабіляў і квадрацыклаў, спаборніцтвы па эндура, сілавым экстрыме, трофі-рэйд на квадрацыклах, пазадарожніках, гонкі на катарах, паказальныя выступленні на водных матацыклах, спаборніцтвы па вейкбордзе і флайбордзе. Завершыцца экстрым-фэст узнагароджаннем пераможцаў і вячэрняй праграмай – лазерным шоу і выступленнем сучасных музычных груп.

Калі: 1-2 ліпеня
Дзе: ФАК "Юнацтва-Ушачы", г. п. Ушачы, пляж возера Вечалле, Віцебская вобласць

3 ліпеня – Дзень Незалежнасці Рэспублікі Беларусь (Дзень Рэспублікі)

Галоўнае нацыянальнае свята Беларусь адзначае 3 ліпеня – у гістарычны дзень вызвалення сталіцы ад нямецка-фашысцкіх захопнікаў у 1944-м. Ужо многія дзесяцігоддзі краіна помніць і шануе подзвіг пакаленняў, якія перажылі вайну і заваявалі Перамогу. У Год міру і стварэння гэтыя падзеі набываюць асаблівы сэнс і, безумоўна, стануць лейтматывам многіх мерапрыемстваў, прысвечаных Дню Незалежнасці. У гэты святочны дзень па ўсёй краіне пройдуць канцэрты, народныя гулянні, сямейныя фестывалі, выставы пад адкрытым небам... Увечары каля стэлы "Мінск – горад-герой" пачнецца вялікі святочны канцэрт "Формула міру", пасля якога адбудзецца традыцыйная акцыя "Спяём гімн разам". У 23:00 неба над Мінскім і гарадамі ўсіх абласцей краіны адначасова расквеціць святочны феерверк.

Калі: 3 ліпеня
Дзе: гарады краіны, музеі, турыстычныя комплексы

У Мінкульце расказалі аб святочных мерапрыемствах, якія пройдуць 3 ліпеня.

"Джаз у горадзе N": летні джазавы фестываль у Нясвіжы

Летні джазавы фестываль аб'яднае знатакоў музычных вечароў каля сцен былой рэзідэнцыі Радзівілаў. Упершыню гасцей чакае дзве канцэртныя праграмы – "Джаз уначы" і "У джазе толькі класіка" – у выкананні Нацыянальнага акадэмічнага канцэртнага аркестра Беларусі імя М.Я. Фінберга. І калі ў першы вечар прагучаць кампазіцыі легендарных джазавых аўтараў і выканаўцаў, то ў другі класічныя мелодыі ўвасобяцца ў джазавых рытмах свінга. Знаёмыя тэмы Людвіга ван Бетховена, балетныя мелодыі Пятра Чайкоўскага, вальсы Іагана Штрауса, сумны вальс Яна Сібеліуса, творы Эдварда Грыга, "Шахеразада" і "Палёт чмяля" Мікалая Рымскага-Корсакава, мелодыі Эніа Марыконэ паўстануць ва ўнікальным гучанні.

Калі: 7-8 ліпеня
Дзе: Нясвіжскі замак, вул. Замкавая, 2, Нясвіж, Мінская вобласць

Свята "Купалле" ("Александрыя збірае сяброў-2023")

Вялікае "Купалле" зноў збярэ на маляўнічым беразе Дняпра дзясяткі тысяч гасцей! У гэтым сезоне вячэрні гала-канцэрт адбудзецца ў фармаце народнага музычнага рынга – творчыя спаборніцтвы двух аграгарадкоў – Копысі і Александрыі. Паводле сюжэта, народныя персанажы Дзед і Баба паспрачаюцца, жыхары якога населенага пункта больш музыкальныя. У складзе гэтага гумарыстычнага дуэта на сцэну выйдуць акцёры Уладзімір Варанкоў і заслужаная артыстка Беларусі Вольга Няфёдава, а вось суддзямі творчага паядынку выступяць гледачы. Для гэтага ў кожнага з іх з'явіцца спецыяльны прадмет для галасавання – вялікая рука. У канцэрце выступяць калектывы Магілёўскай вобласці, удзельнікі тэлепраектаў "Фактар.by" і "Зорны шлях", Аляксандр Саладуха, Жанет, Алёна Ланская, Ірына Дарафеева, Руслан Аляхно, група "Аўра", ансамбль "Песняры", саліст групы "Зямляне" Сяргей Скачкоў, спявачка Зара, народная артыстка Расіі Надзея Кадышава. У цэлым, любімае ўсімі рэспубліканскае свята "Купалле" ("Александрыя збірае сяброў") будзе здзіўляць цікавымі лакацыямі, тэматычнымі пляцоўкамі і рознымі актыўнасцямі. Гасцей чакаюць авіяшоу, 2 км фуд-кортаў, канцэрт "Саюзныя зоркі ў гасцях у Александрыі". Завершыцца свята ўжо далёка за поўнач святломузычным паказам і маладзёжнай дыскатэкай "Купальскі мікс".

Калі: 8 ліпеня (з 11.00)
Дзе: аграгарадок Александрыя, Шклоўскі раён, Магілёўская вобласць

XXXII Міжнародны фестываль "Славянскі базар у Віцебску"

Самая чаканая падзея музычнага лета – "Славянскі базар у Віцебску" – аб'яднае гасцей з больш як 70 краін пад знакам сімвала фестывалю – васілька. Дэвіз вялікага свята ў горадзе Шагала нязменны: "Праз мастацтва – да міру і ўзаемаразумення". Чакаецца, што на сцэну абноўленага да 35-годдзя Летняга амфітэатра выйдуць больш за 5 тысяч артыстаў з амаль трох дзясяткаў краін! Як заўсёды, самымі інтрыгуючымі стануць два спаборніцкія музычныя марафоны "Славянскага базару". Беларусь на конкурсе маладых выканаўцаў прадставіць Самір Ёлчыеў (SAMIR) з Оршы, а ў дзіцячым спаборніцтве за перамогу будзе змагацца брастаўчанка Сафія Рустамава.

Сярод навінак-2023 - прэм'ера спектакля пра мастака Ілью Рэпіна ў Здраўнёве і тэатральная лабараторыя, дзе на працягу тыдня будуць выступаць і праводзіць майстар-класы выкладчыкі ГІЦІСа. Адметнасцю тэатральнай праграмы фестывалю-2023 стане акцэнт на музычнасць: госці ўбачаць паказ "Мы – цыганы" Маскоўскага музычна-драматычнага цыганскага тэатра "Рамэн", мюзікл "Гур'янаў" Маладзёжнага тэатра эстрады, спектакль "Вішнёвы SAD" ад "ТрыТфармаТа", рок-оперу "Граф Монтэ-Крыста" ад тэатра імя М. Горкага. Таксама на сцэну вернецца КВЗ, і праз 4 гады яго прыхільнікі змогуць пабалець за любімую каманду ў зале гледачоў. У дні форуму ў горадзе разгорнецца лялечны квартал у Беларускім тэатры "Лялька" і вулічныя пляцоўкі фэсту "На сямі вятрах".

На сцэне Віцебскай абласной філармоніі пройдуць чатыры канцэрты: Grand Melody Orchestra пад кіраўніцтвам Аляксандра Якаўлева прадставіць сваю праграму 12 ліпеня, 14 ліпеня будзе ззяць выканаўца народнай песні Алёна Пятроўская, 15 ліпеня зачаруе іспанскім каларытам і фламенка Barcelona Guitar Trio and Dance, а 16 ліпеня адбудзецца оперны канцэрт у выкананні артыстаў Вялікага тэатра Беларусі.

Галоўная фестывальная пляцоўка - Летні амфітэатр - прыме цырымоніі адкрыцця і закрыцця, Дзень Саюзнай дзяржавы, рэтра-праграму "Залаты Хіт", гала-канцэрт "Зоркі рускага радыё", КВЗ-канцэрт з удзелам каманд вышэйшай лігі КВЗ розных гадоў, гала-канцэрт "Шансон ТБ – УСЕ ЗОРКІ", а таксама сольныя канцэрты Сяргея Лазарава, Уладзіміра Праснякова, Дзмітрыя Малікава, Стаса П'ехі.

Калі: 13–16 ліпеня
Дзе: Летні амфітэатр, канцэртная зала "Віцебск", Віцебская абласная філармонія, Віцебск

III Міжнародны фестываль гістарычнай рэканструкцыі "Легендарныя эпохі"

Фестываль гістарычнай рэканструкцыі "Легендарныя эпохі" ўсяго за два гады набраў абороты і ўжо в 2022-м аб'яднаў каля 10 тысяч гасцей. У гэтым сезоне лакацыя застаецца ранейшай – поле каля старога млына ў Зэльве, дзе гледачам абяцаюць сапраўды займальнае дзейства. Сотні рэканструктараў узновяць чатыры гістарычныя эпохі і іх галоўныя падзеі: прыход вікінгаў, сярэдневяковае рыцарства, процістаянне з арміяй Напалеона і баі Вялікай Айчыннай вайны. На галоўнай пляцоўцы разгорнуцца масавыя бітвы і адзінкавыя паядынкі, конныя турніры і тактычныя манеўры. Дапоўняць праграму інтэрактыўныя зоны і забавы - лучныя і арбалетныя ціры, сярэдневяковыя гульні, горад майстроў-рамеснікаў…

Калі: 15 ліпеня
Дзе: г. п. Зэльва, Гродзенская вобласць

"Летнія музычныя вечары ў Мірскім замку"-2023

"Летнія вечары ў Мірскім замку" ў ліпені прадоўжацца "Музычным шоу ў стылі Сан-Рэма" ў выкананні артыстаў Беларускага дзяржаўнага акадэмічнага музычнага тэатра. У антуражы легендарнага замкавага комплексу пад адкрытым небам арганізатары ўзновяць атмасферу італьянскага курортнага горада, дзе кожны год праходзіць сусветна вядомы музычны фестываль. Менавіта на яго сцэне пачалі ззяць такія зоркі як Тота Кутуньа, Адрыяна Чэлентана, Рыкарда Фольі, Аль Бана, Раміна Паўэр, група Ricchi e Poveri… Госці шоу зробяць настальгічнае падарожжа ў цудоўны свет эстрады 1980-х пад знакамітыя шлягеры фестывалю ў выкананні вядучых салістаў тэатра і сімфанічнага аркестра.

Калі: 15 ліпеня, 21.00
Дзе: Мірскі замак, г. п. Мір, Карэліцкі раён, Гродзенская вобласць

Фестываль ваенна-гістарычнай рэканструкцыі "Наш Грунвальд"-2023

Буйнейшы фестываль ваенна-гістарычнай рэканструкцыі адзначыць 613-годдзе легендарнай Грунвальдскай бітвы. Госці ўбачаць займальную рэканструкцыю легендарнай бітвы з Тэўтонскім ордэнам, перамога над якім зрабіла Вялікае Княства Літоўскае адной з самых магутных і ўплывовых дзяржаў сярэдневяковай Еўропы. Гледачоў чакае насычаная праграма: рыцарскія турніры, масавыя пешыя і конныя бітвы, турніры лучнікаў і алебардыстаў, выступленні танцавальных і тэатральных калектываў, канцэрт сярэдневяковай музыкі, а таксама розныя сярэдневяковыя забавы, кірмаш і майстар-класы ад народных умельцаў…

Калі: 22- 23 ліпеня
Дзе: музейны комплекс старадаўніх народных рамёстваў і тэхналогій "Дудуткі", в. Пціч, Пухавіцкі раён, Мінская вобласць

ХI Міжнароднае свята "Вішнёвы фестываль"

Старадаўні горад у самым цэнтры беларускага Паазер'я, "вішнёвая сталіца Беларусі" – Глыбокае – запрашае на традыцыйны ліпеньскі фестываль. За больш як дзесяць гадоў гэта смачнае свята паспела стаць культурным і гастранамічным брэндам Віцебскага рэгіёна. Кожны год летам край літаральна патанае ў вішнёвым цвеце і духмянай ягадзе. А ўсё дзякуючы мясцоваму селекцыянеру Баляславу Лапыру, які ў другой палове ХХ стагоддзя вывеў новыя, больш устойлівыя да халадоў сарты вішні і дзяліўся імі з жыхарамі акругі. Госці прымуць удзел у тэатралізаваным шэсці і шматлікіх "вішнёвых" забавах (конкурсах песень і танцаў, фота і малюнкаў, прычосак), выберуць "вішнёвую прынцэсу" і, вядома, ацэняць смак глыбоцкіх ягад на вішнёвым кірмашы.

Калі: 22–24 ліпеня
Дзе: Глыбокае, Віцебская вобласць

ХII Музычны фестываль "Вялікая бард-рыбалка"

Дэвіз "Юшкі і песень хопіць усім" збярэ на беразе Чыгірынскага вадасховішча аматараў рыбалкі і бардаўскай музыкі з розных краін. Свята стартуе з конкурсу аўтарскай песні і паэзіі "Сваё асяроддзе", кастынгу конкурсу "Каралева бард-рыбалкі", цырымоніі закладкі валуноў у бард-сцежку, прадоўжыцца вячэрнімі канцэртамі фолк-праекта "Папараць", праекта "Станцыя Сібір", Вячаслава Корсы (Клімовіча) & band, аўтарскага рока. У другі дзень адбудуцца спаборніцтвы па рыбнай лоўлі, турнір па пляжным валейболе, конкурс па прыгатаванні юшкі і рыбных страў, фінал конкурсу "Каралева бард-рыбалкі", канцэрт "Разам весела крочыць...", сольныя канцэрты Вольгі Чыкінай, Сяргея Мацвіенкі, Ірыны Сурынай, канцэрт - прэзентацыя праекта "Песні нашага асяроддзя".

Калі: 28–30 ліпеня
Дзе: Чыгірынскае вадасховішча, в. Чачэвічы, Быхаўскі раён, Магілёўская вобласць

Дзень горада Брэста

1004 гады споўніцца знакамітаму гораду-фарпосту, вядомаму на ўвесь свет гераічнай абаронай Брэсцкай крэпасці ў чэрвені 1941-га. Па традыцыі свята адзначаюць 28 ліпеня ў памяць аб падзеях 1944-га, калі Брэст быў вызвалены ад нямецкай акупацыі войскамі 1-га Беларускага фронту. Праграма мерапрыемстваў свята будзе насычанай і ахопіць галоўныя пляцоўкі горада, у тым ліку самыя любімыя жыхарамі і турыстамі лакацыі. Вечарам 29 ліпеня адбудзецца канцэрт спевака, кампазітара і тэлевядучага – ураджэнца Брэста Ігара Карнелюка.

Калі: 28–30 ліпеня
Дзе: мемарыяльны комплекс "Брэсцкая крэпасць-герой", вул. Савецкая, набярэжная Ф. Скарыны, пляцоўкі каля лёгкаатлетычнага манежа, Палаца водных відаў спорту, Лядовага палаца, Брэст

VIVA BRASLAV 2023

Адзін з буйнейшых open air фестываляў Viva Braslav запрашае наведаць край маляўнічых азёр, які за незвычайную прыгажосць называюць "блакітнымі каралямі" Беларусі. Усяго за 10 гадоў фестываль вырас у двухдзённы, з'явілася інфраструктура, павялічылася колькасць актыўнасцей, фуд-кортаў. А ў мінулым сезоне яго наведалі амаль 32 тысячы чалавек! У праграму традыцыйна ўваходзяць пляжныя актыўнасці – спаборніцтвы па валейболе, футболе, крос-кантры. І зразумела, самае галоўнае – музычная частка! Выступленні беларускіх і замежных груп, DJ розных напрамкаў доўжацца да самага світання.

Калі: 28-29 ліпеня
Дзе: Браслаў, Віцебская вобласць

Х этнасвята "У госці да радзімічаў"

Этнасвята "У госці да радзімічаў" праходзіць з 2014 года на пляцоўцы Замкавішча аграгарадка Радамля. Яно  прысвечана падзеям эпохі ранняга Сярэдневякоўя і звязана з культурай і побытам племені радзімічаў, якія тысячу гадоў таму пражывалі на гэтай тэрыторыі. Тут жа заснаваны музей пад адкрытым небам, дзе можна ўбачыць паўзямлянкі – традыцыйнае жыллё радзімічаў, капішчы славянскіх багоў, створаныя майстрамі Магілёўскай вобласці, вароты для атрымання жывога агню, вулічная печка для абпалу керамічных вырабаў. На свяце можна ўбачыць старадаўнія абрады радзімічаў, дзействы, звязаныя з побытам старадаўняга племені, паўдзельнічаць у майстар-класах па сярэдневяковых і бытавых танцах, традыцыйных рамёствах.

Калі: 29 ліпеня
Дзе: аграгарадок Радамля, Чавускі раён, Магілёўская вобласць

Vulitsa Ezha: летні сезон-2023 у Мінску

Vulitsa Ezha 2023 прадстаўляе адразу чатыры фестывалі. Першы стартаваў у маі на ўтульнай гастранамічнай пляцоўцы "ЛЕПшая вуліца", якая адкрылася для наведвальнікаў у мінулым годзе. Наступныя тры адбудуцца ў засені дрэў Батанічнага саду. У праграме – майстар-класы, інтэрактывы, дэгустацыі, жывая музыка і танцы пад адкрытым небам пад рытмы розных стыляў. Зразумела, месцам прыцягнення застанецца вялікі фуд-корт з вулічнай ежай – традыцыйнай і арыгінальнай аўтарскай.

Калі: 22–23 ліпеня, 2–3 верасня
Дзе: Цэнтральны батанічны сад НАН Беларусі, вул. Сурганава, 2в, Мінск

Выстава "Мэтры мастацкага алімпу: Хаім Суцін і Марк Шагал" у Мінску

Ураджэнцы Беларусі Хаім Суцін і Марк Шагал – мастакі ХХ стагоддзя, прадстаўнікі знакамітай Парыжскай школы – сталі героямі работ Алега Папельскага, створаных ва ўнікальнай тэхналогіі з выкарыстаннем натуральных камянёў. Прадстаўленыя ў розных камбінацыях камянёў карціны з'яўляюцца амажамі (hommage), што ў перакладзе з французскага абазначае даніну творчасці мастака. Цыкл "Дарога ў вечнасць" расказвае аб жыццёвых перыпетыях Хаіма Суціна, яго дзяцінстве ў родных Смілавічах, іўдзейскіх традыцыях, абрадах і ўкладзе сям'і. Другі цыкл – "Ля цёплага дома душы" – прысвечаны творчасці Марка Шагала, дзе галоўным элементам з'яўляецца сінагога, а дапаўняюць кампазіцыю персанажы работ майстра – жыхары роднага яму горада Віцебска.

Калі: да 1 кастрычніка
Дзе: Музей гісторыі горада Мінска, вул. Ракаўская, 17, Мінск