Падзеі, факты, анонсы

Каляндар падзей у Беларусі: КРАСАВIК 2023

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

"Рытмы Афрыкі" ў Белдзяржцырку

Экзатычная праграма стартуе 4 лютага ў Белдзяржцырку: на гэты раз з зімовага Мінска гледачы перанясуцца ў самае сэрца гарачага афрыканскага кантынента! Гасцям трэба будзе зрабіць падарожжа ў новыя краіны, пазнаёміцца з карэннымі жыхарамі, даведацца аб іх талентах, здольнасцях, захапленнях і асаблівасцях жыцця ў гарачым клімаце. Выканаўцы праграмных нумароў - пераможцы прэстыжных цыркавых фестываляў і конкурсаў у Монтэ-Карла (Манака), Іспаніі, Францыі, краінах Лацінскай Амерыкі. У шоу "Рытмы Афрыкі" на мінскі манеж выйдуць акрабаты на вярблюдах, паветраныя гімнасты на мачце і рамянях, жанглёры, акрабаты ў кольцах, клоўны, а таксама стракатыя папугаі, дрэсіраваныя буйвалы... і нават мядзведзь!

Калі: 4 лютага - 23 красавіка
Дзе: Беларускі дзяржаўны цырк, пр. Незалежнасці, 32, Мінск

Выстава "Штучны інтэлект: мастак ці машына?" у НЦСМ

Упершыню ў Беларусі жыхары і госці сталіцы змогуць наведаць выставу мастацкіх твораў, цалкам створаных з дапамогай тэхналогій будучыні. У інавацыйную экспазіцыю ўвайшлі больш за 90 работ у 10 катэгорыях, што ахопліваюць такія аспекты светабудовы, як прырода, міфалогія, гісторыя, архітэктура... Кульмінацыяй праекта стане імерсіўны фільм Digital evolution ("Лічбавая эвалюцыя"), які ўяўляе сабой вобразнае пераасэнсаванне свету ідэй і свету матэрыі, вольнае мастацкае разважанне аб развіцці і эвалюцыі. Для займальнага азнаямлення з экспазіцыяй арганізатары стварылі тэматычны квест, а аматараў інста-эстэтыкі ў прасторы выставы чакаюць незвычайныя фотазоны.

Калі: 4 лютага - 9 красавіка
Дзе: Нацыянальны цэнтр сучасных мастацтваў, пр. Незалежнасці, 47, Мінск

"Свята льну. Роднае Моднае": фестываль ільну ў Мінску

Лён з'яўляецца адным з самых пазнаваемых сімвалаў Беларусі, а яго блакітныя кветкі ёсць на дзяржаўным гербе. Рэспубліка ўваходзіць у сусветную дзясятку буйнейшых краін-вытворцаў ільнянога валакна. Лён-даўгунец вырошчваюць у 36 раёнах краіны, а пасяўная плошча лёну ў 2022 годзе, паводле даных статыстыкі, склала 44,3 тыс. га. А ў 2023-м у сталіцы ўпершыню правядуць маштабны фестываль ільну, дзе прадставяць навінкі да летняга сезона-2023 ад беларускіх ільнокамбінатаў і вядомых брэндаў лёгкай прамысловасці. "Свята льну. Роднае Моднае" стане працягам праекта "РОДНАЕ МОДНАЕ", які быў прэзентаваны ў 6 гарадах Беларусі ў рамках другога сезона рэспубліканскага фестывалю "Вытокі. Крок да Алімпу", а таксама на пляцоўцы міжнароднай выставы-кірмашу лёгкай прамысловасці BelTexIndustry-2022. У час свята падвядуць вынікі конкурсу сярод дызайнераў адзення, мастакоў па тканінах, аўтараў арт-аб'ектаў з ільну. Таксама ў праграме фестывалю - навучальныя семінары, майстар-класы, выставы і дэгустацыі.

Калі: 30 сакавіка - 1 красавіка
Дзе: Нацыянальны алімпійскі стадыён "Дынама", вул. Кірава, 8, Мінск

XXXV Міжнародны фестываль старадаўняй і сучаснай камернай музыкі

Пад купалам полацкай Сафіі адзначыць 35-годдзе адзін з самых незвычайных фестываляў Беларусі. Знатакоў старадаўняй і сучаснай музыкі чакае арыгінальная праграма. Вечарам 7 красавіка накідаюць "Парыжскія эскізы" музыканты з фартэпіяннага трыа CON ANIMA пад мелодыі К.Дэбюсі, Ж.Тайфера і Ф.Габера. 9 красавіка прадоўжыць серыю канцэрт Ave Maria пры ўдзеле арганісткі Ксеніі Пагарэлай і салісткі Тамары Рэмез. 13 красавіка выступіць камерны аркестр музычнай капэлы "Санорус". 16 красавіка слухачоў чакае "Велікодны перазвон" у выкананні арганісткі Валянціны Майсцер, а таксама салістаў Марыі Літке (сапрана) і Вячаслава Лебедзева (валторна). Завершыцца форум канцэртам духоўнай музыкі ад харавой капэлы імя Р.Шырмы, прысвечаным 150-годдзю "моцнага мастака фартэпіяна" – Сяргея Рахманінава.

Калі: 21 сакавіка – 20 красавіка
Дзе: Сафійскі сабор, вул. Замкавая, 1, Полацк

Выстава "Хатынь. Да 80-годдзя трагедыі" ў НММ

Гэта трагедыя здарылася 80 гадоў таму: 22 сакавіка 1943 года нацысцкія карнікі разрабавалі і спалілі дашчэнту беларускую вёску Хатынь разам з усімі яе жыхарамі. У агні загінулі 149 чалавек, 75 з іх былі дзеці да 16 гадоў. Але лёс Хатыні стаў далёка не адзінай жудаснай старонкай у гісторыі беларускага народа. За перыяд акупацыі 1941–1944 гадоў больш за 600 вёсак былі спалены разам з насельніцтвам, і 216 з іх не адрадзіліся з попелу. Мемарыял у Хатыні ператварыўся ў сімвал смутку аб ахвярах гітлераўскага генацыду часоў Вялікай Айчыннай вайны – спаленых вёсках, бязвінна загінулых мірных людзях – жанчынах, старых, дзецях…

У экспазіцыю, прысвечаную Дню памяці трагедыі Хатыні, увайшлі больш за 30 твораў з цэлага летапісу на ваенную тэму, створанага трыма пакаленнямі беларускіх мастакоў. Сярод іх – манументальная серыя каляровых літаграфій "Памяці вогненных вёсак" (1979–1985) народнага мастака Беларусі прафесара Васіля Шаранговіча, замалёўкі ваенных будняў мастака-франтавіка Барыса Малкіна "Па слядах вайны" (1942–1944), афорты серыі "Старая Рудзіца" (1982) Анатоля Александровіча, маляўнічы дыптых "Вогненная вёска" (1984) Рыгора Таболіча, цыкл "Хатынь" (2022) Усевалада Швайбы, творы графікі аўтараў мемарыяльнага комплексу "Хатынь" – архітэктараў Леаніда Левіна, Юрыя Градава і Валянціна Занковіча.

Калі: 22 сакавіка – 24 красавіка
Дзе: Нацыянальны мастацкі музей Беларусі, вул. Леніна, 20, Мінск

"Музыка без меж. Да 150-годдзя Сяргея Рахманінава" ў Вялікім тэатры Беларусі

1 красавіка спаўняецца 150 гадоў з дня нараджэння Сяргея Рахманінава – выдатнага кампазітара, піяніста, дырыжора XIX стагоддзя. Яго музыка стала сімвалам цэлай эпохі, узяўшы многія дасягненні імпрэсіянізму і авангарда, і ўвасобіла выказванне маэстра аб тым, што яна перш за ўсё "павінна быць любімая, павінна ісці ад сэрца і быць звернута да сэрца". Акрамя юбілею самога кампазітара, вясной 2023-га спаўняецца 130 гадоў з дня прэм'еры першай оперы – "Алека", 115 гадоў Сімфоніі №2. У аснове юбілейнага канцэрта – Другая сімфонія ў выкананні сімфанічнага аркестра Вялікага тэатра Беларусі пад кіраўніцтвам маэстра Аляксея Багарада (Масква). Таксама ў праграме вечара прагучаць фрагменты оперы "Алека", класічныя рускія рамансы С.Рахманінава, П.Чайкоўскага, музыка М.Глінкі і Г.Свірыдава. Салісты вечара – народныя артысты Беларусі Настасся Масквіна і Уладзімір Громаў, лаўрэат міжнародных конкурсаў Настасся Міхнавец, народная артыстка Беларусі Ірына Яромкіна, лаўрэат міжнародных конкурсаў Вераніка Грабоўская (арфа).

Калі: 1 красавіка
Дзе: Вялікі тэатр Беларусі, пл. Парыжскай Камуны, 1, Мінск

Міжнародная вясенняя выстаўка турысцкіх паслуг "АДПАЧЫНАК-2023"

25-я па ліку вясенняя выстаўка турысцкіх паслуг "АДПАЧЫНАК" збярэ галоўных ігракоў рынку на адной з буйнейшых пляцовак сталіцы. Падзейны і індустрыяльны, медыцынскі і гастранамічны, экстрэмальны і спартыўны турызм, транспартная даступнасць і бяспека падарожжаў, адукацыя і падрыхтоўка кадраў, digital-тэхналогіі і новыя турыстычныя брэнды – усё гэта ў фокусе ўвагі бягучага года. За тры выставачныя дні турыстычны патэнцыял, новыя праграмы і прапановы прадэманструюць больш за 100 экспанентаў, сярод якіх тураператары, санаторыі, аграсядзібы, медыцынскія і SPA-цэнтры, атэлі, гасцініцы і загарадныя комплексы, а таксама страхавыя і транспартныя кампаніі. Наведвальнікі змогуць азнаёміцца з актуальнымі travel-прапановамі беларускіх турфірм па розных напрамках пляжнага, санаторна-курортнага, гарналыжнага, рэлігійнага, прамысловага турызму.

Калі: 13–15 красавіка
Дзе: Нацыянальны выставачны цэнтр "БелЭкспа", пр. Пераможцаў, 14, Мінск

Прэм'ера ў Вялікім тэатры: балет "Дон Кіхот"

Адзін з самых папулярных балетаў у сусветным рэпертуары – "Дон Кіхот" – зачароўвае тэмпераментнымі іспанскімі танцамі і каларытнымі сцэнамі з Сервантэса. На галоўнай сцэне Беларусі спектакль Людвіга Мінкуса – а шэдэўру ўжо больш за 150 гадоў! – вытрымаў шэсць рэдакцый. У ім удзельнічалі легендарныя артысты Сямён Дрэчын, Тамара Караваева, Аляксандра Нікалаева, Валерый Міронаў... Пасля абнаўлення гісторыя закаханых Кітры і Базіля вернецца ў новых касцюмах і дэкарацыях, парадуе знатакоў перапляценнямі харэаграфіі М.Петыпа, А.Горскага, К.Галяйзоўскага, В.Елізар'ева. Галоўныя ролі выканаюць Людміла Хітрова, Ірына Яромкіна, Вікторыя Трэнкіна, Аліна Рудэнка, Канстанцін Геронік, Дзмітрый Уксуснікаў, Канстанцін Белахвосцік, Аляксандр Місіюк.

Калі: 16 і 17 красавіка
Дзе: Вялікі тэатр Беларусі, пл. Парыжскай Камуны, 1, Мінск

Вясенні абрадавы карагод "Стрылка"

Вясенні абрад "Стрылка", унесены ў спіс гісторыка-культурных каштоўнасцей Беларусі, атрымаў такую назву дзякуючы свайму падабенству з цецівой лука. Традыцыйна яго праводзяць у храме Святой Тройцы ў Бездзежы, а затым – у сялянскім падворку музея "Бездзежскі фартушок". Сам абрад уяўляе сабой карагод, які сімвалізуе завяршэнне Вялікага посту і прыход доўгачаканай вясны, таму яго правядзенне супадае з адным з галоўных свят праваслаўнага календара – Вялікаднем. Удзельнічаюць у ім толькі жанчыны і дзяўчаты: "заводзяць" песню і вядуць карагод старэйшыны, а ў цэнтры размяшчаюцца "зярняткі" – дзяўчынкі ад 4 да 14 гадоў, якія разбіваюцца на групкі па тры і ў самім абрадзе сімвалізуюць будучы ўраджай. Карагод у сваім руху па крузе нагадвае стрэлку гадзінніка, што ў хрысціянскай традыцыі азначае імклівы бег часу і нябачную сувязь з памерлымі продкамі.

Калі: 16 красавіка
Дзе: аграгарадок Бездзеж, Драгічынскі раён, Брэсцкая вобласць

Велікодны абрад "Ваджэнне Сулы"

На другі дзень пасля Уваскрэсення Хрыстовага ў дзвюх вёсках Гомельскага раёна – Гадзічава і Маркавічы – праводзіцца самабытны народны абрад "Ваджэнне Сулы", адроджаны ў 2007 годзе. Сула – гэта святочная працэсія мясцовых жыхароў (а зарадзіўся абрад на тэрыторыі Усходняга Палесся), прысвечаная праводзінам вясны і пачатку лета, а разам з ім і ворных работ. Згодна з павер'ямі, абрад забяспечвае шчодры ўраджай і абараняе ад хвароб і прыродных стыхій, асабліва ад маланак-стрэл, таму абрад ведаюць і пад назвай "Ваджэнне Стралы". Яго ўдзельніцы – жанчыны і маладыя дзяўчаты – пасля службы ў Свята-Екацярынінскай царкве ў вёсцы Гадзічава адпраўляюцца на поле і водзяць карагоды, якія "заклікаюць" да ўрадлівасці нівы. Пасля гэтага, напяваючы абрадавыя песні, яны адпраўляюцца ў Маркавічы, дзе абрад завяршаецца народнымі гуляннямі жыхароў вёсак і велікодным пачастункам.

Калі: 17 красавіка
Дзе: вёскі Гадзічава і Маркавічы, Гомельскі раён

XXIX Міжнародны форум па інфармацыйна-камунікацыйных тэхналогіях ТІБО

"ТІБО" – буйнейшая падзея ў галіне інфармацыйна-камунікацыйных тэхналогій у Беларусі. У рамках форуму айчынныя і замежныя эксперты, прадстаўнікі дзяржструктур і бізнес-супольнасці прааналізуюць глабальныя тэндэнцыі развіцця ІКТ, прадставяць інавацыйныя распрацоўкі ў сферы інфармацыйных тэхналогій, магчымасці іх эфектыўнага прымянення ў розных сферах дзейнасці. У дзелавую праграму ўвайшлі такія мерапрыемствы, як V Еўразійскі лічбавы форум (EADF), III Форум "Лічбавая эканоміка" (DEF), VI Беларускі ІКТ Саміт (ICT Summit), V Міжнародная канферэнцыя "Кадры для лічбавай трансфармацыі", III Міжнародная канферэнцыя "Лічбавыя тэхналогіі і рашэнні для развіцця "разумных рэгіёнаў/гарадоў", круглы стол "Мадэлі і метады эфектыўнага кіравання лічбавым развіццём". У дні форуму падвядуць вынікі 20-й "Інтэрнэт-прэміі "ТІБО", адбудзецца конкурс стартапаў Belarus ICT Startup Award, адборачны этап VI Міжнароднай Scratch-Алімпіяды па крэатыўным праграмаванні сярод школьнікаў, STEM-спаборніцтвы па робататэхніцы "Кубак РТК-Мінск" і "Кубак РТК-Беларусь".

Калі: 18–21 красавіка
Дзе: "Мінск-Арэна", пр. Пераможцаў, 111, Мінск

Свята пісанкі ў Сапоцкіне

Свята пісанкі, якое ўжо стала візітнай карткай пасёлка Сапоцкін, 7-ы раз запрашае гасцей наведаць яркі вясенні фэст і атрымаць асалоду ад яго творчай атмасферы, даведацца больш пра беларускія народныя традыцыі ў роспісе велікодных яек. Мясцовая тэхналогія вырабу велікодных яек – пісанак – унесена ў спіс гісторыка-культурных каштоўнасцей Беларусі як элемент нематэрыяльнай спадчыны. У Сапоцкіне можна наведаць Музей пісанкі, дзе сабрана больш за 1500 яек, дэкарыраваных у розных тэхніках, паўдзельнічаць у майстар-класах па роспісе велікодных яек, паслухаць старадаўнія песні ў выкананні творчых калектываў Гродзенскага раёна.

Калі: 23 красавіка
Дзе: вул. Гродзенская, 17, г.п. Сапоцкін, Гродзенская вобласць