ГРОДНА: акунуцца ў навагоднюю атмасферу на вуліцах вельмі прыгожага і зусім не падобнага да іншых – каралеўскага – горада Беларусі
Гродна – сапраўды асаблівы горад. Архітэктурны запаведнік, дзе захаваліся вялікія кварталы старадаўняй забудовы, адзіная каралеўская рэзідэнцыя з двума ўцалелымі замкамі, самы шматнацыянальны цэнтр, які збярог найбольшую колькасць храмаў розных рэлігій. Сярод яго ўнікальных выдатных мясцін – старадаўняя і да гэтага часу дзеючая Каложская царква, першыя ў краіне аптэка, медыцынская акадэмія, батанічны сад, заапарк, самы стары вежавы гадзіннік Еўропы. У наваколлі горада пралягае Аўгустоўскі канал, які ўваходзіць у спіс самых буйных і старых гідратэхнічных збудаванняў Еўропы. Гродна захапляе ў любую пару года, а ўжо на Каляды і Новы год здзівіць абавязкова. З восені 2016 года прыехаць сюды на некалькі дзён можна без візы.