Падзеі

У Мінабароны адзначылі неабходнасць развіваць адносіны з краінамі Афрыкі ў абароннай сферы

12 верасня, Мінск /Кар. БЕЛТА/. Беларусь развівае адносіны з краінамі Афрыкі ва ўсіх сферах, у тым ліку абароннай. Аб гэтым заявіў начальнік Дэпартамента міжнароднага ваеннага супрацоўніцтва - памочнік міністра абароны па пытаннях міжнароднага ваеннага супрацоўніцтва Валерый Равенка, перадае карэспандэнт БЕЛТА.

У Цэнтральным доме афіцэраў для дэлегацыі аташэ па пытаннях абароны 14 дзяржаў Афрыкі, якія з рабочым візітам наведваюць Беларусь, праходзіць брыфінг Валерыя Равенкі. Тэма брыфінгу - "Міжнароднае ваеннае супрацоўніцтва і ваенна-палітычная абстаноўка ўздоўж граніц Рэспублікі Беларусь".

Валерый Равенка прывітаў аташэ па пытаннях абароны краін Афрыкі ад імя міністра абароны Беларусі. Ён падкрэсліў, што развіццё адносін з краінамі Афрыкі мае вялікае значэнне. "Прэзідэнт Беларусі адзначае асаблівую ролю і месца Афрыкі ў сучасным свеце, развіццё якога немагчыма без гэтага кантынента", - сказаў Валерый Равенка.

Ён звярнуў увагу на неабходнасць і ў далейшым развіваць адносіны Беларусі і афрыканскіх краін ва ўсіх сферах, не выключаючы абаронную. "Мы рады, што ў вас атрымалася наведаць нашу краіну. Мы запрасілі вас, каб вы змаглі ўбачыць сапраўдную Беларусь", - звярнуўся да прысутных Валерый Равенка.

"У Афрыцы ёсць вялікі патэнцыял. І нам неабходна не толькі данесці да прадстаўнікоў краін Афрыканскага кантынента, што з сябе ўяўляе Беларусь, але і разгледзець, што мы можам зрабіць карыснага. Беларусь - мірная краіна, а ў нашага талерантнага народа няма такіх хвароб, як расавая нецярпімасць. Акрамя таго, у часы Савецкага Саюза ў нас навучалася шмат прадстаўнікоў Афрыканскага кантынента", - падкрэсліў ён.

версія для друку

зрабіць стартавай

дабавіць у выбранае