Падзеі

4 кастрычніка, Мінск /Аліна Грышкевіч - БЕЛТА/. Адносіны паміж Беларуссю і Германіяй інтэнсіўныя і як ніколі разнастайныя. Аб гэтым заявіў Надзвычайны і Паўнамоцны Пасол Германіі ў Беларусі Петэр Дэтмар, выступаючы 3 кастрычніка на мерапрыемстве з нагоды нацыянальнага свята ФРГ - Дня германскага адзінства, перадае карэспандэнт БЕЛТА.

Дыпламат падкрэсліў, што абедзве краіны за 25 гадоў дыпламатычных адносін прайшлі доўгі шлях да інтэнсіфікацыі супрацоўніцтва. Ён выказаў упэўненасць, што і ў далейшым краіны будуць развіваць актыўныя сувязі.

Разам з гэтым дыпламат падкрэсліў важнасць таго, што беларускае грамадства і ўрад гатовы прадаўжаць весці дыялог і сумесна шанаваць памяць аб мінулым, што сведчыць аб глыбіні беларуска-германскіх адносін.

Петэр Дэтмар асабліва спыніўся на важнасці аб'яднання Германіі, якое адбылося "27 гадоў таму мірна, у згодзе з партнёрамі і суседзямі". Гэта вялікі мірны праект, заявіў дыпламат, падкрэсліўшы вялікую ролю Гельмута Коля, які быў тады федэральным канцлерам, у гэтым аб'яднальным працэсе. На яго думку, 27 гадоў германскага адзінства - гэта падстава для радасці і нават нешта большае - свята заклікае змагацца з новымі выклікамі.

"Мы пераадолелі сцены і агароджы 27 гадоў таму, і сёння Еўропа ўвасабляе мір. Давайце зробім так, каб гэты мір захоўваўся і ў будучым", - заявіў Петэр Дэтмар.