Падзеі

Лукашэнка і Вучыч праводзяць перагаворы ў Бялградзе

3 снежня, Бялград /Міхаіл Маціеўскі - БЕЛТА/. Сустрэча Прэзідэнта Беларусі Аляксандра Лукашэнкі з Прэзідэнтам Сербіі Аляксандрам Вучычам праходзіць у Бялградзе, перадае карэспандэнт БЕЛТА.

Кіраўнікі дзяржаў напярэдадні сустрэліся за нефармальнай вячэрай, а сёння ў Палацы Сербіі праходзяць афіцыйныя перагаворы двух прэзідэнтаў. Галоўнай тэмай павінна стаць развіццё эканамічнага супрацоўніцтва, асаблівая ўвага будзе ўдзелена нарошчванню тавараабароту.

Аляксандр Вучыч у нядаўнім інтэрв'ю тэлеканалу "Беларусь 1" заявіў, што краіны ў сілах дасягнуць аб'ёму гандлю ў памеры паўмільярда долараў. "Мы павінны працаваць і спрабаваць паставіць перад сабой мэту, каб тавараабарот дасягнуў лічбы $500 млн. Думаю, што ва ўсіх сферах грамадскага жыцця мы можам адкрываць новыя галіны. Візіт Аляксандра Лукашэнкі зможа стаць сур'ёзным імпульсам для развіцця нашых адносін", - заявіў Прэзідэнт Сербіі.

У 2018 годзе тавараабарот паміж Беларуссю і Сербіяй знізіўся амаль на 40 працэнтаў - да $148 млн. У студзені-верасні гэтага года ён прадоўжыў зніжацца і склаў $110,6 млн, крыху не дасягнуўшы мінулагодніх паказчыкаў. Цяпер краіны займаюцца некалькімі праектамі, якія ў бліжэйшай будучыні могуць істотна нарасціць эканамічнае супрацоўніцтва. Аднак ці можна назваць іх прарыўнымі?

Пастаўкі тэхнікі МАЗ і БелАЗ

У 2018-2019 гадах у Сербію было пастаўлена 33 адзінкі пажарнай тэхнікі на базе шасі МАЗ, яны каштавалі амаль $2 млн. Сербскі бок заявіў, што будзе прадаўжаць перааснашчэнне пажарнага аўтапарку да 2021 года, таму цяпер вядуцца перагаворы аб магчымым супрацоўніцтве. Сербія можа як закупляць у беларускага боку гатовыя машыны, так і пайсці на стварэнне сумеснай вытворчасці.

Беларусь гатова пастаўляць у Бялград пасажырскую тэхніку. Горад мае ў ёй патрэбу, аднак канкрэтных дамоўленасцей краіны пакуль не дасягнулі. Цяпер у Бялградзе эксплуатуюцца больш як 300 аўтобусаў і 100 тралейбусаў беларускай вытворчасці. У сакавіку гарадская мэрыя прапанавала дылеру МАЗа прапрацаваць пастаўку яшчэ дзвюх соцень аўтобусаў, аднак пазней адклала гэта пытанне.

У гэтым годзе БелАЗ паставіў у Сербію шэсць самазвалаў і запчастак на $9,2 млн. Чакаецца, што на беларуска-сербскім бізнес-форуме будуць падпісаны кантракты на пастаўку яшчэ шасці машын агульным коштам $8 млн.

Развіццё зборачных вытворчасцей

У Сербіі працуюць ужо сумесныя вытворчасці беларускіх трактароў (штогод выпускаецца амаль 450 адзінак) і аўтобусаў (у 2016-2018 гадах сабрана 140 адзінак). Плануецца, што ў час візіту Прэзідэнта Беларусі будуць падпісаны кантракты на пастаўку ў 2020 годзе 535 трактароў і трактаракамплектаў на $9,7 млн.  

У гэтым годзе пачаў супрацоўніцтва з сербскімі партнёрамі і "Бабруйскаграмаш", падпісаны дылерскі дагавор. Прапрацоўваецца праект па выпуску для Бялграда нізкападлогавых аўтобусаў МАЗ з рухавікамі на прыродным газе і будаўніцтве газавых заправачных станцый.

Супрацоўніцтва ў сферы металургіі

З 2017 года Беларусь пастаўляе на сербскі рынак металапрадукцыю. Па выніках бягучага года экспарт павінен перасягнуць $21 млн. У час бізнес-форуму ў Бялградзе плануецца падпісаць рамачнае пагадненне аб пастаўках у 2020 годзе металапрадукцыі на $16,8 млн.

Яшчэ адным перспектыўным напрамкам у сферы металургіі можа стаць набыццё беларускім бокам акцый сербскага завода "Магнахром", які вырабляе вогнетрывалыя матэрыялы. Прадпрыемства ўжо накіравала сваю прапанову Міністэрству прамысловасці Беларусі, аднак яна яшчэ разглядаецца.

Рэалізацыя гэтых праектаў унясе свой уклад у нарошчванне эканамічнага супрацоўніцтва. Аднак, каб дасягнуць заяўленых паказчыкаў (тавараабароту ў памеры $500 млн), краінам давядзецца правесці рэвізію адносін і знайсці сапраўды перспектыўныя праекты. Візіт Аляксандра Лукашэнкі ў Сербію і павінен надаць імпульс гэтай рабоце.

версія для друку

зрабіць стартавай

дабавіць у выбранае