Падзеі

Беларускія кандыдаты ў касманаўты прыбылі ў цэнтр падрыхтоўкі ў Зорным гарадку

Беларускія кандыдаты ў касманаўты ў цэнтры падрыхтоўкі ў Зорным гарадку. Фота з асабістага архіва

23 ліпеня, Мінск /Кар. БЕЛТА/. Беларускія кандыдаты ў касманаўты прыбылі ў Цэнтр падрыхтоўкі касманаўтаў імя Ю.А.Гагарына (Зорны гарадок, Маскоўская вобласць), які ўваходзіць у дзяржкарпарацыю "Раскосмас", для падрыхтоўкі да запланаванага касмічнага палёту на Міжнародную касмічную станцыю (МКС), паведамляе БЕЛТА.

Асноўны ўдзельнік касмічнага палёту Марына Васілеўская і дублёр Настасся Лянкова адабраны з шасці беларускіх кандыдатаў, якія прайшлі медыцынскае абследаванне ў Цэнтры падрыхтоўкі касманаўтаў у снежні мінулага года. Заўтра беларускія кандыдаты будуць прадстаўлены кіраўніцтву і супрацоўнікам цэнтра і пачнуць падрыхтоўку да касмічнага палёту ў складзе асноўнага і дубліруючага экіпажаў 21-й экспедыцыі на МКС.

Марына Васілеўская ўключана ў асноўны экіпаж экспедыцыі разам з касманаўтам "Раскосмасу" ўраджэнцам Беларусі Алегам Навіцкім (камандзірам) і астранаўтам NASA Трэйсі Дайсан. Настасся Лянкова - у дубліруючы экіпаж разам з касманаўтам "Раскосмасу" Іванам Вагнерам (камандзірам) і астранаўтам NASA Дональдам Пецітам.

Падрыхтоўка зойме каля васьмі месяцаў і будзе ўключаць вывучэнне сістэм пілатуемага карабля "Саюз МС" і расійскага сегмента МКС, трэніроўкі па адпрацоўцы дзеянняў экіпажа ў розных сітуацыях, уключаючы дзеянні пры няштатнай пасадцы спускаемага апарата касмічнага карабля ў розных кліматагеаграфічных зонах і іншыя трэніроўкі ў адпаведнасці з праграмай падрыхтоўкі да касмічнага палёту.

Чакаецца, што працягласць знаходжання беларускага касманаўта на борце МКС складзе 12 сутак, на працягу якіх неабходна выканаць навуковую праграму касмічнага палёту, распрацаваную Нацыянальнай акадэміяй навук Беларусі і дзяржкарпарацыяй "Раскосмас" з удзелам Расійскай акадэміі навук.

версія для друку

зрабіць стартавай

дабавіць у выбранае