Падзеі

Беларусь і Кітай дамовіліся аб рэалізацыі буйных праектаў у галіне развіцця і супрацоўніцтва

Фота прэс-службы ўрада

10 ліпеня, Мінск /Кар. БЕЛТА/. Першы намеснік прэм'ер-міністра Беларусі Мікалай Снапкоў сустрэўся са старшынёй Дзяржаўнага агенцтва па міжнародным развіцці і супрацоўніцтве пры Дзяржсавеце Кітая Ло Чжаахуэем у час першага дня рабочага візіту ў Кітайскую Народную Рэспубліку. Аб гэтым БЕЛТА паведамілі ў прэс-службе ўрада.

Візіт Мікалая Снапкова арганізаваны ў мэтах рэалізацыі дамоўленасцей лідараў Беларусі і Кітая, дасягнутых у ходзе дзяржаўнага візіту Прэзідэнта Беларусі Аляксандра Лукашэнкі ў Кітай і ў рамках перагавораў са старшынёй КНР Сі Цзіньпінам.

Як адзначыў першы намеснік прэм'ер-міністра, краіны на працягу дзесяцігоддзяў пастаянна ўмацоўваюць партнёрства і з'яўляюцца сапраўды "жалезнымі" братамі. Мікалай Снапкоў звярнуў увагу на стратэгічны характар работы па рэалізацыі праектаў у галіне развіцця і супрацоўніцтва. Беларусь заўсёды імгненна рэагуе на любыя ініцыятывы Кітая. Адной з першых краін падтрымала і стала ўдзельніцай ініцыятывы "Пояс і Шлях", а таксама ініцыятывы па глабальным развіцці. Кіраўнік дзяржагенцтва таксама падкрэсліў, што беларуска-кітайскія адносіны выйшлі далёка за рамкі двухбаковага вымярэння, супрацоўніцтва мае глабальнае значэнне.

Падкрэсліваецца, што пералік сумесных праектаў у супрацоўніцтве па прадастаўленні бязвыплатнай дапамогі ўрада Кітая вельмі шырокі. У Беларусі ўжо рэалізавана 15 важных сацыяльна арыентаваных праектаў на агульную суму каля 1,6 млрд кітайскіх юаняў. Бягучы партфель праектаў уключае знакавыя і важныя для народа Беларусі праекты, такія як будаўніцтва двух спартыўных аб'ектаў міжнароднага класа - стадыёна і басейна. У рабоце знаходзяцца каля дзясятка новых стратэгічных праектаў, у тым ліку па інфраструктурным развіцці індустрыяльнага парка "Вялікі камень", пастаўцы неабходнага тэхналагічнага абсталявання з агульнай сумай фінансавання ў памеры звыш 900 млн кітайскіх юаняў.

Бакі дамовіліся паскорыць рэалізацыю важнейшых перспектыўных праектаў, забяспечыць фінансаванне і завяршэнне будаўніцтва спартыўных аб'ектаў да верасня 2024 года, планамерна развіваць сацыяльную, жыллёвую і вытворчую інфраструктуру індустрыяльнага парка "Вялікі камень", да канца года зацвердзіць шэраг праектаў і забяспечыць пастаўку важнага абсталявання ў мэтах рэалізацыі дамоўленасцей лідараў Беларусі і Кітая і напаўнення новага статусу адносін - усепагоднага і ўсебаковага стратэгічнага партнёрства ў новую эпоху - новым зместам.

версія для друку

зрабіць стартавай

дабавіць у выбранае