Падзеі

Алейнік: у 2023 годзе чакаецца новы гістарычны максімум па аб'ёме тавараабароту Беларусі і Расіі

Фота МЗС

15 снежня, Масква /Кар. БЕЛТА/. У 2023 годзе чакаецца новы гістарычны максімум па аб'ёме тавараабароту Беларусі і Расіі. Аб гэтым заявіў міністр замежных спраў Беларусі Сяргей Алейнік на сумесным пасяджэнні калегій знешнепалітычных ведамстваў Беларусі і Расіі, перадае карэспандэнт БЕЛТА.

Кіраўнік МЗС падкрэсліў, што ва ўмовах існуючага беспрэцэдэнтнага знешняга націску Беларусь і Расія прадоўжылі ўмацаванне адносін саюзніцтва, стратэгічнага партнёрства, забяспечваючы нарошчванне дынамікі двухбаковага ўзаемадзеяння. Аб гэтым, паводле яго слоў, сведчаць насычаныя кантакты на вышэйшым і высокім узроўнях, інтэнсіўнае міжпарламенцкае, міжгаліновае і міжрэгіянальнае супрацоўніцтва. "Мы дасягнулі прынцыповых дамоўленасцей па шэрагу найбольш актуальных пытанняў у нашых адносінах", - заўважыў Сяргей Алейнік.

Закранаючы эканамічны аспект узаемадзеяння дзвюх краін, ён звярнуў увагу, што былі прыняты істотныя сумесныя меры па павышэнні ўстойлівасці эканомік дзвюх краін. "Пры захаванні бягучага тэмпу тавараабароту па выніках 2023 года мы чакаем новы гістарычны максімум аб'ёму гандлю паміж нашымі краінамі", - адзначыў міністр.

Ён таксама звярнуў увагу, што, дзякуючы сапраўды саюзніцкім адносінам, рэальнай узаемадапамозе, у тым ліку ў кантэксце нейтралізацыі націску з боку недружалюбных краін, істотна актывізавалася беларуска-расійскае ўзаемадзеянне ў рамках не толькі Саюзнай дзяржавы, але і іншых інтэграцыйных структур, як ЕАЭС, СНД, АДКБ. Праведзены вялікі аб'ём работы па падрыхтоўцы і ўзгадненні асноўных напрамкаў рэалізацыі палажэнняў дагавора аб стварэнні СД на 2024-2026 гады. "Іх прыняцце і далейшая рэалізацыя дадуць значныя вынікі ў павышэнні ўзроўню жыцця нашых грамадзян, умацаванні эканамічных патэнцыялаў Беларусі і Расіі, нашага сукупнага эканамічнага патэнцыялу", - упэўнены кіраўнік МЗС.

Адным з важных пытанняў у парадку дня пасяджэння калегій з'яўляецца прыняцце сумеснай праграмы ўзгодненых дзеянняў у галіне знешняй палітыкі. Упершыню яна будзе адобрана адразу на тры гады - з 2024 года па 2026-ы ўключна. "Маючае адбыцца сёння падпісанне праграмы ўзгодненых дзеянняў на новы трохгадовы перыяд дасць магчымасць бліжэй скарэліраваць гэты дакумент з іншымі асноватворнымі дакументамі ў рамках Саюзнай дзяржавы", - заўважыў кіраўнік МЗС.

"У рамках выканання праграмы (папярэдняй аналагічнай праграмы. - Заўвага БЕЛТА) мы ўзмацнілі каардынацыю пазіцый на міжнародных пляцоўках. І гэта асабліва важна ва ўмовах нездаровай сусветнай турбулентнасці і бесперапыннага націску заходніх апанентаў, - сказаў Сяргей Алейнік. - Мы эфектыўна задзейнічалі механізмы перагавораў і кансультацый паміж міністэрствамі замежных спраў як па раней запланаванай праблематыцы, так і па меры з'яўлення новых тэм, якія патрабуюць аператыўнага рэагавання і ўзгаднення нашых падыходаў". Паводле яго слоў, запатрабаванасць і плённасць наладжаных алгарытмаў сумеснай работы бясспрэчная.

Міністр таксама падзякаваў расійскаму боку за консульскую дапамогу ў тых краінах, дзе няма беларускіх загранустаноў. Асаблівыя словы ўдзячнасці ён выказаў за дапамогу пры эвакуацыі беларускіх грамадзян з зон канфліктаў.

версія для друку

зрабіць стартавай

дабавіць у выбранае