Падзеі, факты, анонсы

Каляндар падзей у Беларусі: ЛIСТАПАД 2022

Фотавыстава да 160-годдзя Беларускай чыгункі

Унікальныя фота выставы "Беларуская чыгунка. 160 гадоў развіцця і ўдасканалення" можна ўбачыць на буйнейшых вакзалах магістралі. Праект прысвечаны юбілею, які будзе адзначацца 27 снежня. Пад слоганам "У нашай гісторыі ўсе падзеі галоўныя" прадстаўлены найбольш значныя і прыкметныя падзеі за 16 дзесяцігоддзяў гісторыі чыгуначнага транспарту ў Беларусі. Выставу размясцілі на вакзалах у Мінску, Баранавічах, Брэсце, Віцебску, Гомелі, Гродне, Оршы, Магілёве і на станцыі Парэчча, дзе быў пакладзены пачатак руху паяздоў па беларускай зямлі. З архіўных фота складаецца візуальны летапіс кожнай эпохі – першыя вёрсты стальных пуцей і станаўленне новага віду транспарту, эпоха рэвалюцый і Грамадзянскай вайны, пераадоленне разрухі і будаўніцтва новых участкаў, ваеннае ліхалецце і эшалоны Перамогі, адраджэнне краіны і развіццё новых відаў цягі, абнаўленне інфраструктуры і электрыфікацыя, распад СССР і фарміраванне новых сувязей, абнаўленне рухомага саставу і ўкараненне інфармацыйных тэхналогій на чыгуначным транспарце ў сучаснай Беларусі.

Калі: з 19 жніўня да канца года
Дзе: буйнейшыя вакзалы краіны

Маскоўскі цырк Нікуліна ў Мінску: "Усё будзе добра"

Вялікае свята сваім паклоннікам арганізавалі Белдзяржцырк і Маскоўскі цырк Нікуліна на Цвятным бульвары. На тры месяцы галоўная арэна Беларусі прыняла шоу пад назвай "Усё будзе добра". У суправаджэнні Імпрэсарыа і Шоўмена госці акунуцца ў дзіўны свет, дзе жывуць лятаючыя людзі, дзе акрабаты спрачаюцца з прыцяжэннем Зямлі, дзе папугаі здзіўляюць сваёй экзатычнай размалёўкай і лятаюць над галавой. Ды і акула тут – не страшны марскі драпежнік, а вясёлы клоўн! У праграме выступяць паветраныя гімнасты, акрабаты, эквілібрысты, а таксама дрэсіраваныя мядзведзі, сабачкі, малпачкі-музыканты, папугаі…

Калі: 24 верасня – 4 снежня
Дзе: Беларускі дзяржаўны цырк, пр. Незалежнасці, 32, Мінск

Мерапрыемства "Лошыцкая сядзіба ў ХІХ – пачатку ХХ стагоддзяў"

Адна з самых папулярных выдатных мясцін Мінска – Лошыцкая сядзіба – запрашае адправіцца ў музычнае падарожжа. У час экскурсіі па сядзібе наведвальнікі не толькі ўбачаць стылізаваныя інтэр'еры, у якіх жылі знакамітыя ўладальнікі Яўстафій Прушынскі, Іван і Яўстафій Любанскія, але і даведаюцца пра іх лёсы, прывычкі, уклад жыцця, сакрэты, якія захоўваюць гэтыя сцены. Музычнымі ілюстрацыямі да экскурсіі стануць паланэз дыпламата і кампазітара Міхала Клеафаса Агінскага "Развітанне з Радзімай", твор Напалеона Орды "Серэнада", п'еса са зборніка "Полацкі сшытак", творы нямецкага кампазітара-лірыка Іаганеса Брамса і рускага кампазітара-філосафа Аляксандра Скрабіна.

Калі: кожную нядзелю ў 15.00 і 17.00
Дзе: Музей "Лошыцкая сядзіба", праезд Чыжэўскіх, 10, Мінск

Выстава "Гарадскі праменад. Мінск на старых паштоўках"

Яшчэ стагоддзе таму "адкрытыя пісьмы" былі адным з самых даступных спосабаў стасункаў на адлегласці, а масавы выпуск картак у канцы XIX стагоддзя садзейнічаў росквіту іх калекцыяніравання - філакартыі. Сёння вінтажныя паштоўкі, выдадзеныя ў 1900-1918 гг., з'яўляюцца гістарычнымі артэфактамі. Яны дазваляюць убачыць змяненні ў гарадскім асяроддзі таго часу: лініі конкі і возчыцкую біржу, тэлефонную станцыю, першыя аўтамабілі, што суседнічалі з запрэжанымі коньмі павозкамі, развітую чыгуначную сувязь. Каштоўнасць уяўляюць пасланні – віншаванні, навіны і просьбы – гараджан і падарожнікаў, якія па волі лёсу апынуліся ў губернскім Мінску пачатку ХХ стагоддзя.

Калі: са жніўня да канца 2022 года
Дзе: Мінская гарадская ратуша, пл. Свабоды, 2а, Мінск

XXVII Міжнародны фестываль арганнай музыкі "Званы Сафіі"

У старажытным Полацку зноў адбудзецца адна з буйнейшых падзей музычнага мастацтва краіны – Міжнародны фестываль арганнай музыкі "Званы Сафіі". Дзякуючы гэтаму знакамітаму праекту горад кожную восень становіцца цэнтрам сусветнага арганнага выканальніцтва. З 23 кастрычніка па 27 лістапада знатакі жывой музыкі з розных куткоў Беларусі і замежжа могуць атрымаць асалоду ад гучання полацкага аргана ў выкананні знакамітых музыкантаў з розных краін. Больш таго, гасцей чакае двайное свята – разам з фестывалем пачынаецца юбілейны 40-ы канцэртны сезон у Сафійскім саборы.

23 кастрычніка адбудзецца канцэрт заслужанай артысткі Беларусі Ксеніі Пагарэлай і ўладальніцы каларатурнага сапрана, лаўрэата міжнародных конкурсаў і фестываляў, расійскай спявачкі Людмілы Трацэўскай. Цэнтральнай падзеяй па традыцыі стане адкрыццё фестывалю. Арганістка Сафійскага сабора Ксенія Пагарэлая і камерны аркестр "Еўропа-цэнтр" пад кіраўніцтвам Раіля Садыкава кожны год радуюць сваіх паклоннікаў новымі яркімі праграмамі. Не стане выключэннем і гэты фестываль. 30 кастрычніка ў канцэртнай зале Сафійскага сабора разам з шэдэўрамі старадаўняй музыкі прагучыць полацкая прэм'ера твора беларускага кампазітара Аляксандра Літвіноўскага – Сюіта для струннага аркестра Le Grand Cahier. Расійскі дуэт аргана і голасу – Настасся Быкава і Святлана Белякова – выступіць 6 лістапада. У праграме канцэрта прагучаць творы вялікіх класікаў І.С. Баха, Г.Ф. Гендэля, А. Скарлаці, В.А. Моцарта, Т. Альбіноні. Музыку французскага рамантызму падораць слухачам вядучыя беларускія салісткі, лаўрэаты міжнародных конкурсаў Кацярына Нікалаева (арган) і Таццяна Кармазінава (флейта) 13 лістапада. 20 лістапада паклоннікі арганнай музыкі пачуюць вялікія такаты Д. Букстэхудэ, Ш.-М. Відора, І.С. Баха, Л. Бальмана, А. Пьяцалы ў выкананні расійскага арганіста, клавесініста, кампазітара Фёдара Строганава. Завершыцца свята музыкі 27 лістапада праграмай "Два геніі: Вівальдзі і Бах". Лаўрэат расійскай прэміі "Арганіст года-2021", салістка Цюменскай філармоніі Марыя Блажэвіч выступіць у Полацку ўпершыню. Полацкі арган даўно пакарыў музыкантаў і слухачоў сваім незвычайным голасам, прыгажосць і глыбіню якога падкрэслівае ўнікальная акустыка Сафійскага сабора.

Калі: 23 кастрычніка – 27 лістапада
Дзе: Сафійскі сабор, вул. Замкавая, 1, Полацк
Даведацца больш

Выстава беларускіх лялек-абярэгаў

Лялькі-абярэгі з'явіліся ў беларусаў яшчэ ў старажытныя часы: яны адлюстроўваюць уяўленні і вераванні, асаблівасці ўспрымання свету. Гульню ў лялькі нашы продкі не лічылі простай забавай. Спрадвеку верылі, што чым больш дзіця гуляе і старанна робіць ляльку, тым большы дастатак будзе ў сям'і, а жыццё яго складзецца больш удачна. Галоўнай задачай лялькі было засцерагчы чалавека ад злых сіл, прыняць на сябе хваробы і няшчасці, а таксама дапамагчы дзецям праз свет лялек увайсці ў дарослае жыццё. Наведвальнікі выставы "Скарбонка памяці" даведаюцца пра гісторыю беларускіх лялек-абярэгаў ("берагіня"), навучацца адрозніваць "стаўбушкі", "пелянашкі", "неразлучнікі", "мотанкі", вырабяць лялькі-абярэгі для сваёй сям'і па тэхналогіі, якая выкарыстоўвалася да сярэдзіны мінулага стагоддзя.

Калі: да канца 2022 года
Дзе: музей "Лошыцкая сядзіба", праезд Чыжэўскіх, 8/2, Мінск

Выставачны праект "Трагедыя народаў" у Мінску

"Трагедыя народаў" - гэта мультымедыйны праект, прысвечаны лёсу савецкіх грамадзян, пацярпелых ад нацысцкай агрэсіі і акупацыйнай палітыкі, закатаваных у гета і канцлагерах, сагнаных на прымусовыя работы ў Германію і сумежныя краіны. У экспазіцыі прадстаўлены больш за 100 алічбаваных друкаваных рарытэтаў з фондаў маскоўскага Музея Перамогі. Гэта рэпартажныя фатаграфіі ваенных карэспандэнтаў, дакументы, плакаты, лістоўкі, франтавыя малюнкі і работы пасляваенных мастакоў, што сведчаць аб злачынствах нацыстаў. Выстава ў беларускай сталіцы з'яўляецца часткай міжнароднага праекта "Тэрыторыя Перамогі", які стартаваў у 2017 годзе і ўжо аб'яднаў больш за 250 расійскіх і замежных музеяў, а таксама звыш 7 тысяч музейных работнікаў і 10 млн наведвальнікаў.

Калі: 10 кастрычніка - 10 снежня
Дзе: Беларускі культурны цэнтр духоўнага адраджэння, вул. Каліноўскага, 121, Мінск

Выстава мастацкага тэкстылю Windows & Bridges у Мінску

Windows & Bridges - праект, які аб'яднаў у адзінай прасторы беларускае і аўстрыйскае сучаснае мастацтва тэкстылю ад маладога пакалення мастакоў. Аўтары ідэі - Мануэль Вандл і Хрысціна Высоцкая - прапануюць акунуцца ў шырокае па багацці канцэпцый, форм, матэрыялаў і тэхнік мастацкае пераасэнсаванне тэмы. У кастрычніку 2021-га куратары выставы паставілі перад сваімі студэнтамі творчую задачу - канцэптуальна пераасэнсаваць фармальна-пластычныя, ідэйна-сэнсавыя, вобразныя і філасофскія значэнні вокнаў і мастоў з дапамогай мовы мастацкага тэкстылю і змешаных тэхнік. У выніку атрымаўся міжкультурны вопыт творчай работы 19 аўтараў з дзвюх краін. У экспазіцыі прадстаўлена больш за 30 плоскасных, аб'ёмных і аб'ёмна-прасторавых твораў, выкананых у традыцыйных, аўтарскіх і эксперыментальных тэхніках тэкстылю і мікс-медыя.

Калі: 20 кастрычніка - 20 лістапада
Дзе: Гарадская мастацкая галерэя твораў Л.Д. Шчамялёва, вул. Рэвалюцыйная, 10, Мінск

II трыенале маладых мастакоў у Мінску

Праз тры гады сталіца зноў убачыць маштабны арт-праект, прызначаны адкрыць новыя імёны і назваць лепшых. Трыенале маладых мастакоў - гэта фінальны этап рэспубліканскага конкурсу, што праводзіцца Міністэрствам культуры краіны сярод прадстаўнікоў сучаснага беларускага мастацтва. Мастацтва, якое стварае моладзь, чые думкі і пачуцці ўвасабляюцца ў сучаснасці, а дзеянні накіраваны на захаванне і развіццё традыцый беларускай культуры. У рамках выставы журы вызначыць пераможцаў у намінацыях "Жывапіс", "Графіка", "Скульптура", "Манументальнае і манументальна-дэкаратыўнае мастацтва", "Дэкаратыўна-прыкладное мастацтва", "Мастацкая дынастыя", "Фатаграфія", "Навацыя", "За ўклад у развіццё выяўленчага мастацтва". Наведвальнікаў трыенале чакаюць лекцыі, сустрэчы, прэзентацыі, майстар-класы і іншыя мерапрыемствы. Таксама менавіта госці выставы змогуць вызначыць пераможцу ў намінацыі "Глядацкая сімпатыя".

Калі: 21 кастрычніка - 20 лістапада
Дзе: Нацыянальны цэнтр сучасных мастацтваў, пр. Незалежнасці, 47, Мінск
Даведацца падрабязней

Фестываль мастацтваў "Музычная восень"-2022 у Брэсце

Адной з галоўных падзей лістапада ў Брэсце стане фестываль мастацтваў "Музычная восень". У гэтым сезоне меламанаў чакае разнастайнасць жанраў ад класікі і джаза да рока і твораў сучасных кампазітараў. Таму фестываль будзе цікавы як прафесіяналам, знатакам сусветнага рэпертуару, так і пачаткоўцам, якія робяць першыя крокі ў асваенні "класічнай музычнай граматы".

3 лістапада - "Шэдэўры барока": камерны аркестр Брэсцкай абласной філармоніі, салістка - лаўрэат міжнародных конкурсаў Марына Бялова (Масква);
5 лістапада - "Мелодыі кахання": канцэрт салістаў оперы і артыстаў Вялікага тэатра Беларусі. Струнны квінтэт "Серэнада", салісты - заслужаная артыстка Беларусі Таццяна Траццяк і лаўрэат міжнародных конкурсаў Аляксандр Міхнюк;
11 лістапада - "Дарагая ELLA": эстрадна-сімфанічны аркестр Гродзенскай абласной філармоніі;
12 лістапада - "Венецыянскі карнавал": сумесны праект выканаўцаў сусветнай класічнай музыкі, салісты вечара - Надзея Сяргеева (Масква), лаўрэат міжнародных конкурсаў Аляксандр Палякоў (Мінск), уладальніца Гран-пры і лаўрэат міжнародных конкурсаў Людміла Карпук (Мінск);
15 лістапада - "Нам 25": фартэпіянны дуэт Наталля Котава-Громава і Валерый Баравікоў, удзельнікі - Дзяржаўны камерны хор Рэспублікі Беларусь, Мінскі струнны квартэт, салісты - Марына Русакова і Сяргей Мікулік (фартэпіяна);
17 лістапада - "Рок скрозь класіку": сусветныя хіты ў выкананні музычнага квартэта A’StorioPLUS (дзве скрыпкі, віяланчэль, клавішы, кахон і вакал);
18 лістапада - GRAND GALA: сусветныя шэдэўры оперы і аперэты, залатыя хіты традыцыйнай кітайскай музыкі ў выкананні вакалістаў з Беларусі, Расіі, Кітая, Арменіі;
20 лістапада - канцэрт аркестра народных інструментаў імя народнага артыста Беларусі Леаніда Іванова, мастацкі кіраўнік - Дзяніс Чэрта.

Калі: 3-20 лістапада
Дзе: Брэсцкая абласная філармонія, Абласны грамадска-культурны цэнтр, Касцёл Узвышэння Святога Крыжа, Брэст

"Мой родны кут": да 140-годдзя з дня нараджэння Янкі Купалы і Якуба Коласа

Святочны канцэрт Нацыянальнага акадэмічнага народнага аркестра імя І. Жыновіча і Дзяржаўнага камернага хору прысвечаны 140-годдзю з дня нараджэння класікаў беларускай літаратуры - Янкі Купалы і Якуба Коласа. У праграме прагучаць творы Аляксея Туранкова, Ігара Лучанка, Уладзіміра Мулявіна, Алега Молчана, Валерыя Іванова, Алены Атрашкевіч і іншых кампазітараў. Інструментальная музыка, папулярныя песні, харавыя рамансы, урывак з рок-оперы "Гусляр", апрацоўкі народных мелодый - усе адабраныя творы адлюстроўваюць паэтычныя вобразы і прыгажосць слова выдатных беларусаў. Салісты аркестра і хору Андрэй Коласаў, Ігар Задарожны, Настасся Рачыцкая, Вераніка Чарняўская, Арына Аляксеева і Кацярына Крашчук выканаюць вядомыя песні на вершы Янкі Купалы і Якуба Коласа.

Калі: 3 лістапада
Дзе: Беларуская дзяржаўная філармонія, пр. Незалежнасці, 50, Мінск

XXVIII Мінскі міжнародны кінафестываль "Лістапад"

Любімы жыхарамі і гасцямі Мінска кінафестываль "Лістапад" адбудзецца ўжо 28-ы раз і гэтай восенню аб'яднае паклоннікаў пад дэвізам "Сапраўдныя каштоўнасці". Фільмы з праграмы-2022 прысвечаны тэмам міру, захавання зямлі, краіны, любові, сям'і, надзеі, веры... З рэкорднай колькасці заявак - 1360 з 89 краін - адабраны больш за 80 карцін. У гэтым годзе гледачоў чакаюць 4 конкурсныя праграмы - ігравога, дакументальнага і - упершыню! - анімацыйнага кіно, а таксама конкурс для дзіцячай і юнацкай аўдыторыі "Лістападзік".

У асноўны конкурс ігравога кіно аўтары з больш як 60 краін прыслалі звыш 300 заявак. Суддзям давялося правесці вялікую работу: паглядзець больш за 500 гадзін матэрыялу і выбраць 12 лепшых твораў. У выніку тут будуць фільмы з усіх рэгіёнаў свету: Афрыкі, Паўночнай Амерыкі, Лацінскай Амерыкі і Карыбскага басейна, Азіі, Аўстраліі і Акіяніі, Еўропы (у тым ліку карціны сумеснай вытворчасці).

У рамках ММКФ-2022 адбудуцца дні кіно Расіі, Узбекістана, Кітая, Індыі, Інданезіі, пройдзе прэзентацыя залатога фонду беларускага кіно і праектаў кінастудыі "Беларусьфільм" у час асобнага мерапрыемства - Дня беларускага кіно. Усяго ж разам з пазаконкурснымі работамі публіку чакае больш за 100 кінастужак за 8 дзён!

Калі: 4-11 лістапада
Дзе: кінатэатры Мінска
Даведацца падрабязней

ХХ Міжнародная выстава індустрыі прыгажосці і здароўя "ІнтэрСтыль"

InterStyle - адзіная ў Беларусі прафесійная выстава ў beauty-сферы, якая акрамя традыцыйнай работы на выставачных стэндах дае магчымасць удзельнікам выкарыстоўваць такія формы дэманстрацыі, папулярызацыі і навучання, як конкурсы, шоу-паказы і майстар-класы. Дзякуючы гэтай асаблівасці яна цікавая не толькі прафесіяналам у сферы прыгажосці і здароўя, стылістам і іміджмэйкерам, але і пачынаючым спецыялістам, аматарам трэндаў. Чакаецца, што на выставе-2022 будуць прадстаўлены абсталяванне, прафесійныя сродкі для скуры твару, цела і валасоў, парфумерыя і касметыка класа luxury і middle-up, аксесуары...

Калі: 9-12 лістапада
Дзе: павільён Футбольнага манежа, пр. Пераможцаў, 20/2, Мінск

Хор Валаамского манастыра: канцэрт "Вечная любоў"

Хор Валаамскага манастыра - творчы калектыў прафесійных выканаўцаў, створаны з нагоды аднаўлення і асвячэння ў жніўні 2005 года Спаса-Праабражэнскага сабора на востраве Валаам Патрыярхам Маскоўскім і ўсяе Русі Алексіем II. Унікальнасць хору ў тым, што ён адначасова з'яўляецца богаслужэбна-пеўчым і канцэртным творчым калектывам. Рэпертуар надзвычай шырокі і ўключае богаслужэбныя, старажытнарускія знаменныя і раннепартэсныя спевы, арыгінальныя напевы Валаамского манастыра і іх шматгалосыя варыянты, духоўныя творы рускіх класікаў, народныя песні і рамансы, песні пра Вялікую Айчынную вайну і калядныя песні Расіі, Балгарыі, Сербіі, Грэцыі, Англіі, Францыі, Аргенціны.

Калі, дзе:
8 лістапада - Абласны грамадска-культурны цэнтр, вул. Камуністычная, 1, Брэст
9 лістапада - Рэспубліканскі палац культуры прафсаюзаў, пр. Незалежнасці, 25, Мінск
10 лістапада - Грамадска-культурны цэнтр, вул. Ланге, 17, Гомель
11 лістапада - Канцэртная зала "Магілёў", вул. Першамайская, 10, Магілёў
12 лістапада - Нацыянальны тэатр імя Якуба Коласа, вул. Замкавая, 2, Віцебск

Выстава "Пасля Пакрова нявеста гатова" ў Брэсце

Эксклюзіўную калекцыю вясельных сукенак прадставілі на выставе "Пасля Пакрова нявеста гатова". Са старажытных часоў свята Пакрова Прасвятой Багародзіцы лічылася спрыяльным днём для шлюбаў. Менавіта да гэтага часу завяршаліся работы ў полі, і можна было рыхтавацца да вяселля. У экспазіцыі - вясельныя ўборы з мінулага стагоддзя, у тым ліку сукенка ў стылі New Look, міні з 1960-х, сукенкі з гіпюру і з простым сілуэтам з 1970-х, убор быццам ад прынцэсы Дзіяны, сукенкі з баваўнянай тканіны, саціну, нейлону... Таксама тут можна ўбачыць архіўныя вясельныя фатаграфіі, метрычныя кнігі, альбомы, запрашэнні на ўрачыстасць, святочныя ўпрыгажэнні. Асаблівую ўвагу прыцягваюць уборы і атрыбуты традыцыйнага беларускага вяселля.

Калі: да сярэдзіны снежня 2022 года
Дзе: Брэсцкі абласны краязнаўчы музей, вул. К. Маркса, 60, Брэст
Даведацца падрабязней

VІІІ Рэспубліканскі фестываль нацыянальнай драматургіі імя В.І. Дуніна-Марцінкевіча

Пасля перапынку фестываль нацыянальнай драматургіі ў Бабруйску зноў запрашае знатакоў мастацтва Мельпамены на свае пастаноўкі. Удзельнікамі форуму стануць прафесійныя тэатральныя калектывы з гарадоў Беларусі - Брэста, Гомеля, Мінска, Магілёва. Прычым яны прадставяць публіцы спектаклі выключна паводле твораў беларускіх драматургаў, у тым ліку Аляксея Дударава, Васіля Быкава, Янкі Купалы, Ягора Конева. У конкурснай праграме "Спектакль тэатра драмы" заяўлены сем пастановак, у праграме "Эксперымент" - тры. Гаспадар фестывалю - Магілёўскі абласны тэатр драмы і камедыі імя В.І. Дуніна-Марцінкевіча - выступіць з пазаконкурсным спектаклем "Песя і Янка". Таксама ў праграме форуму-2022 - тэматычныя лекцыі, чытанні п'ес новых аўтараў, работа творчай лабараторыі.

Калі: 11-16 лістапада
Дзе: Магілёўскі абласны тэатр драмы і камедыі імя В.І. Дуніна-Марцінкевіча, вул. Сацыялістычная, 105, Бабруйск

ХХVIII Міжнародная харчовая выстава-кірмаш "Прадэкспа"

Буйнейшая ў краіне харчовая выстава-кірмаш - "Прадэкспа" - збярэ ў нацыянальным выставачным павільёне больш за 100 кампаній, у тым ліку замежных. Тут разгорнуцца тэматычныя стэнды з дэманстрацыяй вялікага асартыменту ад штодзённых прадуктаў харчавання для здаровага ладу жыцця да вытанчаных далікатэсаў. Адкрые праграму дзелавы форум "Унутраны спажывецкі рынак: імпартазамяшчэнне і харчовая бяспека". Таксама адбудуцца чэмпіянат пекараў, міжнародны чэмпіянат кандытарскага мастацтва, міжнародны кулінарны кубак, конкурс на лепшую ўпакоўку/этыкетку "СмакАрт".

Калі: 15-18 лістапада
Дзе: Нацыянальны выставачны цэнтр "БелЭкспа", пр. Пераможцаў, 14, Мінск

Стас Міхайлаў у Мінску

Адзін з самых вядомых на прасторы СНД выканаўцаў, рамантык і любімец публікі Стас Міхайлаў едзе ў Мінск з канцэртам, якім зноў абяцае здзівіць. Кожнае выступленне артыста не падобна да папярэдняга, паколькі спявак выбудоўвае яго, знаходзячыся непасрэдна на сцэне і размаўляючы з гледачамі ў перапынках паміж кампазіцыямі. Гледачы ўбачаць артыста і ў прывычным вобразе, і ў новым амплуа - філосафа, летуценніка, вандроўніка. На канцэрце прагучаць не толькі стапрацэнтныя хіты, але і новыя кампазіцыі, якія раскрываюць цяперашні душэўны стан спевака, яго ўнутраны свет. Паклоннікам абяцаюць яркае шоу з магутным жывым гукам, камандай прафесійных музыкантаў, светлавой феерыяй і фантастычнымі дэкарацыямі.

Калі: 18 лістапада
Дзе: Палац спорту, пр. Пераможцаў, 4, Мінск

"Народжаны для музыкі": канцэрт у гонар 80-годдзя Мусліма Магамаева ў Мінску

У жніўні 2022 года споўнілася 80 гадоў з дня нараджэння спевака, кампазітара, народнага артыста СССР Мусліма Магамаева. Ураджэнец сонечнага Баку меў незабыўны барытон, дзіўнае пачуццё стылю, высакароднасць і прыроджанае абаянне. Яшчэ маладога спевака называлі Арфеем савецкай эстрады: ужо ў 31 год ён атрымаў статус народнага і выпусціў 45 вінілавых пласцінак са сваімі хітамі. Усяго ж у яго рэпертуары - больш за 600 песень, а дыскаграфія налічвае 45 грампласцінак і 15 дыскаў. У юбілейнай праграме да 80-годдзя легендарнага барытона ў суправаджэнні Нацыянальнага акадэмічнага народнага аркестра імя І. Жыновіча прагучаць хіты з залатой калекцыі Мусліма Магамаева, у тым ліку "Синяя вечность", "Королева красоты", "Чертово колесо", "Ноктюрн"... Салісты - Ігар Задарожны, Андрэй Коласаў, Сяргей Мядзведзеў, Уладзіслаў Даніловіч, Іван Бярэзін.

Калі: 30 лістапада
Дзе: Беларуская дзяржаўная філармонія, пр. Незалежнасці, 50, Мінск