Падзеі

Законапраект па пытаннях нарматворчай дзейнасці падрыхтаваны да першага чытання

Фота з архiва

3 лістапада, Мінск /Кар. БЕЛТА/. Законапраект "Аб змяненні законаў па пытаннях нарматворчай дзейнасці" падрыхтаваны да першага чытання, паведаміла журналістам старшыня Пастаяннай камісіі па заканадаўстве Марына Лянчэўская перад пасяджэннем Савета Палаты прадстаўнікоў, перадае карэспандэнт БЕЛТА.

"Пастаянная камісія па заканадаўстве сёння працуе над гэтым законапраектам. Мы падрыхтавалі ўжо яго да першага чытання. Будзем прапаноўваць сваім калегам прыняць яго ў аўтарскай рэдакцыі, безумоўна, падтрымаць канцэпцыю. У наступным работа над гэтым законапраектам будзе прадоўжана ў планавым парадку", - сказала Марына Лянчэўская, дадаўшы, што ў выпадку паступлення заўваг і прапаноў яны будуць прапрацаваны.

Законапраект плануецца разгледзець у першым чытанні 5 лістапада. Ён унесены ў парламент Прэзідэнтам Беларусі Аляксандрам Лукашэнкам.

Паводле слоў дэпутата, законапраект стаў вынікам маштабнай работы па рэвізіі заканадаўства. Асноўным законам, які карэкціруецца, з'яўляецца закон "Аб нарматыўных прававых актах".

"Сапраўды, гэта своеасаблівая канстытуцыя нарматворцы, - сказала Марына Лянчэўская. - Для дэпутацкага корпуса гэты закон з'яўляецца настольным, таму мае калегі пачалі работу над гэтым законапраектам яшчэ задоўга да ўнясення яго ў Палату прадстаўнікоў, на этапе яго распрацоўкі". Так, прадстаўнікі дэпутацкага корпуса ўдзельнічалі ў рабоце рабочых груп па падрыхтоўцы гэтага законапраекта. Акрамя таго, Палатай прадстаўнікоў падрыхтавана шматлікая колькасць прапаноў - іх разгледзелі ў ходзе работы над законапраектам і большасць улічылі.

Адна з такіх прапаноў датычылася перадачы функцый Нацыянальнага цэнтра заканадаўства і прававой інфармацыі па кантролі за рэалізацыяй заключных палажэнняў законаў Палаце прадстаўнікоў Нацыянальнага сходу. "Гэта сур'ёзная дадатковая работа для дэпутацкага корпуса. Але мы разумеем, наколькі яна важна, і да гэтай работы гатовы", - сказала Марына Лянчэўская. Парламенцкі кантроль у гэтай частцы, паводле яе слоў, дазволіць сапраўды больш якасна выконваць асноўную функцыю па заканатворчасці і наладзіць больш эфектыўную зваротную сувязь паміж заканадаўчай і выканаўчай уладай.

Важнай навелай для дэпутацкага корпуса, адзначыла яна, з'яўляецца ўзмацненне значэння пакетнага прынцыпу. "Вельмі важна, каб не дапускалася зацягванне прыняцця нарматыўных прававых актаў, неабходных для рэалізацыі палажэнняў закона. Размова ідзе аб падзаконных нарматыўных прававых актах", - сказала дэпутат.

Вельмі пазітыўнай і своечасовай Марына Лянчэўская назвала навелу, якая датычыцца правядзення інвентарызацыі заканадаўства на сістэмнай аснове: законаў - раз у 5 гадоў, падзаконных актаў, у тым ліку пастаноў урада, - раз у 3 гады, актаў міністэрстваў і ведамстваў - штогод.

Дэпутат звярнула ўвагу на тое, як важна не дапусціць неабгрунтаванага росту заканадаўчага масіву. "Наведзена генеральная ўборка. Трэба падтрымліваць парадак", - падкрэсліла яна, дадаўшы, што навела, якая выключае частую карэкціроўку нарматыўных прававых актаў, накіравана на стабільнасць заканадаўства.

У цэлым, рэзюмавала дэпутат, работа над гэтым законапраектам прызначана забяспечыць сістэмнасць, стабільнасць і якасць заканадаўства.

версія для друку

зрабіць стартавай

дабавіць у выбранае