Падзеі

Законапраект па пытаннях беларускага лічбавага рубля прыняты ў першым чытанні

24 сакавіка, Мінск /Кар. БЕЛТА/. Праект закона "Аб змяненні законаў па пытаннях лічбавага беларускага рубля" прыняты дэпутатамі ў першым чытанні, перадае карэспандэнт БЕЛТА.

У праект закона ўключаны палажэнні, накіраваныя на вызначэнне прававой прыроды лічбавага беларускага рубля, які ўяўляе сабой новую (дадатковую) форму безнаяўных грошай, якія ў адрозненне ад існуючай формы ўлічваюцца не на банкаўскіх рахунках, а на лічбавых рахунках у Нацыянальным банку.

Законапраектам, паводле інфармацыі Пастаяннай камісіі па бюджэце і фінансах Палаты прадстаўнікоў, прадугледжана, што ўкараненне лічбавага беларускага рубля дасць магчымасць павысіць эфектыўнасць кантролю дзяржавы за мэтавым расходаваннем бюджэтных сродкаў, павысіць патэнцыял інтэграцыі нацыянальнай плацежнай сістэмы з плацежнымі сістэмамі краін-партнёраў, пашырыць спосабы ажыццяўлення плацяжоў, уключаючы трансгранічныя, спрасціць правядзенне трансгранічных плацяжоў, а таксама забяспечыць высокі ўзровень захаванасці грашовых сродкаў суб'ектаў гаспадарання.

Карэкціроўцы падлягаюць пяць кодэксаў і восем законаў Беларусі. Сярод іх - Банкаўскі кодэкс, Бюджэтны кодэкс, законы "Аб валютным рэгуляванні і валютным кантролі", "Аб мерах па прадухіленні легалізацыі даходаў, атрыманых злачынным шляхам, фінансавання тэрарыстычнай дзейнасці і фінансавання распаўсюджвання зброі масавага паражэння", "Аб плацежных сістэмах і плацежных паслугах" і інш.

Прадугледжана, што Нацыянальны банк арганізуе функцыянаванне плацежнай сістэмы лічбавага беларускага рубля, у тым ліку платформы лічбавага беларускага рубля. Нацбанк надзяляецца паўнамоцтвамі кантролю за функцыянаваннем лічбавага беларускага рубля.

Як паведаміў журналістам член Пастаяннай камісіі па бюджэце і фінансах Палаты прадстаўнікоў Аляксей Райко, фактычна фарміруецца прававая аснова для ўкаранення лічбавага беларускага рубля. Паводле яго слоў, лічбавы беларускі рубель будзе з'яўляцца законным плацежным сродкам на тэрыторыі Беларусі і дасць магчымасць грамадзянам ажыццяўляць плацяжы. Фактычна гэта новая форма безнаяўных разлікаў у Беларусі.

версія для друку

зрабіць стартавай

дабавіць у выбранае