Падзеі

Візіт дзяржсакратара ЗША ў Беларусь адкладаецца

3 студзеня, Мінск /Кар. БЕЛТА/. Візіт дзяржсакратара ЗША Майкла Пампеа ў Беларусь адкладаецца. Гэту інфармацыю БЕЛТА пацвердзіў начальнік упраўлення інфармацыі і лічбавай дыпламатыі - прэс-сакратар МЗС Беларусі Анатоль Глаз.

"Гэта так. У сувязі з сітуацыяй з пасольствам ЗША ў Іраку дзяржаўны сакратар ЗША Майкл Пампеа ў бліжэйшы час будзе вымушаны знаходзіцца ў Вашынгтоне. У сувязі з гэтым рэалізацыя шэрага мерапрыемстваў, у тым ліку запланаванага на 4 студзеня візіту ў Беларусь, пераносіцца на іншыя тэрміны. Над іх канкрэтызацыяй мы актыўна працуем цяпер з амерыканскімі калегамі", - сказаў Анатоль Глаз.

Аб пераносе візіту на сваім сайце паведамляе і Дзяржаўны дэпартамент ЗША. Гэтак жа адкладаюцца візіты ва Украіну, Казахстан, Узбекістан і на Кіпр.

Рабочы візіт у Беларусь планаваўся 4 студзеня. Былі прадугледжаны перагаворы на вышэйшым узроўні, сустрэча з міністрам замежных спраў Уладзімірам Макеем і іншыя мерапрыемствы. Бакі планавалі абмеркаваць увесь спектр пытанняў беларуска-амерыканскіх адносін і рэгіянальную бяспеку.

Паводле даных ТАСС, масавая акцыя перад амерыканскім пасольствам у Багдадзе пачалася 31 снежня ў знак пратэсту супраць зробленай за дзень да гэтага атакі ВПС ЗША на лагер шыіцкай групоўкі "Катаіб Хезбалах" у пагранічным з Сірыяй горадзе Эль-Каім. У выніку налёту загінулі 25 чалавек, не менш як 50 апалчэнцаў атрымалі раненні. Дзяржсакратар ЗША Майкл Пампеа заявіў, што за арганізацыяй нападу на комплекс пасольства ЗША ў Багдадзе стаяць "тэрарысты і саюзнікі Ірана".

ЗША, паводе даных выдання Military Times, размясцілі 100 марскіх пехацінцаў для аховы пасольства, у небе знаходзіліся два верталёты Apache. Таксама міністр абароны ЗША Марк Эспер заявіў 31 снежня, што Вашынгтон у бліжэйшы час адправіць у сувязі з нападам на пасольства каля 750 ваеннаслужачых у рэгіён. 1 студзеня амерыканскія салдаты прымянілі слёзатачывы газ, каб разагнаць дэманстрантаў, якія, як паведамляе тэлеканал Al Arabiya, спрабавалі падпаліць дах будынка пасольства.

версія для друку

зрабіць стартавай

дабавіць у выбранае