Падзеі

Вальфовіч раскрыў падрабязнасці даклада Прэзідэнту аб праверцы воінскіх часцей і падраздзяленняў

Фотa "Ваяр"

15 кастрычніка, Мінск /Кар. БЕЛТА/. Дзяржаўны сакратар Савета бяспекі Аляксандр Вальфовіч раскрыў журналістам падрабязнасці даклада кіраўніку дзяржавы аб праверцы воінскіх часцей і падраздзяленняў, якая праводзіцца Дзяржаўным сакратарыятам Савета бяспекі па даручэнні Галоўнакамандуючага, перадае карэспандэнт БЕЛТА.

"Кіраўнік дзяржавы чарговы раз заслухаў даклад аб ходзе праверкі, якая, дарэчы, выйшла на фінішную прамую. Наогул, усё, што датычыцца падрыхтоўкі структурных элементаў ваеннай арганізацыі дзяржавы, Прэзідэнт трымае на асабістым кантролі і пастаянна цікавіцца, дзе рыхтуюцца і чым займаюцца нашы структурныя падраздзяленні, у першую чаргу Узброеных Сіл", - сказаў Аляксандр Вальфовіч.

Дзяржсакратар звярнуў увагу, што таго патрабуе ваенна-палітычная абстаноўка, што складваецца вакол Беларусі: "Усё, што датычыцца абароны суверэнітэту, тэрытарыяльнай цэласнасці краіны, яе нацыянальных інтарэсаў, у прыярытэце ў кіраўніка дзяржавы. Таму Узброеным Сілам і іншым структурам ваеннай арганізацыі дзяржавы заўсёды ўдзяляецца такая ўвага".

Паводле слоў Аляксандра Вальфовіча, кіраўніку дзяржавы было падрабязна даложана аб ходзе праверкі. Усе воінскія часці, прыведзеныя ў баявую гатоўнасць, зрабілі даволі працяглыя маршы і выйшлі на палігоны, якія былі вызначаны ў адпаведнасці з распараджэннем. "Сёння на палігонах праходзяць кантрольныя заняткі па прадметах баявой падрыхтоўкі - агнявой, тактычнай, інжынернай", - удакладніў ён. У прыватнасці, 15 кастрычніка танкісты выконваюць стральбу з узбраення танка штатным снарадам, а мотастралкі вядуць кантрольныя стрэльбы з БТР-82.

Дзяржсакратар адзначыў, што з падраздзяленнямі, якія правяраюцца, пастаянна знаходзяцца супрацоўнікі Дзяржаўнага сакратарыята Савета бяспекі, якія сочаць за ходам праверкі. "Я ў анлайн-рэжыме валодаю інфармацыяй аб ходзе праверкі", - дадаў ён.

Акрамя прадметаў баявой накіраванасці, правяраецца фізічная падрыхтоўка ваеннаслужачых. Паводле слоў Аляксандра Вальфовіча, гэта важны элемент кантролю. "Акрамя гэтых заняткаў, з падраздзяленнямі спланаваны кантрольныя заняткі па фізічнай падрыхтоўцы. Аснову складаюць сілавыя практыкаванні і практыкаванні на трываласць - тое, што патрэбна ваеннаслужачаму на полі бою, зыходзячы з сучаснага вопыту правядзення баявых дзеянняў", - канстатаваў ён.

Асаблівасцю праверкі дзяржсакратар Савета бяспекі назваў яе правядзенне пасля завяршэння ваеннага вучэбнага года. Ваеннаслужачыя адпрацавалі ўвесь комплекс мерапрыемстваў, пачынаючы ад адзіночнай падрыхтоўкі да зладжвання падраздзяленняў. "Яны дэманструюць тое, чаму іх навучылі ў ходзе заняткаў па баявой падрыхтоўцы ў воінскіх часцях і падраздзяленнях. Зыходзячы з гэтай праверкі можна будзе зрабіць вывады аб тым, ці ўсё мы ўлічылі ў праграмах баявой падрыхтоўкі для нашых ваеннаслужачых", - падкрэсліў Аляксандр Вальфовіч.

Журналісты ўдакладнілі ў дзяржсакратара Савета бяспекі, якім чынам выбіраліся воінскія часці і падраздзяленні для праверкі. "Вядома, мы не правяраем бяздумна адны і тыя ж воінскія часці. У першым паўгоддзі мы рабілі ўпор на праверку войскаў Заходняга аператыўнага камандавання. У другім паўгоддзі мы перанакіравалі нашы намаганні на праверку войскаў Паўночна-Заходняга аператыўнага камандавання, гэта значыць прыярытэты сіл раздзяляюцца, - растлумачыў ён. - Акрамя таго, правяраюцца нашы сродкі Ваенна-паветраных сіл і проціпаветранай абароны. Мы плануем палёты кантрольных цэлей і глядзім, як іх выявілі і адрэагавалі нашы Ваенна-паветраныя сілы, войскі проціпаветранай абароны".

версія для друку

зрабіць стартавай

дабавіць у выбранае