Падзеі

Вальфовіч: КДБ эфектыўна спраўляецца з нейтралізацыяй выклікаў і пагроз нацбяспецы

7 жніўня, Мінск /Кар. БЕЛТА/. Камітэт дзяржбяспекі эфектыўна спраўляецца з нейтралізацыяй выклікаў і пагроз, нягледзячы на абстаноўку, якая інтэнсіўна развіваецца вакол Беларусі. Аб гэтым пасля нарады ў Прэзідэнта па пытаннях дзейнасці Камітэта дзяржаўнай бяспекі (КДБ) журналістам заявіў дзяржаўны сакратар Савета бяспекі Аляксандр Вальфовіч, перадае карэспандэнт БЕЛТА.

Як адзначыў Аляксандр Вальфовіч, Камітэт дзяржбяспекі з'яўляецца адной з вядучых арганізацый, якая стаіць на варце суверэнітэту, тэрытарыяльнай цэласнасці, нацыянальных інтарэсаў і канстытуцыйнага ладу Беларусі. "Камітэт дзяржбяспекі сёння эфектыўна спраўляецца з нейтралізацыяй тых выклікаў і пагроз, якія знаходзяцца ў сферы забеспячэння нацыянальнай бяспекі. Нягледзячы на ваенна-палітычную абстаноўку, якая інтэнсіўна развіваецца і складваецца вакол нашай краіны", - падкрэсліў Аляксандр Вальфовіч.

Паводле яго слоў, нарада ў кіраўніка дзяржавы прайшла ў давернай атмасферы: "Прэзідэнт трымае руку на пульсе і на пастаяннай аснове кантралюе работу ўсіх структур сілавога блока. А Камітэт дзяржбяспекі як структура, падпарадкаваная асабіста Прэзідэнту, знаходзіцца пад яго першараднай увагай".

Дзяржсакратар Савета бяспекі звярнуў увагу, што на нарадзе ў Прэзідэнта прысутнічалі службовыя асобы, якія раней служылі ў Камітэце дзяржбяспекі і не па чутках знаёмы з работай спецслужбы. Аляксандра Лукашэнку цікавіла іх меркаванне па пытаннях развіцця і функцыянавання КДБ з улікам новых выклікаў і пагроз, якія могуць паўплываць на бяспеку беларускай дзяржавы.

"Камітэт дзяржбяспекі вывучае формы і спосабы вядзення не толькі спецыяльнай ваеннай аперацыі і тое, што адбываецца побач з нашымі граніцамі, але і формы, метады, спосабы работы аналагічных спецслужбаў па ўсім свеце. І ўкараняе іх у сваю практыку", - дадаў Аляксандр Вальфовіч.

Паводле яго слоў, Прэзідэнт даў сваю ацэнку рабоце Камітэта дзяржбяспекі і даручыў яшчэ больш узмацніць яе для выканання задач, якія стаяць перад структурай. "Патэнцыял, рэзерв у нас ёсць у гэтым напрамку", - запэўніў дзяржсакратар.

Аляксандр Вальфовіч падкрэсліў, што кіраўніцтва Камітэта дзяржбяспекі бачыць, у якім напрамку трэба будаваць, развіваць і ўдасканальваць сваю работу. "За апошнія пяць гадоў у Камітэце дзяржбяспекі па пытаннях удасканалення і развіцця інфраструктуры была праведзена найбольш маштабная за апошнія дзесяцігоддзі работа", - канстатаваў ён. Дзяржсакратар адзначыў, што размова ідзе аб розных напрамках, у тым ліку падрыхтоўцы супрацоўнікаў, аснашчэнні вучэбна-матэрыяльнай базы, падыходах да навучання будучых супрацоўнікаў.

"Ёсць пытанні, на якія неабходна звярнуць увагу, прааналізаваць. Прэзідэнтам пастаўлена задача - з улікам меркавання тых, хто служыў (у Камітэце дзяржбяспекі. - Заўвага БЕЛТА), падправіць, падкарэкціраваць (работу. - Заўвага БЕЛТА). Самае галоўнае - забяспечыць бяспеку нашага народа, нашай краіны ў гэтых няпростых умовах", - рэзюмаваў Аляксандр Вальфовіч.

версія для друку

зрабіць стартавай

дабавіць у выбранае