Падзеі
Урад зацвердзіў план дзеянняў па развіцці эканомікі
Фота з архіва
4 студзеня, Мінск /Кар. БЕЛТА/. Урад зацвердзіў план дзеянняў на 2020 год па стварэнні ўмоў для развіцця эканомікі. Адпаведная пастанова Савета Міністраў ад 27 снежня 2019 года нумар 921 афіцыйна апублікавана 4 студзеня на Нацыянальным прававым інтэрнэт-партале, паведамляе карэспандэнт БЕЛТА.
Для павышэння эфектыўнасці дзяржсектара Мінэканомікі да 1 мая падрыхтуе праект закона "Аб дзяржаўных арганізацыях і гаспадарчых таварыствах з удзелам дзяржавы".
Плануецца пілотны праект па перадачы праблемнай запазычанасці 2-3 арганізацый прамысловасці ў ААТ "Агенцтва па кіраванні актывамі".
Урад падрыхтуе прапановы аб змяненні заканадаўства аб крымінальнай і адміністрацыйнай адказнасці. Яны будуць датычыцца пераводу асобных злачынстваў у справы прыватнага абвінавачання, мінімізацыі заключэння пад варту да прыгавору за эканамічныя злачынствы.
Асобны блок мерапрыемстваў - для стварэння спрыяльных умоў для інвестараў. Для гэтага хочуць удасканаліць інвестыцыйнае заканадаўства, распрацаваць стратэгію прыцягнення ПЗІ да 2025 года, сфарміраваць інфраструктурны план развіцця Беларусі да 2025 года. Інвестыцыйнае заканадаўства маюць намер скарэкціраваць, каб замацаваць дадатковыя гарантыі абароны правоў інвестараў, стварыць асобы прававы рэжым па заключэнні і рэалізацыі спецыяльных інвестдагавораў, забараніць перагляд прыватызацыйных здзелак (пасля заканчэння 3 гадоў).
План урада таксама прадугледжвае пашырэнне самастойнасці кіраўнікоў арганізацый і мясцовых улад. Для падрыхтоўкі прапаноў аб удасканаленні сістэмы падтрымкі развіцця тэрыторый будзе створана міжведамасная рабочая група. Да 1 жніўня ў кожным рэгіёне сфарміруюць партфель інвестпраектаў на 2021-2025 гады.
Мінпрацы, Мінэканомікі і Мінфіну даручана да 1 красавіка падрыхтаваць прапановы аб павышэнні памераў сацвыплат для беспрацоўных, якія пражываюць на тэрыторыях з напружанай сітуацыяй на рынку працы, і беспрацоўных старэйшых за 50 гадоў.
версія для друку
зрабіць стартавай
дабавіць у выбранае