Падзеі

У Беларусі чакаюць з візітам прэзідэнта Егіпта

6 мая, Мінск /Кар. БЕЛТА/. У Беларусі чакаюць з візітам прэзідэнта Егіпта. Аб гэтым паведаміў журналістам па выніках восьмага пасяджэння беларуска-егіпецкай сумеснай гандлёвай камісіі ў Мінску старшыня беларускай часткі камісіі, міністр антыманапольнага рэгулявання і гандлю Беларусі Артур Карповіч, перадае карэспандэнт БЕЛТА.

"Інтарэс узаемны, і Беларусь разглядае Егіпет як краіну для ўваходу на Афрыканскі кантынент, як прадстаўленасць беларускай прамысловасці, як хаб. Гэта наш даўні і надзейны партнёр, - адзначыў Артур Карповіч. - Мы чакаем, што егіпецкі бок прыкладзе ўсе намаганні для таго, каб арганізаваўся сюды візіт прэзідэнта Егіпта. Мы адкрыты. Запрашэнне адпаведнае было накіравана, папярэдне пацверджана. Таму спадзяёмся, што гэта будзе яшчэ адным імпульсам для развіцця нашых двухбаковых адносін".

Папярэдняе пасяджэнне беларуска-егіпецкай сумеснай гандлёвай камісіі адбылося ў 2023 годзе. Аб'ём узаемнага тавараабароту пакуль нязначны. Артур Карповіч вылучыў такі напрамак, як пастаўкі тэхнікі вытворчасці МАЗ і МТЗ.

"Егіпет адчуў, што гэта якасная, надзейная тэхніка па даступных цэнах, якая на сённяшні дзень можа канкурыраваць з сусветнымі брэндамі. Пры гэтым мы ідзём ужо далей па стварэнні сумесных вытворчасцей на тэрыторыі Егіпта", - праінфармаваў Артур Карповіч.

Ён звярнуў увагу на некаторыя цяжкасці ў сувязі з санкцыямі па правядзенні банкаўскіх плацяжоў, але бакі знаходзяць варыянты, як абысці бар'еры. Плануецца падпісанне трохбаковага дагавора па пастаўках тэхнікі ў Егіпет і фруктаў з Егіпта ў Беларусь. Паступіла прапанова па стварэнні хаба прамысловай прадукцыі на тэрыторыі Егіпта.

"Мы ў сваю чаргу прапануем разгледзець магчымасць пастаўкі не толькі прадукцыі прамысловасці, але і спажывецкіх тавараў у шырокім асартыменце", - дадаў Артур Карповіч, адзначыўшы, што так спажыўцы змогуць ацаніць і смачныя, карысныя беларускія прадукты харчавання. Дэлегацыя наведала адно з малакаперапрацоўчых прадпрыемстваў і засталася ў захапленні ад глазураваных сыркоў мясцовай вытворчасці.

"Гэта толькі пачатак нашага цеснага і ўзаемавыгаднага супрацоўніцтва", - падагульніў Артур Карповіч.

Дэлегацыя Арабскай Рэспублікі Егіпет на чале з міністрам інвестыцый і знешняга гандлю Махамедам Фарыдам Салехам наведвае Беларусь з 4 па 8 мая. Беларуска-егіпецкі бізнес-форум адбудзецца 7 мая.

версія для друку

зрабіць стартавай

дабавіць у выбранае