Падзеі

ЦВК устанавіла вынікі выбараў дэлегатаў УНС ад ФПБ замест выбыўшых

15 снежня, Мінск /Кар. БЕЛТА/. Цэнтральная выбарчая камісія сёння на пасяджэнні ўстанавіла вынікі выбараў дэлегатаў Усебеларускага народнага сходу ад суб'екта грамадзянскай супольнасці - Федэрацыі прафсаюзаў Беларусі замест выбыўшых і зарэгістравала двух новых дэлегатаў, паведамляе БЕЛТА.

На 11-м пазачарговым з'ездзе ФПБ, які адбыўся 12 снежня ў Мінску, старшыня праўлення Нацыянальнага банка Раман Галоўчанка і кіраўнік Адміністрацыі Прэзідэнта Дзмітрый Крутой выбраны дэлегатамі УНС ад ФПБ замест выбыўшых.

Старшыня ЦВК Ігар Карпенка адзначыў, што галасаванне праводзілася адкрыта, падлік галасоў ажыццяўляла падліковая камісія з'езда ФПБ. З'езд аднагалосна падтрымаў гэтыя кандыдатуры.

Як адзначана на пасяджэнні ЦВК, выбары дэлегатаў УНС ад ФПБ прайшлі ў адпаведнасці з Выбарчым кодэксам і статутам. Пададзеныя ў ЦВК дакументы пацвярджаюць, што вылучаныя асобы адпавядаюць патрабаванням, якія прад'яўляюцца Выбарчым кодэксам да кандыдатаў у дэлегаты УНС ад грамадзянскай супольнасці.

Такім чынам, ва ўстаноўленыя каляндарным планам тэрміны прайшло вылучэнне кандыдатаў у дэлегаты і выбранне дэлегатаў. Парушэнняў заканадаўства не ўстаноўлена.

Пастанова ЦВК "Аб устанаўленні вынікаў выбараў і рэгістрацыі дэлегатаў Усебеларускага народнага сходу ад суб'екта грамадзянскай супольнасці - Федэрацыі прафсаюзаў Рэспублікі Беларусь замест выбыўшых" прынята аднагалосна.

Як паведамлялася, Раман Галоўчанка быў вылучаны дэлегатам ад Мінскага гарадскога аб'яднання прафсаюзаў, а Дзмітрый Крутой - ад Магілёўскага абласнога аб'яднання прафсаюзаў. Яны з'яўляюцца членамі Беларускага прафесійнага саюза работнікаў дзяржаўных і іншых устаноў.

версія для друку

зрабіць стартавай

дабавіць у выбранае