Падзеі

"Толькі для маючых патрэбу". Кухараў заявіў аб планах па скарачэнні будаўніцтва жылля ў Мінску

Фота з архiва

29 студзеня, Мінск /Кар. БЕЛТА/. Будаўніцтва жылля ў Мінску плануецца скараціць. Новае жыллё ў сталіцы будзе ўзводзіцца ў першую чаргу для тых, хто мае патрэбу ў паляпшэнні жыллёвых умоў. Аб гэтым заявіў журналістам старшыня Мінскага гарвыканкама Уладзімір Кухараў па выніках даклада Прэзідэнту Беларусі Аляксандру Лукашэнку, перадае карэспандэнт БЕЛТА.

Асобнай тэмай даклада кіраўніку дзяржавы стаў стан спраў у будаўнічым комплексе Мінска. "У мінулым годзе ён спрацаваў нядрэнна. У гэтым годзе стаяць сур'ёзныя задачы", - сказаў старшыня Мінгарвыканкама.

У ліку такіх задач - асваенне новай тэрыторыі і будаўніцтва мікрараёна Зялёны Бор. "Вялікая тэрыторыя, якая будзе асвойвацца, будзе ўзводзіцца жыллё для маючых патрэбу, больш за 4 млн кв.м. Мы пачынаем у бягучым годзе асваенне гэтых тэрыторый", - растлумачыў Уладзімір Кухараў.

Паводле яго слоў, Прэзідэнту таксама было даложана аб выкананні даручэнняў, якія датычацца будаўніцтва жылля. "Мы будзем працаваць па скарачэнні будаўніцтва жылля. Толькі для маючых патрэбу. Таму што горад практычна ўжо забудаваны. Мы павінны зрабіць усё для таго, каб было камфортным пражыванне жыхароў у горадзе Мінску", - падкрэсліў старшыня Мінгарвыканкама.

Закраналася ў час даклада тэма мадэрнізацыі і капітальнага рамонту пуцеправодаў у Мінску. Паводле даных старшыні Мінгарвыканкама, з запланаваных да работы 39 пуцеправодаў на 28 ужо завершана рэканструкцыя. "У бліжэйшыя два гады (у гэтым і наступным) мы скончым гэту работу", - запэўніў ён.

"Цяпер пачынаем будаўніцтва новага пуцеправода - з мікрараёна Масюкоўшчына на вуліцу Ціміразева. Гэта таксама важны аб'ект, які дапаможа забяспечыць функцыянаванне лагістыкі горада - паміж двума буйнейшымі мікрараёнамі", - расказаў Уладзімір Кухараў.

Ён таксама далажыў кіраўніку дзяржавы аб сацыяльна-эканамічнай сітуацыі ў сталіцы, якая застаецца стабільнай. Забяспечваецца выкананне ключавых паказчыкаў развіцця. "Эканоміка працуе стабільна. Мы працуем на перспектыву, работа ідзе па тэхнапарках, якія, па даручэнні Прэзідэнта, у горадзе развіваюцца", - сказаў кіраўнік Мінгарвыканкама.

версія для друку

зрабіць стартавай

дабавіць у выбранае