Падзеі

Сергяенка: В'етнам - стратэгічны і надзейны партнёр Беларусі ў Паўднёва-Усходняй Азіі

Фота з архiва

1 верасня, Мінск /Кар. БЕЛТА/. В'етнам з'яўляецца важным, стратэгічным і надзейным партнёрам Беларусі ў Паўднёва-Усходняй Азіі, заявіў журналістам старшыня Палаты прадстаўнікоў Ігар Сергяенка, перадае карэспандэнт БЕЛТА.

Старшыня Палаты прадстаўнікоў Нацыянальнага сходу Рэспублікі Беларусь Ігар Сергяенка па даручэнні Прэзідэнта Рэспублікі Беларусь прыбыў з візітам у Сацыялістычную Рэспубліку В'етнам для ўдзелу ва ўрачыстых мерапрыемствах з нагоды 80-годдзя Жнівеньскай рэвалюцыі і Дня Незалежнасці.

"Мы бачым, што В'етнам дынамічна развіваецца. І сёння таксама пра гэта гаварылася. За апошнія 10 гадоў валавы ўнутраны прадукт краіны вырас у 2,5 раза. Ён складае больш за $500 млрд. Краіна займае 32-е месца па эканамічным патэнцыяле ў рэйтынгу краін свету. І сапраўды гэта так. Будучы ўчора ў рэгіёне, мы бачылі, як будуюцца новыя будынкі, рэканструююцца дарогі, добраўпарадкоўваюцца вуліцы. Але, напэўна, больш за ўсё ўразіла дружалюбнасць в'етнамскага народа, - адзначыў Ігар Сергяенка. - Людзі ў чаканні свята, у чаканні заўтрашняга парада".

Паводле яго слоў, В'етнам з'яўляецца важным, стратэгічным і надзейным партнёрам Беларусі ў Паўднёва-Усходняй Азіі. "У маі гэтага года адбыўся візіт Генеральнага сакратара ЦК Кампартыі таварыша То Лама ў Беларусь і разам з нашым Прэзідэнтам Аляксандрам Рыгоравічам Лукашэнкам было падпісана Пагадненне аб стратэгічным партнёрстве. Гэта новая старонка ў развіцці адносін паміж Беларуссю і В'етнамам. Гэта не толькі далейшае развіццё гандлёва-эканамічных адносін і фарміраванне новай дарожнай карты, над якой цяпер працуе ўрад, але гэта і далейшае паглыбленне палітычнага дыялогу, у тым ліку падтрымка адзін аднаго на розных міжнародных пляцоўках, у тым ліку ў міжпарламенцкіх структурах і на розных палітычных кантынентах", - падкрэсліў спікер.

У ходзе візіту адбыліся сустрэчы Ігара Сергяенкі з Генеральным сакратаром ЦК Камуністычнай партыі В'етнама То Ламам, Прэзідэнтам Сацыялістычнай Рэспублікі В'етнам Лыонг Кыогам, старшынёй Нацыянальнага сходу Сацыялістычнай Рэспублікі В'етнам Чан Тхань Манам.

"Сёння ў час сустрэч у парламенце размова ішла і аб пашырэнні парламенцкага супрацоўніцтва. У нас сфарміраваны групы дружбы, якія абменьваюцца вопытам заканадаўчай дзейнасці, выступаюць з ініцыятывамі рознымі, у тым ліку і па рэалізацыі канкрэтных эканамічных праектаў. У бліжэйшы час чакаецца наведванне такой групай нашай краіны, нашага парламента, і будзе прадоўжана ўзаемадзеянне па канкрэтных пытаннях, - адзначыў Ігар Сергяенка. - Ужо сёння рэалізуецца шэраг канкрэтных праектаў у сферы машынабудавання. Дастаткова актыўную пазіцыю, я хацеў бы адзначыць, займае пасольства Рэспублікі Беларусь у В'етнаме. Гэтыя праекты датычацца нашых асноўных машынабудаўнічых гігантаў. Дадаткова ўчора быў заключаны дагавор паміж в'етнамскім партнёрам і кіраўніцтвам нашага прадпрыемства "Белшына". Яшчэ адзін партнёр з'яўляецца на гэтым рынку. З аднаго боку, неабходна набыццё каўчуку для вытворчасці шын, а з іншага боку, пачатак рэалізацыі беларускіх шын".

Важны гуманітарны складнік. "Неабходна нарошчваць тут узаемаабмен, уключаючы і навучанне в'етнамскіх студэнтаў, развіццё турызму. У гэтых мэтах у кастрычніку адкрыецца авіямаршрут. Гэтаму садзейнічае адмена візавага рэжыму ўжо са студзеня гэтага года. Было заключана ў свой час міжурадавае пагадненне, якое ратыфікавана парламентам і падпісана прэзідэнтамі. Гэта значыць рух канкрэтны ёсць", - дапоўніў Ігар Сергяенка.

В'етнам адзначыць 80-ю гадавіну Жнівеньскай рэвалюцыі і Дня Незалежнасці 2 верасня ўрачыстым ваенным парадам і тэатралізаваным шэсцем на плошчы Ба Дзінь у г.Ханоі, дзе ў 1945 годзе Прэзідэнт Хо Шы Мін аб'явіў незалежнасць краіны.

версія для друку

зрабіць стартавай

дабавіць у выбранае