Падзеі

Сергяенка адзначыў высокі ўзровень міжпарламенцкага ўзаемадзеяння паміж Беларуссю і Кітаем

22 верасня, Мінск /Кар. БЕЛТА/. Міжпарламенцкае ўзаемадзеянне паміж Беларуссю і Кітаем знаходзіцца на высокім узроўні, адзначыў старшыня Палаты прадстаўнікоў Ігар Сергяенка на сустрэчы з членам Пастаяннага камітэта Палітбюро ЦК КПК, сакратаром Цэнтральнай камісіі па праверцы дысцыпліны КПК Лі Сі, перадае карэспандэнт БЕЛТА.

Ігар Сергяенка адзначыў, што ў чэрвені ў Мінску прайшло другое пасяджэнне Камітэта высокага ўзроўню па супрацоўніцтве паміж заканадаўчымі органамі дзвюх краін, што пацвярджае стратэгічны ўзровень сувязей. Адбыўся грунтоўны абмен меркаваннямі па пытаннях дзяржаўнага кіравання і маладзёжнай палітыкі. Дасягнута дамоўленасць прадоўжыць пашыраць узаемадзеянне ў эканоміцы, а таксама каардынаваць пазіцыі на міжнароднай арэне.

Паводле слоў старшыні Палаты прадстаўнікоў, развіццё ўсепагоднага і ўсебаковага стратэгічнага партнёрства з Кітайскай Народнай Рэспублікай з'яўляецца прыярытэтным напрамкам беларускай знешняй палітыкі. Народ Беларусі заўсёды быў і застаецца верным і надзейным сябрам народа Кітая.

"Дзякуючы лідарам нашых краін паміж Мінскам і Пекінам створана эфектыўная мадэль супрацоўніцтва, якая па праву лічыцца ўзорам міждзяржаўных адносін сёння. У ходзе нядаўніх сустрэч Прэзідэнта Рэспублікі Беларусь Аляксандра Лукашэнкі і Старшыні Кітайскай Народнай Рэспублікі Сі Цзіньпіна (толькі ў гэтым годзе дзве сустрэчы) пацверджана моц і непарушнасць беларуска-кітайскай дружбы, выказана зацікаўленасць у нарошчванні двухбаковага ўзаемадзеяння, - сказаў Ігар Сергяенка. - Наша галоўная задача заключаецца ў тым, каб перавесці гэтыя дамоўленасці на вышэйшым узроўні ў практычную плоскасць".

У Беларусі ганарацца поспехамі Кітайскай Народнай Рэспублікі ў справе пабудовы мадэрнізаванай дзяржавы, падкрэсліў старшыня Палаты прадстаўнікоў, адзначыўшы, што ён сам раней неаднаразова быў у КНР і змог на свае вочы пераканацца, якімі тэмпамі развіваецца гэта краіна.

"Кітай у поўнай меры рэалізаваў свае перавагі, стаў эканамічнай звышдзяржавай, заняўшы месца аднаго з самых магутных цэнтраў сусветнай эканомікі. Пад мудрым кіраўніцтвам Камуністычнай партыі Кітая дадзены старт многім важным рэформам, накіраваным на стымуляванне сацыяльна-эканамічнага развіцця краіны", - сказаў Ігар Сергяенка.

Паводле яго слоў, беларуска-кітайскае супрацоўніцтва дынамічна расце. Асновай стратэгічнага партнёрства з'яўляецца спалучэнне стратэгій развіцця дзвюх краін. Гэта ў поўнай меры адпавядае рэалізацыі вылучанай Старшынёй КНР Сі Цзіньпінам глабальнай мэты пабудовы супольнасці адзінага лёсу чалавецтва.

"Мінск падтрымлівае ініцыятывы Пекіна па глабальным развіцці, бяспецы і цывілізацыі, якія маюць вялікае значэнне для вырашэння праблем, што сталі сёння перад сучасным светам", - адзначыў старшыня Палаты прадстаўнікоў.

Ён дадаў, што Беларусь стала першай краінай, якая ў асобе кіраўніка дзяржавы адкрыта заявіла аб падтрымцы прапановы Старшыні КНР па глабальным кіраванні, што грунтуецца на прынцыпах раўнапраўя і справядлівасці. "Мы гатовы далучыцца да гэтай ініцыятывы і ў ШАС, і на пляцоўцы ААН, прыкладаць усе намаганні для пабудовы міжнародных адносін новага тыпу", - адзначыў Ігар Сергяенка.

На сустрэчы была адзначана гатоўнасць абмеркаваць усе пытанні, якія датычацца візіту члена пастаяннага камітэта Палітбюро ЦК КПК у Беларусь, міжпарламенцкага ўзаемадзеяння, супрацоўніцтва палітычных партый, а таксама пачуць ацэнкі і перспектывы развіцця двухбаковых сувязей у далейшым.

версія для друку

зрабіць стартавай

дабавіць у выбранае